Djokovic និង​ភរិយា​លែងមាន COVID-19 ក្រោយ​ព្យាបាល​៩​ថ្ងៃ​
កីឡាអន្តរជាតិ
អន្តរជាតិ
Djokovic និង​ភរិយា​លែងមាន COVID-19 ក្រោយ​ព្យាបាល​៩​ថ្ងៃ​
03, Jul 2020 , 11:56 am        
រូបភាព
Novak Djokovic កំពូល​កីឡាករ​វាយ​កូន​បាល់​លេខ​១​ពិភពលោក និង​ភរិយា​របស់គេ​អ្នកស្រី Jelena នៅ​ថ្ងៃទី​២ ខែកក្កដា បានធ្វើ​តេស្ត​អវិជ្ជមាន​ជំងឺ COVID-19 វិញ​ហើយ បន្ទាប់ពី​ឆ្លង​អស់​រយៈពេល​៩​ថ្ងៃ​មក​។ Djokovic បានធ្វើ​តេស្ត​វិជ្ជមាន​ជំងឺ​រាតត្បាត​នេះ អំឡុង​ចូលរួម​ការប្រកួត​ក្នុង​កម្មវិធី​របស់ខ្លួន Adria Tour នៅ​ថ្ងៃទី​២៣ ខែមិថុនា​មក​។​



Djokovic រួមទាំង​កីឡាករ​វាយ​កូន​បាល់​ដទៃទៀត​ដូចជា Grigor Dimitrov, Borna Coric និង Viktor Troicki សុទ្ធតែ​រកឃើញថា​ឆ្លង​ជំងឺ​នេះ បន្ទាប់ពី​ពួកគេ​ចូលរួម​ការប្រកួត​រួមគ្នា​មួយ​ក្នុង​កម្មវិធី Adria Tour របស់ Djokovic ដែល​ធ្វើឡើង​សម្រាប់​ជំនួប​ទី​១​ក្នុង​រដ្ឋធានី Belgrade ប្រទេស​ស៊ែ​ប៊ី​។​


 
​យ៉ាងណាក៏ដោយ ក្រោយ​ទទួល​ការពិគ្រោះ និង​ព្យាបាល​ពី​សំណាក់​ក្រុមគ្រូពេទ្យ​ត្រឹម​រយៈពេល​៩​ថ្ងៃ អ្នក​វាយ​កូន​បាល់​សញ្ជាតិ​ស៊ែ​ប៊ី វ័យ​៣៣​ឆ្នាំ​រូបនេះ រួមទាំង​ភរិយា​របស់ខ្លួន Jelena បានធ្វើ​តេស្ត​អវិជ្ជមាន​ជំងឺ COVID-19 នេះ​វិញ​ហើយ​។​
 
Djokovic ម្ចាស់​ពានរង្វាន់ Grand Slam ចំនួន​១៧​សម័យ ជា​អ្នកបើក​កម្មវិធី​ព្រឹត្តិការណ៍ Adria Tour ដែល​ត្រូវបាន​រៀបចំឡើង​នៅឯ​ទីលាន​វាយ​កូន​បាល់​ក្នុង​ក្រុង Belgrade កាលពី​ពាក់កណ្តាល​ខែមិថុនា​កន្ល​ង​ទៅ​។ ប៉ុន្តែ​បន្ទាប់ពី​មានការ​ឆ្លង ព្រឹត្តិការណ៍​ដែលមាន​លោក Djordje បងប្រុស​របស់ Djokovic ជា​អ្នករៀបចំ ត្រូវបាន​លុបចោល​វិញ​ទាំងអស់​តែម្តង​។​
 
Djokovic រង​ការរិះគន់​យ៉ាងខ្លាំង​ក្រោយ​ដឹកនាំ​រៀបចំ​ការប្រកួត​កីឡា​វាយ​កូន​បាល់​ក្នុងប្រទេស​ខ្លួន​នេះ ចំពេល​ដែលមាន​ការរីក​រាលដាល​នៃ​ជំងឺ​រាតត្បាត​សកល​រហូត​ធ្វើ​ឲ្យ​គ្រូបង្វឹក​របស់ខ្លួន​លោក Goran Ivanisevic រួមទាំង​កីឡាករ​៣​រូប​ទៀត​ធ្វើតេស្ត​ចេញ​លទ្ធផល​វិជ្ជមាន COVID-19​។​
 
​ប៉ុន្តែ​បើតាម​គោលការណ៍​ប្រទេស​ស៊ែ​ប៊ី​នោះ Djokovic មិនបាន​ល្មើ​សនឹង​ច្បាប់​ប្រទេស​ឡើយ ខណៈ​ស្ថានភាព​នៅក្នុង​ប្រទេស​ស៊ែ​ប៊ី​ល្អប្រសើរ​ជាង​ប្រទេស​នៅ​អឺរ៉ុប​ដទៃទៀត​។ ប្រទេស​នេះ​បានអនុញ្ញាត​ឲ្យ​ប្រជាពលរដ្ឋ​គ្រប់គ្នា​ធ្វើ​អ្វី​គ្រប់យ៉ាង ដូចជា​ការបើក​មជ្ឈមណ្ឌល ផ្សារ​ទំនើប និង​ភោជនីយដ្ឋាន​ជាដើម​៕

Tag:
 Novak Djokovic
  COVID-19
© រក្សាសិទ្ធិដោយ thmeythmey.com