ជើងហោះហើរមួយទៀត ចេញពីម៉ាឡេស៊ី ជាមួយនឹងអ្នកដំណើរ១៩២នាក់ បានមកដល់កម្ពុជា នៅព្រឹកថ្ងៃទី៣ ខែកក្កដា ឆ្នាំ២០២០។
ស្ថានទូតកម្ពុជាប្រចាំនៅម៉ាឡេស៊ី បង្ហោះលើទំព័រហ្វេសប៊ុកថា ក្នុងចំណោមអ្នកដំណើរ១៩២នាក់នោះ មានពលរដ្ឋខ្មែរ១២២នាក់ ម៉ាឡេស៊ី៤៤នាក់ និង ២៦នាក់ទៀត ជាអ្នកដំណើរពីប្រទេស១០ ដែលបានទៅបន្តជើងហោះហើរនៅម៉ាឡេស៊ី មកកម្ពុជា។ ស្ថានទូត អះអាងថា ក្នុងចំណោម២៦នាក់ ដែលទៅបន្តជើងហោះហើរនៅម៉ាឡេស៊ី ក៏មានពលរដ្ឋខ្មែរដែរ។
វា ជាជើងហោះហើរលើកទី៣ហើយ ដែលចេញពីម៉ាឡេស៊ី មកកម្ពុជា ក្រោមការសម្របសម្រួលរបស់ស្ថានទូតកម្ពុជានិងអាជ្ញាធរម៉ាឡេស៊ី។ បើតាមស្ថានទូត នៅថ្ងៃទី៩ ខែកក្កដា នឹងមានជើងហើរលើកទី៤ ពីម៉ាឡេស៊ី មកកម្ពុជា។
ជើងហោះហើរលើកទី១ មានជាង២០០នាក់ ហើយ ជើងហោះហើរលើកទី២ មានជាង១០០នាក់។ ក្នុងចំណោមពលរដ្ឋខ្មែរទាំងនោះ ខ្លះជានិស្សិត ហើយខ្លះទៀត ជាពលករ។
ជើងហោះហើរលើកទី១ ពេលដល់កម្ពុជា មន្ត្រីសុខាភិបាល រកឃើញបុរសខ្មែរម្នាក់វ័យ២១ឆ្នាំ ផ្ទុកមេរោគកូវីដ-១៩ តែបានជាសះស្បើយវិញហើយ។ ជើងហោះហើរលើកទី២ មាន២នាក់ ដែលមានជំងឺកូវីដ-១៩ ដោយម្នាក់វ័យ២៣ឆ្នាំនិងម្នាក់វ័យ១៥ឆ្នាំ (ប្រុសទាំង២)។ បច្ចុប្បន្ន អ្នកទាំង២ កំពុងសម្រាកព្យាបាល។
មិនមែននៅតែម៉ាឡេស៊ីទេ រដ្ឋាភិបាល ក៏ដូចជាស្ថានទូតកម្ពុជានៅប្រទេសផ្សេងទៀត ក៏ជួយរកយន្តហោះ ឲ្យពលរដ្ឋខ្មែរ បានធ្វើដំណើរមកវិញដែរ។ ថ្មីៗនេះ ពលរដ្ឋខ្មែរជាង៤០នាក់ នៅឥណ្ឌូណេស៊ី និងពលរដ្ឋខ្មែរប្រមាណ៦០នាក់នៅឥណ្ឌា បានធ្វើមាតុភូមិនិវត្ត។
ក្នុងចំណោមពលរដ្ឋខ្មែរជាង៤០ ដែលមកពីឥណ្ឌូណេស៊ី មាន៨នាក់ ត្រូវបានរកឃើញថា មានជំងឺកូវីដ-១៩ តែបានជាសះស្បើយវិញ២នាក់ហើយ។ ចំណែកជនជាតិឥណ្ឌូណេស៊ីម្នាក់ ក្នុងចំណោម២នាក់ ដែលធ្វើដំណើរមកជាមួយពលរដ្ឋខ្មែរជាង៤០នាក់នោះ ក៏មានជំងឺកូវីដ-១៩ដែរ តែបានជាសះស្បើយដែរហើយ។
ដោយឡែកពលរដ្ឋខ្មែរប្រមាណ៦០នាក់ ដែលមកពីឥណ្ឌា មិនមានព័ត៌មានថា ឆ្លងជំងឺកូវីដ-១៩នោះទេ។
គិតត្រឹមថ្ងៃទី២៩ ខែមិថុនា ឆ្នាំ២០២០ កម្ពុជា បានព្យាបាលអ្នកជំងឺកូវីដ-១៩ ឲ្យជាសះស្បើយ១៣១នាក់ ខណៈ១១នាក់ទៀត នៅបន្តព្យាបាល៕