ដោយមានការចូលរួមយ៉ាងសកម្មពីចៅក្រម ព្រះរាជធាជ្ញា ក្រឡាបញ្ជី អាជ្ញាសាលា និង ស្ថាប័នពាក់ព័ន្ធនានា គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ត របស់ក្រសួងយុត្តិធម៌ បង្ហាញក្តីរំពឹកទុកថា សាលាដំបូងរាជធានី-ខេត្តនៅទូទាំងប្រទេស នឹងខិតខំដោះស្រាយការកកស្ទះសំណុំរឿង «ឲ្យចប់សព្វគ្រប់» នៅត្រឹមដំណាច់ឆ្នាំ២០២០នេះ។
គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ត បង្ហាញក្តីរំពឹងនេះ នៅក្នុងសេចក្តីប្រកាសព័ត៌មានស្តីពីវឌ្ឍនភាពនៃយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ដែលចេញនៅថ្ងៃទី២ ខែកក្កដា ឆ្នាំ២០២០។
គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ត អះអាងក្នុងសេចក្តីប្រកាសព័ត៌មានថា រយៈពេល៤២ថ្ងៃកន្លងមក គឺចាប់តាំងពីគណៈកម្មការនេះ ត្រូវបានបង្កើតឡើង សំណុំរឿងព្រហ្មទណ្ឌជាង៣,៤ពាន់ហើយ ស្មើនឹងប្រមាណ២៧ភាគរយនៃសំណុំរឿងទាំងអស់ ដែលកកស្ទះនៅតាមសាលាដំបូងរាជធានី-ខេត្ត ត្រូវបានដោះស្រាយ។
គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ត កោតសរសើរគ្រប់ភាគីពាក់ព័ន្ធខាងលើ ដែលបានចូលរួមជំរុញដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ដើម្បីជាប្រយោជន៍ដល់ប្រជាពលរដ្ឋ ក៏ដូចជាវិស័យយុត្តិធម៌ផងដែរ។ ជាមួយគ្នានេះ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ត សង្ឃឹមថា គ្រប់ភាគីពាក់ព័ន្ធ នឹងបន្តចូលរួមកាន់តែសកម្មថែមទៀត។
ក្រោយបានឡើងជារដ្ឋមន្ត្រីក្រសួងយុត្តិធម៌ លោក កើត រិទ្ធ បានដាក់ផែនការដោះស្រាយបញ្ហាកកស្ទះសំណុំរឿងនៅតាមតុលាការ ជាការងារដែលត្រូវធ្វើមុនគេ។ ដើម្បីឲ្យការដោះស្រាយបញ្ហានេះបានជោគជ័យ លោក បានបង្កើតក្រុមការងារថ្មីមួយ គឺគណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ត នេះឯង ដោយលោក ធ្វើជាប្រធានខ្លួនឯងតែម្តង។
នៅថ្ងៃ២៦ ខែមិថុនា ឆ្នាំ២០២០ លោក ចេញសេចក្តីសម្រេចបង្កើតក្រុមការងារមួយទៀត ហៅថា ក្រុមការងារបច្ចេកទេស រៀបចំគោលនយោបាយដោះស្រាយវិវាទក្រៅប្រព័ន្ធតុលាការ។ ភារកិច្ចសំខាន់នៃក្រុមការបច្ចេកទេសនេះ គឺជួយដោះស្រាយវិវាទក្រៅប្រព័ន្ធតុលាការ ជូនប្រជាពលរដ្ឋ។
លោករដ្ឋមន្ត្រី បានតែងតាំងលោក ជិន ម៉ាលីន រដ្ឋលេខាធិការនិងជាអ្នកនាំពាក្យក្រយួងយុត្តិធម៌ ជាប្រធានក្រុមការបច្ចេកទេសនេះ អមដោយអនុប្រធាន២រូប អនុប្រធានអចិន្ត្រៃយ៍១រូប ទីប្រឹក្សា១រូប និង សមាជិក១០រូប។
កន្លងមក ក្រសួងយុត្តិធម៌ លើកមូលហេតុចម្បងមួយថា ការកកស្ទះសំណុំរឿងនៅតាមតុលាការ គឺដោយសារតែ ខ្វះបន្ទប់បើកសវនាការ ម្ល៉ោះហើយទើបបានជា ក្រសួងយុត្តិធម៌ បង្ហាញការប្រឹងប្រែងក្នុងការកសាងបន្ទប់សវនាការបន្ថែម ដើម្បីដោះស្រាយការកកស្ទះសំណុំរឿង។
លើសពីនេះ ក្រសួងយុត្តិធម៌ ធ្លាប់អះអាងថា មានបំណងអនុវត្តតុលាការចល័ត (Mobile Court) ដើម្បីដោះស្រាយការកកស្ទះសំណុំរឿង។ តុលាការចល័ត មានចែងក្នុងច្បាប់កម្ពុជា តែ មិនដែលបានយកមកអនុត្តនោះទេ។ តុលាការចល័ត គឺសំដៅលើការផ្ទេរចៅក្រមនិងសំណុំរឿង ពីតុលាការមួយ ទៅតុលាការមួយផ្សេងទៀត ហើយក៏អាចផ្លាស់ប្តូរសាលសវនាការដែរ។
មិនមែនតែនៅតាមតុលាការទេ ដែលកកស្ទះសំណុំរឿង នៅតាមពន្ធនាគារ ក៏កកស្ទះនិងមានភាពចង្អៀតណែនដែរ ដោយសារតែ អ្នកជាប់ឃុំ ចេះតែកើនឡើង។ រដ្ឋាភិបាល អះអាងថា បានប្រឹងប្រែងកសាងពន្ធនាគារបន្ថែម ដើម្បីដោះស្រាយភាពចង្អៀតណែន៕