អន្តរជាតិ
មីយ៉ាន់ម៉ា៖ មនុស្ស១៦២នាក់ហើយបានស្លាប់ក្នុងហេតុការណ៍បាក់ដីនៅទីតាំងជីករ៉ែត្បូង សកម្មភាពក្រុមជួយសង្គ្រោះ កំពុងស្វែងរកសពកម្មកររកត្បូងនៅមីយ៉ាន់ម៉ា (AFP)
× មនុស្សយ៉ាងតិច ១៦២នាក់ ត្រូវបានរាយការណ៍ថា បាត់បង់ជីវិតក្នុងហេតុការណ៍បាក់ដីនៅទីតាំងរ៉ែត្បូងមួយកន្លែងក្នុងភាគខាងជើងនៃប្រទេសមីយ៉ាន់ម៉ា ខណៈអាជ្ញាធរអះអាងថា នៅមានសពច្រើនទៀតរកសពឃើញ។
គំនរសំណល់រ៉ែត្បូងបានបាក់ធ្លាក់ចូលទៅក្នុងទឹកបឹង កាលពីថ្ងៃទី២ ខែកក្កដា ដោយសារភ្លៀងធ្លាក់ខ្លាំងពេក ហើយបានកប់កម្មកររកត្បូងជាច្រើនក្រោមដីភក់និងទឹក។ គិតត្រឹមល្ងាចថ្ងៃទី២ ខែកក្កដា ក្រុមសង្គ្រោះ បានរកឃើញសព១៦២នាក់ តែប្រតិបត្តិការស្វែងរកនៅតែបន្ត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
ភ្នាក់ងារទទួលបន្ទុកកិច្ចការអាសន្នមីយ៉ាន់ម៉ា បញ្ជាក់ថា គ្រោះមហន្តរាយនេះបានកើតឡើងប៉ុន្មានម៉ោងប៉ុណ្ណោះក្រោយពីភ្លៀងធ្លាក់ខ្លាំងនៅជាប់ព្រំដែនចិន ក្នុងរដ្ឋ Kachin ។ ចំណែក ប៉ូលិសក្នុងស្រុកបានប្រាប់ AFP ថា កម្មកររកត្បូងមិនព្រមស្ដាប់តាមការព្រមានពីសំណាក់អាជ្ញាធរ មិនឲ្យពួកគេធ្វើការអំឡុងពេលភ្លៀងធ្លាក់។
ការបាក់ដីក្នុងតំបន់រកត្បូងនេះ គឺជារឿងធម្មតា ជាពិសេសអំឡុងរដូវភ្លៀង។ ហើយករណីបាក់ដីធំមួយដែលបានកើតឡើងក្នុងខែវិច្ឆិកាឆ្នាំ២០១៥ បានសម្លាប់មនុស្សជាង១០០នាក់។ ហើយកាលពីឆ្នាំមុន ករណីដូចគ្នានេះ បានកប់កម្មករស្លាប់ជាង៥០នាក់។
មីយ៉ាន់ម៉ា គឺជាប្រភពរ៉ែត្បូងធំបំផុតមួយក្នុងពិភពលោក ហើយឧស្សាហកម្មនេះជំរុញមួយផ្នែកធំដោយតម្រូវការរបស់ឈ្មួញពីប្រទេសចិន។ យោងតាមរបាយការណ៍ស៊ើបអង្កេតរបស់អង្គការ Global Witness ប្រតិបត្តិការជីកត្បូងនេះ គឺមានលក្ខណៈសម្ងាត់ ហើយប្រតិបត្តិករគឺជាប់ពាក់ព័ន្ធនឹងអតីតមេដឹកនាំយោធាមានឥទ្ធិពលក្នុងប្រទេសនេះ។
អង្គការឃ្លាំមើលនេះ ប៉ាន់ស្មានថា ឧស្សាហកម្មត្បូងរកចំណូលបានជាង៣១ពាន់លានដុល្លារក្នុងឆ្នាំ២០១៤ ទោះជាលុយតិចតួចប៉ុណ្ណោះចូលហោប៉ៅរដ្ឋ។ ធនធានធម្មជាតិដ៏ច្រើនសន្ធឹកនៃតំបន់ភាគខាងជើងនៃប្រទេសនេះរួមមាន ត្បូង ដើមឈើធំៗ និងមាសជាដើម បានជួយផ្គត់ផ្គង់ហិរញ្ញវត្ថុដល់សង្គ្រាមរ៉ាំរ៉ៃរាប់ទសវត្សន៍ មិនថាក្រុមយោធា និងក្រុមឧទ្ទាមនៅរដ្ឋ Kachin ឡើយ។ ការប្រយុទ្ធគ្នាដើម្បីគ្រប់គ្រងរ៉ែនិងចំណូលនេះ ធ្វើឲ្យប្រជាជនស៊ីវិលរស់នៅមិនបានក្តីសុខ៕
Tag:
មីយ៉ាន់ម៉ា
រ៉ែរកត្បូង
© រក្សាសិទ្ធិដោយ thmeythmey.com