COVID-19
អន្តរជាតិ
លោក ម៉ាក្រុង តែងតាំងលោក Castex ដែលមានស្នាដៃប្រយុទ្ធប្រឆាំង COVID-19 ជានាយករដ្ឋមន្ត្រីថ្មី
នាយករដ្ឋមន្រ្តីបារាំងទើបត្រូវបានតែងតាំងថ្មី ហ្សង់ កាស្ដេក ។ រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីបារាំង អេម៉ានុយអែល ម៉ាក្រុង នៅថ្ងៃទី៣ ខែកក្កដា បានតែងលោក ហ្សង់ កាស្តេក (Jean Castex) ជានាយករដ្ឋមន្ត្រីថ្មីជំនួសលោក អេឌូអា ហ្វីលីព ដែលសុំលាលែងជាមួយនឹងគណៈរដ្ឋមន្ត្រីទាំងមូល។ លោក កាស្តេក ជាមន្ត្រីជាន់ខ្ពស់ម្នាក់ដែលមិនសូវមានអ្នកស្គាល់ឡើយ តែលោកមានស្នាដៃក្នុងការដាក់ចេញវិធានការបើកប្រទេសឡើងវិញក្រោយការរាលដាលជំងឺ COVID-19 ។
«ប្រធានាធិបតីសាធារណរដ្ឋ តែងតាំងលោក ហ្សង់ កាស្ដេក ជានាយករដ្ឋមន្ត្រី និងចាត់តាំងឲ្យបង្កើតរដ្ឋាភិបាល។» នេះជាការប្រកាសរបស់វិមាន Elysee នៅថ្ងៃទី៣ ខែកក្កដា ប៉ុន្មានម៉ោងក្រោយការលាលែងរបស់លោក អេឌូអា ហ្វីលីព ។ ការលាលែងរបស់លោក ហ្វីលីព ធ្វើឡើងបន្ទាប់ពីបក្សលោកប្រធានាធិបតី អេម៉ានុយអែល ម៉ាក្រុង រងបរាជ័យក្នុងការបោះឆ្នោតថ្នាក់ ដែលបង្ខំឲ្យលោកត្រូវដើរលើផ្លូវថ្មីជាមួយក្បាលម៉ាស៊ីនដឹកនាំថ្មី។
លោក កាស្តេក មិនត្រូវបានស្គាល់ជាទូទៅឡើយមុនការលេចឈ្មោះជានាយករដ្ឋមន្ត្រីថ្មីរបស់បារាំង។ ប៉ុន្តែលោកត្រូវបានទទួលស្គាល់ចំពោះស្នាដៃរបស់លោកក្នុងការដាក់ចេញគោលនយោបាយដើម្បីឲ្យបារាំងដើរចេញបន្តិចម្ដងៗពីការបិទប្រទេសក្រោយរងគ្រោះធ្ងន់ធ្ងរដោយសារជំងឺ COVID-19 ។ វិធានការរបស់បារាំងក្នុងការបើកប្រទេសឡើងវិញនេះ ទទួលបានការសរសើរពីអ្នកជំនាញដែលអាចចៀសផុតពីរលកទីពីរ។
នាយករដ្ឋមន្ត្រីដែលមានប្រភពពីក្រុមស្ដាំនិយមថ្មី និងបច្ចុប្បន្នជាអភិបាលក្រុង Prades មិនមែនជាមនុស្សថ្មីឡើយក្នុងនយោបាយបារាំង។ លោក កាស្តេក ធ្លាប់ជាអតីតមនុស្សជំនិតប្រធានាធិបតី នីកូឡាស់ សាកូហ្ស៊ី និងធ្លាប់បម្រើការនៅក្រសួងសុខាភិបាល និងការងារផងដែរ។ នេះបើតាមទីភ្នាក់ងារព័ត៌មាន AFP ។
ក្នុងកិច្ចសម្ភាសលើកដំបូងជាមួយទូរទស្សន៍ TF1 លោក កាស្តេក និយាយថា លោកកាន់តំណែងនាយករដ្ឋមន្ត្រីនេះ មិនមែនដើម្បីចេញមុខមាត់ឡើយ តែដើម្បីបញ្ចេញលទ្ធផល។ លោកនឹងបញ្ចេញផែនការនយោបាយនៅសប្ដាហ៍ក្រោយ អមជាមួយនឹងសមាសភាពរដ្ឋាភិបាលផងដែរ ស្របពេដែលលោក ម៉ាក្រុង ចង់បានរដ្ឋាភិបាលថ្មីសម្រាប់ការដឹកនាំបារាំងនៅរយៈពេលពីរឆ្នាំចុងក្រោយនៃអាណត្តិរបស់លោក។
ងាកទៅលោក ហ្វីលីព បន្តិច រដ្ឋអាជ្ញាបារាំង និយាយថា តុលាការបារាំងនឹងបើកការស៊ើបអង្កេតលើអតីតនាយករដ្ឋមន្ត្រីរូបនេះ និងអតីតរដ្ឋមន្ត្រីពីររូបទៀតទាក់ទងការធ្វេសប្រហែសលើការឆ្លើយតបជំងឺ COVID-19 ។ រដ្ឋអាជ្ញាជាន់ខ្ពស់ Francois Molins បញ្ជាក់ថា តុលាការច្បាប់សាធារណរដ្ឋដែលទទួលបន្ទុកសំណុំរឿងមិនប្រក្រតីរបស់មន្ត្រី នឹងចាត់ការរឿងនេះ៕
Tag:
អេម៉ានុយអែល
ម៉ាក្រុង
COVID-19
Jean Castex
© រក្សាសិទ្ធិដោយ thmeythmey.com
