អន្តរជាតិ
តារាចម្រៀងអាមេរិក Kayne West និងប្រធានាធិបតីអាមេរិក ដូណាល់ ត្រាំ ។ រូបភាព AFP
×![]()
ដោយ: តន ចាន់រិទ្ធារ៉ា
តារាចម្រៀងរ៉េបអាមេរិក Kayne West នៅថ្ងៃទី៤ ខែកក្កដា បានប្រកាសចូលរួមក្នុងការបោះឆ្នោតជ្រើសរើសប្រធានាធិបតីអាមេរិក ដែលធ្វើនៅខែវិច្ឆិកាខាងមុខ។ Kayne West ជាអ្នកគាំទ្រម្នាក់របស់លោកប្រធានាធិបតី ដូណាល់ ត្រាំ ប៉ុន្តែរូបគេមិនបានបញ្ជាក់ឲ្យច្បាស់ពីមូលហេតុដែលនាំឲ្យរូបនេះចូលរួមក្នុងការបោះឆ្នោតឡើយ។
«ឥឡូវនេះ យើងត្រូវតែធ្វើឲ្យលេចជារូបរាងការសន្យារបស់អាមេរិកតាមរយៈការជឿលើព្រះ បង្រួបង្រួមទស្សនៈរបស់យើង និងពូនជ្រំអនាគតរបស់យើង។» តារាចម្រៀងស្បែកខ្មៅអាមេរិក Kayne West សរសេរបែបនេះនៅលើបណ្ដាញសង្គម Twitter របស់ខ្លួននៅថ្ងៃទី៤ ខែកក្កដា ពេលប្រកាសចូលប្រជែងកៅអីប្រធានាធិបតីអាមេរិក។
យ៉ាងណាមិញ West មិនបានប្រាប់ឲ្យលម្អិតថា អ្វីដែលខ្លួនប្រកាសនេះ ជារឿងមែនទែនឡើយ ហើយក៏មិនបញ្ជាក់ថា បានដាក់ពាក្យជាផ្លូវការដើម្បីឈរឈ្មោះដែរ។ សម្រាប់បេក្ខជនឯករាជ្យ ការឈរឈ្មោះនៅមិនទាន់បិទនៅឡើយទេ។ បើសិនតារាចម្រៀងរូបនេះដាក់លិខិតមែននោះ រូបគេត្រូវប្រជែងជាមួយបេក្ខជនបក្សធំៗទាំងពីរ គឺសាធារណរដ្ឋ និងប្រជាធិបតេយ្យ។ លោក ដូណាល់ ត្រាំ ប្រធានាធិបតីបច្ចុប្បន្ន នឹងតំណាងបក្សសាធារណរដ្ឋ ឯតំណាងបក្សប្រជាធិបតេយ្យ គឺលោក ចូ បៃឌិន ប៉ុន្តែមិនទាន់ទទួលបានការតែងតាំងជាផ្លូវការពីបក្សនៅឡើយ។ ភ្លាមៗក្រោយអ្នកចម្រៀងរ៉េបល្បីឈ្មោះរូបនេះប្រកាសដំណឹងប្រជែងកៅអីប្រធានាធិបតី មហាសេដ្ឋីអាមេរិក និងម្ចាស់ក្រុមហ៊ុន Tesla លោក Elon Musk ក៏ប្រកាសគាំទ្រភ្លាមដែរ។ គិតត្រឹមខែកក្កដា ការបោះឆ្នោតអាមេរិកនៅបួនខែទៀតប៉ុណ្ណោះ។ ប៉ុន្តែការរាលដាលខ្លាំងជំងឺ COVID-19 ទំនងជាបង្កបញ្ហាដល់ការរៀបចំការបោះឆ្នោតលើកនេះ ខណៈលោក បៃឌិន មានសំឡេងនាំមុខលោក ត្រាំ ក្នុងការស្ទង់មតិកន្លងមក។ អាមេរិក កំពុងគិតគូររកផ្លូវដើម្បីឲ្យការបោះឆ្នោតនេះធ្វើឡើងដោយរលូន ក្នុងនោះក៏មានការបោះឆ្នោតតាមអ៊ីមែលផងដែរ៕ We must now realize the promise of America by trusting God, unifying our vision and building our future. I am running for president of the United States
Tag:
អាមេរិក
Kayne West
© រក្សាសិទ្ធិដោយ thmeythmey.com
