ជាតិ
×![]()
ដោយ៖ ខន ណារី
ផ្សោត ជាសត្វប្រភេទថនិកសត្វចិញ្ចឹមកូនដោយទឹកដោះ ដោយចំនួនមានការថយចុះពីមួយឆ្នាំទៅមួយឆ្នាំៗ។ បច្ចុប្បន្ន ចំនួនសត្វផ្សោតទន្លេមេគង្គមានចំនួនតែ ៨០ ក្បាលប៉ុណ្ណោះ។ នេះបើតាមលោក ទ្រី សុភក្តិ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ។
នាសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តក្រចេះ» នៅព្រឹកថ្ងៃទី ៣០ ខែមិថុនា ប្រធានមន្ទីរកសិកម្មខេត្តក្រចេះ បានគូសបញ្ជាក់ថា បទល្មើសលើសត្វផ្សោតកាលពីឆ្នាំ២០១៩ មានចំនួន ២៦៥ ករណី ដោយ៧៥ភាគរយបន្តកើតមានជារៀងរាល់ថ្ងៃ ប៉ុន្តែដោយសាររដ្ឋបាលខេត្តបានដាក់ផែនការយ៉ាងតឹងតែងទើបពេលបច្ចុប្បន្នមានការធូរស្បើយច្រើន។
បើតាម លោក ទ្រី សុភក្តិ សត្វផ្សោតដែលស្លាប់ទូទៅ មានទម្ងន់ជាង ១០០គីឡូ និងប្រវែង ២ម៉ែត្រ ទៅ ២,៥ម៉ែត្រ។ ផ្សោតដែលស្លាប់ មានមួយចំនួនអាយុតិចពេក រីឯខ្លះទៀតមានវ័យចំណាស់។
បើតាមអង្គការ WWF យ៉ាងហោចណាស់មានសត្វផ្សោតចំនួន ៦ក្បាល គិតជាមធ្យមគឺ ២,១ ភាគរយ សា្លប់ ក្នុងមួយឆ្នាំៗ ហើយភាគច្រើនគឺដោយសារតែមានអាយុកាលវែង និងសកម្មភាពរបស់មនុស្ស»។ ផ្សោត ត្រូវបានគេចាត់ទុកជាសត្វដែលងាយនឹងផុតពូជបំផុត និងប្រឈមក្នុងការគំរាមកំហែង។
សត្វផ្សោតទូទាំងសាកលមានចំនួន ៧ប្រភេទ ក្នុងនោះ ៤ ប្រភេទរស់នៅក្នុងទីជម្រកទឹកសាប និង ៣ ប្រភេទមានទីជម្រកនៅសមុទ្រទឹកប្រៃ។ នេះបើតាមរបាយការណ៍របស់អង្គការ WWF ៕
Tag:
ផ្សោត
ក្រចេះ
© រក្សាសិទ្ធិដោយ thmeythmey.com
