មានមូលហេតុច្រើនណាស់ដែលបណ្ដាលឱ្យស្បែកប្រែជាស្រអាប់ខ្មៅមិនស្អាត ដូចជាការត្រូវពន្លឺព្រះអាទិត្យយូរៗជាប្រចាំ, ធូលីដី និងខ្យល់ពុល។ ញើស, ជាតិប្រេង និងផលិតផលតុបតែងមុខមួយចំនួនដែលជ្រាបចូលក្នុងរន្ធញើសនៃស្បែកផ្ទៃមុខអាចបង្កការរលាក, ភាពស្រអាប់ និងស្ងួតគួរឱ្យព្រួយបារម្ភ។ នៅពេលបច្ចុប្បន្ន ផលិតផលធ្វើឱ្យស្បែកសឆាប់រហ័សមានច្រើនមិនខ្វះឡើយ គ្រាន់តែមួយចំនួនធំមានផ្ទុកសារធាតុគីមី ហើយខ្លះទៀតមានតម្លៃថ្លៃ។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់ជួយធ្វើឱ្យស្បែកមុខរបស់អ្នកប្រែជាសស្អាតគ្មានផលប៉ះពាល់ ៖
១. ផ្លែល្ហុង
ផ្លែល្ហុង មានផ្ទុកអង់ស៊ីម papain ដែលមិនត្រឹមតែជួយធ្វើឱ្យស្បែកសស្រស់ថ្លា, ទន់ភ្លឺរលោង និងមានសំណើមប៉ុណ្ណោះទេ ប៉ុន្តែក៏ជួយទប់ស្កាត់ដោះស្រាយបញ្ហានៃរោគមុនផងដែរ។ អ្វីដែលអ្នកត្រូវធ្វើ គឺដំបូងត្រូវលាងសម្អាតមុខឱ្យស្អាតជាមុនសិន។ បន្ទាប់មកសឹមយកសាច់នៃផ្លែល្ហុងមកកិនឱ្យម៉ដ្ឋខាប់ៗ រួមលាបវាលើស្បែក ហើយទុកចោលសម្រាប់រយៈពេល ២០ នាទី សឹមលាងសម្អាតចេញជាមួយទឹកធម្មតា។ អ្នកគួរអនុវត្តន៍រូបមន្តនេះរៀងរាល់ថ្ងៃ រហូតដល់ទទួលបានលទ្ធផលគាប់ចិត្ត។
២. ទឹកក្រូចឆ្មារ
អ្វីដែលអ្នកត្រូវធ្វើ គឺលាយទឹកក្រូចឆ្មារស្រស់មួយចំនួនជាមួយទឹកធម្មតា។ កូរឱ្យសព្វ សឹមយកដុំសំឡីជ្រលក់ចូលទឹកល្បាយនេះ ហើយលាបថ្នមៗលើផ្ទៃមុខរបស់អ្នក។ ទុកចោលសម្រាប់រយៈពេលពី ១០ ទៅ ១៥ នាទី សឹមលាងសម្អាតចេញជាមួយទឹកក្ដៅឧណ្ហៗ។
៣. រមៀត
រមៀត សឹងតែត្រូវបានគេប្រើជាទូទៅនៅក្នុងផលិតផលថែរក្សាសម្រស់ និងធ្វើឱ្យស្បែកប្រែជាសស្រស់ស្អាត នោះក៏ព្រោះតែបរិមាណនៃវីតាមីន C ដែលវាមានផ្ទុក។ អ្វីដែលអ្នកត្រូវធ្វើ គឺលាយម្ស៉ៅរមៀត ១ ស្លាបព្រាកាហ្វេ ជាមួយទឹកឃ្មុំ ១ ស្លាបព្រាកាហ្វេ និងទឹកក្រូចឆ្មារ ១ ស្លាបព្រាកាហ្វេ ចូរគ្នាឱ្យសព្វ។ បន្ទាប់មកលាបល្បាយលើផ្ទៃមុខ និងករបស់អ្នក រួចទុកចោលសម្រាប់រយៈពេល ៣០ នាទី សឹមលាងសម្អាតចេញជាមួយទឹកធម្មតា។ រូបមន្តនេះអាចប្រើប្រាស់សម្រាប់គ្រប់ប្រភេទនៃស្បែកមុខ និងសូម្បីតែស្បែកខ្លាញ់ក៏ដោយ។
៤. ប្រទាលកន្ទុយក្រពើ
អ្វីដែលអ្នកត្រូវធ្វើ គឺយកជែលប្រទាលកន្ទុយក្រពើស្រស់មកលាបលើស្បែកមុខដែលទទួលរងផលប៉ះពាល់ ហើយម៉ាស្សាសម្រាប់រយៈពេលពី ១០ ទៅ ១៥ នាទីសិន សឹមលាងមុខចេញជាមួយទឹកធម្មតា។ អ្នកអាចលាយទឹកក្រូចឆ្មារជាមួយម្ស៉ៅរមៀត និងជែលប្រទាលកន្ទុយក្រពើលាបលើផ្ទៃមុខក៏បាន។ អនុវត្តម្ដងក្នុងមួយថ្ងៃ សម្រាប់រយៈពេលពី ២ ទៅ ៣ សប្តាហ៍។
៥. សំបកផ្លែប៉ោម និងទឹកដោះគោជូរ
សំបកផ្លែប៉ោមមានផ្ទុកសម្បូរទៅដោយវីតាមីន ជាតិរ៉ែចាំបាច់ និងសារធាតុប្រឆាំងអុកស៊ីតកម្មដែលស្បែកត្រូវការដើម្បីរក្សាបាននូវសុខភាពល្អ។ ការប្រើប្រាស់សំបកផ្លែប៉ោមនឹងជួយការពារស្បែកពីកាំរស្មីយូវី។ នោះក៏ព្រោះតែសំបកផ្លែប៉ោមមានផ្ទុកសារធាតុ polyphenols សារធាតុប្រឆាំងអុកស៊ីតកម្មមួយកម្ចាត់រ៉ាឌីកាល់សេរី និងការពារប្រឆាំងកាំរស្មីយូវីទប់ស្កាត់បញ្ហាស្បែកចាស់ជាងវ័យ។ សំបកផ្លែប៉ោមក៏ជាប្រភពដ៏ប្រសើរនៃវីតាមីន C ដែលជួយទប់ស្កាត់ភាពចាស់មុនអាយុនៃស្បែកដោយបង្កើនភាពទន់រលោងតឹងណែនមានពន្លឺនៃស្បែក។ អ្វីដែលអ្នកត្រូវការ គឺទឹកដោះគោជូរ ៣ ស្លាបព្រាបាយ និងម្ស៉ៅសំបកផ្លែប៉ោម ២ ស្លាបព្រាបាយ។ អ្វីដែលអ្នកត្រូវធ្វើ គឺលាយគ្រឿងផ្សំទាំង ២ ចូលគ្នាឱ្យសព្វ រួចលាបលើផ្ទៃមុខរបស់អ្នក។ ទុកចោលសម្រាប់រយៈពេលពី ១៥ ទៅ ២០ នាទីសឹមលាងចេញជាមួយទឹកត្រជាក់។
៦. ចេក
អ្វីដែលអ្នកត្រូវការ គឺចេកទុំ ទឹកឃ្មុំ និងទឹកដោះគោស្រស់។ អ្វីដែលអ្នកត្រូវធ្វើ គឺកិនលាយគ្រឿងផ្សំទាងអស់ចូលគ្នាឱ្យសព្វ សឹមលាបលើស្បែកមុខដែលបានលាងសម្អាតស្អាតហើយ។ ទុកចោលសម្រាប់រយៈពេល ៣០ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច៕
ត្រួតពិនិត្យដោយ www.health.com.kh