COVID-19
អន្តរជាតិ
ហ្វ៊ីជី រកឃើញ COVID-19 មួយករណីថ្មី ក្រោយគ្មាន៧៨ថ្ងៃ នាយករដ្ឋមន្ត្រីហ្វ៊ីជី លោក Frank Bainimarama (AFP)
× នាយករដ្ឋមន្ត្រីប្រទេស ហ្វ៊ីជី លោក Frank Bainimarama បានបញ្ជាក់នៅថ្ងៃទី៦ខែមិថុនាថា បុរសអាយុ៦៦ឆ្នាំម្នាក់មានលទ្ធផលតេស្ត COVID-19 វិជ្ជមាន ក្រោយត្រលប់មកពីប្រទេសឥណ្ឌាវិញ។ នេះគឺករណីឆ្លងថ្មីដំបូងក្នុងពេល៧៨ថ្ងៃចុងក្រោយរបស់ប្រទេសនេះ។
ករណីឆ្លងថ្មីនេះ គឺជាករណីឆ្លងទី១៩របស់ប្រជាជាតិកោះក្នុងតំបន់ប៉ាស៊ីហ្វិកខាងត្បូងនេះ ហើយករណីឆ្លងថែមទៀត ត្រូវគេរំពឹងថា នឹងរកឃើញ។
«យើងបានរកឃើញករណី COVID-19 នាំចូលក្នុងចំណោមប្រជាជនទើបត្រលប់មកពីបរទេស»។ លោកនាយករដ្ឋមន្ត្រី Bainimarama គូសបញ្ជាក់ដូច្នេះ ដោយដកស្រង់ចុះផ្សាយទីភ្នាកងារព័ត៌មានAFP ។ លោកបន្តថា អ្នកជំងឺថ្មីនេះកំពុងស្ថិតក្នុងមណ្ឌលចត្តាឡីស័កដែលគាំទ្រដោយរដ្ឋាភិបាល។
មែនទែនទៅ អ្នកដែលទើបមកដល់ទឹកដី ហ្វ៊ីជី ត្រូវតែឆ្លងកាត់ការធ្វើចត្តាឡីស័ករយៈពេល១៤ថ្ងៃ ក្រោមការតាមដានរបស់អាជ្ញាធរសុខាភិបាល។ យ៉ាងណាមិញ រដ្ឋាភិបាលហ្វ៊ីជីពុំបានបង្ហាញតួលេខអ្នកទើបត្រលប់មកពីបរទេសជាក់លាក់ឡើយ។
បន្ថែមពីលើនេះ មន្ត្រីជាន់ខ្ពស់នៃក្រសួងសុខាភិបាលហ្វ៊ីជី លោក James Fong បានអះអាងថា ប្រទេសហ្វ៊ីជី មានការប្រុងប្រយ័ត្នខ្ពស់ក្នុងការហៅខ្លួនឯងថា ជាតំបន់គ្មាន COVID-19 ហើយលោកមិនភ្ញាក់ផ្អើលឡើយនៅពេលរកឃើញអ្នកជំងឺថ្មី កាលពីថ្ងៃទី៥ ខែកក្កដា។
«ខណៈហ្វ៊ីជី អាចជាតំបន់គ្មានការចម្លង COVID-19 ជាលក្ខណៈសហគមន៍ ជំងឺរាតត្បាតសកលនេះ នៅតែបន្តកើតមានក្នុងប្រទេសយើង»។ លោក Fong មានប្រសាសន៍បែបនេះដោយដកស្រង់ដោយ AFP។ យ៉ាងណា លោកជឿថា អ្នកជំងឺឆ្លងថ្មីនេះពុំមែនជាករណីនាំចូលចុងក្រោយរបស់ប្រទេសលោកឡើយ៕
© រក្សាសិទ្ធិដោយ thmeythmey.com