ក្លិបបាល់ទាត់វិសាខាបានបោះពុម្ភអាវមានរូបកីឡាករ ទៀត គឹមហេង នៅចំពីមុខយ៉ាងធំ សម្រាប់ឲ្យកីឡាករ គ្រូបង្វឹក និងមន្ត្រីពាក់ ដើម្បីផ្តល់កម្លាំង និងលើកទឹកចិត្តដល់រូបគេ ដែលកំពុងសម្រាកព្យាបាលរបួសនៅមន្ទីរពេទ្យ។ ការធ្វើបែបនេះ ស្របពេលក្លិបវិសាខាត្រូវប្រកួតបើកឆាកជាមួយម្ចាស់ផ្ទះភ្នំពេញក្រោន នាជំនួបពានរង្វាន់ក្របខណ្ឌមិត្តហ្វូនខេមបូឌានលីគ។
កីឡាករ ទៀត គឹមហេង បានអវត្តមានជាមួយក្លិបវិសាខា នាជំនួបបើកឆាកដ៏សំខាន់ជាមួយម្ចាស់ផ្ទះភ្នំពេញក្រោន ដោយសាររបួស ក្រោយជួបឧបទ្ទវហេតុគ្រោះថ្នាក់ចរាចរណ៍កាលពីពេលថ្មីៗ ។ ទោះបីខ្សែបម្រើរូបនេះ មិនបានបង្ហាញខ្លួនលើទីលានផ្ទាល់ ប៉ុន្តែឈ្មោះ និងរូបថតរបស់គេ ត្រូវបានក្លិបវិសាខាបោះពុម្ភរំលេចនៅលើអាវរបស់កីឡាករ គ្រូបង្វឹក និងមន្ត្រី។
ការបោះពុម្ភអាវយឺតមានរំលេចឈ្មោះ និងរូបថតរបស់កីឡាករ ទៀត គឹមហេង នៅចំពីមុខដ៏ធំនេះ គឺដើម្បីផ្តល់ និងលើកកម្លាំងចិត្តឲ្យកីឡាកររូបនេះ មានភាពរឹងមាំ និងចង់បង្ហាញថា អ្នកគ្រប់គ្នាក្នុងវិសាខានៅជាមួយរូបគេជានិច្ច។ ក្លិបវិសាខាបានបង្ហោះរូបថតកីឡាករពាក់អាវមានរូបកីឡាករ ទៀត គឹមហេង ចំនួន២០សន្លឹក ជាមួយការរៀបរាប់ដូច្នេះថា៖«រឹងមាំឡើង! ពួកយើងនៅក្បែរអ្នកជានិច្ច»។
បច្ចុប្បន្នកីឡាករ ទៀត គឹមហេង កំពុងសម្រាកព្យាបាលនៅមន្ទីរពេទ្យឯកជនមួយកន្លែងក្នុងរាជធានីភ្នំពេញ។ រូបគេបានជួបឧបទ្ទវហេតុគ្រោះថ្នាក់ចរាចរណ៍ដោយត្រូវឡានបុក ខណៈរូបគេកំពុងជិះម៉ូតូនៅលើផ្លូវលេខ១៤៣កែងផ្លូវ៣១០ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។ ក្នុងហេតុការណ៍គ្រោះថ្នាក់ចរាចរណ៍កាលពីយប់ថ្ងៃទី២៦ ឈានចូលថ្ងៃទី២៧ ខែមិថុនា ឆ្នាំ២០២០នោះដែរ បានបណ្តាលឲ្យនារីម្នាក់ ដែលជិះម៉ូតូជាមួយ គឹមហេង បានស្លាប់បាត់បង់ជីវិតនៅកន្លែងកើតហេតុ។
ក្រោយមកនៅថ្ងៃទី២៧ ខែមិថុនា ឆ្នាំ២០២០ លោកស្រី កែ សួនសុភី ប្រធានក្លិបវិសាខាបានចេញមកអះអាងថា លោកស្រីនឹងស្វែងរករថយន្តបង្ក ដែលបានបើកបុកកីឡាករ ទៀត គឹមហេង រួមជាមួយយុវតីម្នាក់ហើយរត់។ ប៉ុន្តែមកទល់ពេលនេះ សមត្ថកិច្ចមិនទាន់អាចកំណត់អត្តសញ្ញាណរថយន្ត និងជនបង្កនោះបាននៅឡើយទេ។
សម្រាប់ការប្រកួតក្របខណ្ឌមិត្តហ្វូនខេមបូឌានលីគនៅល្ងាចថ្ងៃទី៥ ខែកក្កដា ឆ្នាំ២០២០ ក្រុមវិសាខាបានចែកគ្នាម្នាក់មួយពិន្ទុជាមួយម្ចាស់ផ្ទះភ្នំពេញក្រោន ក្រោយចប់ការប្រកួត៩០នាទីពួកគេរក្សាលទ្ធផលស្មើ ២-២។ កីឡាករ ស៊ិន សុផាណាត់ និង រ៉ឹង ប៊ុនហៀង ជាអ្នករកគ្រាប់ឲ្យវិសាខា ខណៈគ្រាប់បាល់ភ្នំពេញក្រោនសម្រេចម្នាក់មួយគ្រាន់ដោយកីឡាករ Paulo Victor និង Rafael Adres។
នៅថ្ងៃអាទិត្យនោះដែរ ក្រុមណាហ្គាវើលបានយកឈ្នះសមាគមបាល់ទាត់កងយោធពលខេមរភូមិន្ទក្នុងលទ្ធផល ៤-១។ គ្រាប់បាល់ជ័យជម្នះរបស់ណាហ្គាសម្រេចបានពីរគ្រាប់ដោយ Shane Booysen និងរួមចំណែកម្នាក់១គ្រាប់ពីកីឡាករ គួច ដានី និង Naruse Yuta ខណៈ ណារ៉ុង កក្កដា ជាអ្នករកគ្រាប់បាល់ឲ្យកងយោធពលខេមរភូមិន្ទ។
ដោយឡែក ក្រុមអគ្គិសនីកម្ពុជាបានបញ្ចប់ក្នុងលទ្ធផលស្មើ ២-២ ជាមួយភ្ញៀវអង្គរថាយហ្គឺរ។ គ្រាប់បាល់របស់ម្ចាស់ផ្ទះអគ្គិសនីរកបានដោយកីឡាករ សៀន សុភក្ត្រា និង ឈួត ស៊ុនទៀង ខណៈកីឡាករ តាំង សុភ័ក្ត្រ និង Cristiano Marcolino Santos ជាអ្នកសម្រេចគ្រាប់បាល់ឲ្យអង្គរថាយហ្គឺរ៕