អន្តរជាតិ
កម្លាំងសន្តិសុខជាតិហុងកុងមានសិទ្ធិឃាត់ខ្លួនជនសង្ស័យមិនឲ្យចាកចេញពីហុងកុង លោកស្រីប្រធានប្រតិបត្តិទីក្រុងហុងកុង ការី ឡាំ។ រូបភាព៖ Reuters
× ទីក្រុងហុងកុង បានបញ្ចេញព័ត៌មានលម្អិតបន្ថែមទៀត ជុំវិញអំណាចរបស់កងកម្លាំងសន្តិសុខ ដែលស្ថិតនៅក្រោមច្បាប់សន្តិសុខជាតិហុងកុងថ្មី។ ការបញ្ចេញព័ត៌មាននៅថ្ងៃទី៦ ខែកក្កដា បានបន្ថែមថា កងកម្លាំងសន្តិសុខជាតិ មានសិទ្ធិហាមឃាត់ប្រជាជនមិនឲ្យចាកចេញពីហុងកុង មានអំណាចក្នុងការចូលទៅក្នុងទីកន្លែងណា ដើម្បីស្វែងរកភស្តុតាង និងអាចស្នើឲ្យអង្គការ ឬទីភ្នាក់ងារបរទេសផ្តល់ព័ត៌មានបន្ថែមទាក់ទិននឹងហុងកុង។
តាមរយៈការចុះផ្សាយរបស់ទីភ្នាក់ងារព័ត៌មាន Reuters ទីក្រុងហុងកុង បានបញ្ចេញសេចក្តីលម្អិតបន្ថែមទៀត ដែលទាក់ទងអំណាចរបស់កងកម្លាំងសន្តិសុខហុងកុង ដែលមានចែងនៅក្នុងច្បាប់សន្តិសុខជាតិថ្មី។ នៅក្នុងការលម្អិតបន្ថែមនៃច្បាប់សន្តិសុខជាតិនេះ កម្លាំងសន្តិសុខហុងកុង មានយុត្តាធិការ ក្នុងការចូលទៅកន្លែងណាមួយ ឬស្វែងរកកន្លែងណាមួយ ដើម្បីប្រមូលភស្តុតាង។ បន្ថែមពីលើនេះ កងកម្លាំងមួយនេះ ក៏មានសិទ្ធិរឹតត្បិតជនសង្ស័យ ឬប្រជាជន មិនឲ្យចាកចេញពីហុងកុងផងដែរ។
ទន្ទឹមនេះ ប្រសិនបើចាំបាច់ កងកម្លាំងសន្តិសុខ អាចមានសិទ្ធិរឹបអូសទ្រព្យសម្បត្តិមួយចំនួន ដែលមានទាក់ទងនឹងបទល្មើសប្រឆាំងសន្តិសុខជាតិ និងមានសិទ្ធិស្នើឲ្យអង្គការ និងទីភ្នាក់ងារនយោបាយតៃវ៉ាន់ និងបរទេស ផ្តល់ព័ត៌មានមួយចំនួនជុំវិញបញ្ហាហុងកុង។
ច្បាប់សន្តិសុខជាតិ ដែលបានចូលជាធរមាននៅថ្ងៃទី១ ខែកក្កដា បានហាមឃាត់ពីបទឧក្រិដ្ឋចំនួន ៤ធំៗ គឺ ការធ្វើអបគមន៍ វិទ្ធង្សនា ភេរវកម្ម និងការផ្សំគំនិតជាមួយបរទេស ដើម្បីបំផ្លាញសន្តិសុខជាតិហុងកុង។ បើជនណាហ៊ានប្រព្រឹត្តបទឧក្រិដ្ឋទាំង៤នេះ ជនទាំងនោះ អាចនឹងត្រូវជាប់ពន្ធនាគាររហូតដល់មួយជីវិត ឬជាង ១០ ឬតិចជាង ៣ឆ្នាំ អាស្រ័យលើស្ថានទម្ងន់ទោស។
នាពេលកន្លងមក ច្បាប់សន្តិសុខជាតិហុងកុង បានទទួលរងការរិះគន់យ៉ាងខ្លាំងពីសំណាក់សកម្មជនហុងកុង និងបរទេស បើទោះបីជាមន្ត្រីជាន់ខ្ពស់ចិន និងហុងកុង បានអះអាងថា ច្បាប់ថ្មីនេះ គឺដើម្បីការពារគោលការណ៍ «ប្រទេសមួយ ប្រព័ន្ធពីរ» ស្ថិរភាព និងសិទ្ធិរបស់ប្រជាជនហុងកុង។ អង់គ្លេស ដែលជាអតីតម្ចាស់អាណានិគមហុងកុងក៏បានចេញមុខរិះគន់ដែរ ហើយថែមទាំងព្រមានពីការផ្តល់លិខិតឆ្លងដែនសម្រាប់ជនជាតិចក្រភពអង់គ្លេសនៅបរទេស(British National Overseas) ឲ្យប្រជាជនហុងកុងផងដែរ។ បញ្ហានេះ បានធ្វើឲ្យទីក្រុងប៉េកាំងជំទាស់យ៉ាងខ្លាំង។
សូមបញ្ជាក់ថា ចាប់តាំងពីច្បាប់សន្តិសុខជាតិហុងកុង ចូលជាធរមានមក មនុស្សយ៉ាងហោចណាស់ ១០នាក់ត្រូវបានចាប់ខ្លួន នៅក្រោមច្បាប់ថ្មីនេះ។
© រក្សាសិទ្ធិដោយ thmeythmey.com