WHO ទទួលស្គាល់​ពី​ការកើនឡើង​ភស្តុតាង​បង្ហាញថា COVID-19 អាច​ឆ្លងតាម​ខ្យល់​
COVID-19
អន្តរជាតិ
WHO ទទួលស្គាល់​ពី​ការកើនឡើង​ភស្តុតាង​បង្ហាញថា COVID-19 អាច​ឆ្លងតាម​ខ្យល់​
08, Jul 2020 , 7:19 pm        
រូបភាព
អង្គការសុខភាពពិភពលោក។ រូបភាព​៖ AFP
អង្គការសុខភាពពិភពលោក។ រូបភាព​៖ AFP
​អង្គការ​សុខភាព​ពិភពលោក​(WHO) ទទួលស្គាល់​ភស្តុតាង​ដែល​លើកឡើងថា វីរុស​បង្ក​ជំងឺ COVID-19 អាច​ឆ្លងតាម​ខ្យល់​។ ការទទួលស្គាល់​នេះ​ធ្វើឡើង​បន្ទាប់ពី​ក្រុម​អ្នកវិទ្យាសាស្ត្រ​ទទូច​ឲ្យ​អង្គការ​នេះ កែប្រែ​ការណែនាំ​ស្តីពី​ការឆ្លង​ជំងឺ COVID-19 ពី​មនុស្ស​ទៅ​មនុស្ស​។ ប៉ុន្តែ WHO ក៏​លើកឡើង​ផងដែរ​ថា ភស្តុតាង​ទាំងនោះ ត្រូវ​បន្ត​ប្រមូល និង​បកស្រាយ​បន្ថែមទៀត​។​

 
​ក្នុង​សន្និសីទ​សារព័ត៌មាន នា​ថ្ងៃទី​៧ ខែកក្កដា លោកស្រី Maria Van Kerkhove អ្នកដឹកនាំ​បច្ចេកទេស​លើ​បញ្ហា​ជំងឺ​រាតត្បាត COVID-19 បាន​លើកឡើងថា WHO កំពុងតែ​ពិភាក្សា​ពី​លទ្ធភាព​នៃ​ការចម្លង​ជំងឺ COVID-19 តាមរយៈ​ខ្យល់​ដកដង្ហើម​ដែលមាន​មេរោគ និង​លម្អង​សារធាតុ​រឹង និង​រាវ​ដែល​ចេញពី​អ្នកជំងឺ​។ នេះ​យោងតាម​ទីភ្នាក់ងារ​ព័ត៌មាន Reuters​។​
 
​បន្ថែម​ពីនេះ លោកស្រី Benedetta Allegranzi អ្នកដឹកនាំ​ក្រុមការងារ​បង្ការ និង​គ្រប់គ្រង​ជំងឺឆ្លង​របស់ WHO បាន​លើកឡើងថា គេ​មាន​ភស្តុតាង​ដែល​កំពុង​លេចឡើង​ថា ជំងឺ​COVID-19 ឆ្លងតាម​ខ្យល់​។ ប៉ុន្តែ​ភស្តុតាង​ទាំងនេះ​មិនទាន់​ច្បាស់លាស់ នៅឡើយ​ទេ​។ លោកស្រី អះអាងថា គេ​មិនអាច​មើលរំលង​ឡើយ​ពី​លទ្ធភាព​នៃ​ការឆ្លង​នៅ​ទីកន្លែង​សាធារណៈ​ជាពិសេស​នៅ​កន្លែង​មាន​មនុស្ស​ច្រើន បិទ​ជិត និង​មិនមាន​ខ្យល់​ចេញចូល​គ្រប់គ្រាន់​។ ក៏ប៉ុន្តែ គេ​ត្រូវ​ប្រមូល​ភស្តុតាង និង​យកទៅ​បកស្រាយ ហើយ WHO នឹង​បន្តធ្វើ​រឿងនេះ​។​
 
​ចំណែកឯ​លោកស្រី Van Kerkhove ក៏បាន​អ្នកសារព័ត៌មាន​ដែរ​ថា​ថា នៅ​ប៉ុន្មាន​ថ្ងៃ​ខាងមុខនេះ WHO នឹង​ចេញផ្សាយ​របាយការណ៍​វិទ្យា​សាស្ត្រ​សង្ខេប​ស្តីពី​ចំណេះដឹង​លើ​ការឆ្លង​ជំងឺ COVID-19 ។ ទាក់ទង​នឹង​ការទប់ស្កាត់​ការឆ្លង​វីរុស​នេះដែរ លោកស្រី Van Kerkhove បាន​លើកឡើងថា គេ​ត្រូវការ​វិធានការ​គ្រប់​ជ្រុងជ្រោយ ដោយ​មិន​រាប់បញ្ចូល​ត្រឹម​ការធ្វើ​គម្លាត​សុវត្ថិភាព​ឡើយ តែ​ក៏​បញ្ចូល​ការប្រើប្រាស់​ម៉ាស់​ឲ្យ​បាន​សមរម្យ ជាពិសេស​នៅ​កន្លែង​ដែល​គេ​មិន​អាចធ្វើ​គម្លាត​សុវត្ថិភាព​បាន​។​
 
​ក្នុង​ការណែនាំ​កន្លងមក WHO លើកឡើងថា វីរុស​ផ្លូវដង្ហើម SARS-CoV-2 ដែល​បង្ក​ជំងឺ​ជា COVID-19 រីកសាយ​តាមរយៈ​តំណក់​ទឹកតូចៗ​ដែល​ខ្ទាត​ចេញពី​ច្រមុះ ឬ មាត់​របស់​អ្នក​ឆ្លង​ជំងឺ ហើយ​ដែល​ធ្លាក់ចូល​ទៅក្នុង​ដី​យ៉ាង​ឆាប់រហ័ស​។ ការណែនាំ ក៏​បង្ហាញ​ផងដែរ​ថា ការឆ្លង COVID-19 កើតឡើង​តាមរយៈ​តំណក់ទឹក​ដែល​ចេញពី​ប្រព័ន្ធ​ដកដង្ហើម និង​ការប៉ះពាល់​ផ្ទាល់ និង​មិនផ្ទាល់​ជាមួយ​អ្នកមាន​ជំងឺ​។​
 
​ប៉ុន្តែ ក្នុង​សំបុត្រ​ចំហ​មួយ​ទៅកាន់ WHO នៅ​ថ្ងៃទី​៤ ខែកក្កដា អ្នកវិទ្យាសាស្ត្រ​ចំនួន​២៣៩​រូប មកពី​ប្រទេស​ចំនួន​៣២ មាន​ភស្តុតាង​បង្ហាញថា វីរុស​បង្ក​ជា​ជំងឺ COVID-19 នេះ អាច​អណ្តែត​ក្នុង​ខ្យល់ ហើយ​ចម្លង​ដល់​មនុស្ស​ពេល​ដក​ដង្ហើមចូល​។ ដោយសារតែ​វីរុស​នោះ អាច​បន្ត​នៅក្នុង​ខ្យល់​យ៉ាងយូរ ទើប​ក្រុម​អ្នកវិទ្យាសាស្ត្រ​ទាមទារ​ឲ្យ WHO កែប្រែ​ការណែនាំ​របស់ខ្លួន​៕
 
 
 

Tag:
 WHO
  COVID-19
© រក្សាសិទ្ធិដោយ thmeythmey.com