អន្តរជាតិ
ក្រុមហ៊ុនបណ្តាញសង្គម នាំគ្នាផ្អាកផ្តល់ទិន្ន័យឲ្យអាជ្ញាធរហុងកុង ក្រោយច្បាប់សន្តិសុខចូលជាធរមាន កម្មវិធីបណ្តាញសង្គមល្បីឈ្មោះរបស់ពិភពលោក។ រូបភាព AFP
× ក្រុមហ៊ុនបណ្តាញសង្គម និងបច្ចេកវិទ្យាធំៗ ដូចជា Facebook, Twitter, Microsoft, Google, Zoom, និង TikTok ជាដើម បានសម្រេចផ្អាកមិនពិចារណាលើសំណើសុំទិន្ន័យអ្នកប្រើប្រាស់ ពីអាជ្ញាធរតំបន់ហុងកុង ក្រោយច្បាប់សន្តិសុខចូលជាធរមាន និងចាប់ផ្ដើមអនុវត្តនៅតំបន់រដ្ឋបាលពិសេសមួយនេះ។
នៅថ្ងៃទី៦ ខែកក្កដា ក្រុមហ៊ុន Facebook ដែលគ្រប់គ្រងបណ្តាញសង្គម Instagram និង WhatsApp លើកឡើងក្នុងសេចក្តីថ្លែងការណ៍ថា ខ្លួននឹងព្យួរនូវរាល់សំណើសុំទិន្ន័យទាំងអស់ ដើម្បីវាយតម្លៃច្បាប់សន្តិសុខហុងកុង ទៅលើផលប៉ះពាល់សិទ្ធិមនុស្ស និងការពិភាក្សាជាមួយអ្នកជំនាញសិទ្ធិមនុស្សផងដែរ ។ តាមរយៈអ្នកនាំពាក្យ ក្រុមហ៊ុនហ្វេសប៊ុក បានលើកឡើងថា Facebook ជឿជាក់លើសេរីភាពនៃការបញ្ចេញមតិ ដែលជាមូលដ្ឋាននៃសិទ្ធិមនុស្ស និងគាំទ្រសិទ្ធិក្នុងការបញ្ចេញមតិ ដោយគ្មានភាពភ័យខ្លាច និងផលវិបាក។
ចំណែកឯ Google និង Twitter វិញ ក៏បានព្យួរសំណើសុំទិន្ន័យ ពីអាជ្ញាធរជាបន្ទាន់ដែរ ក្រោយច្បាប់សន្តិសុខជាតិ ចូលជាធរមានកាលពីសប្តាហ៍មុន។ ក្រុមហ៊ុនទាំងពីរ លើកឡើងពីការបារម្ភយ៉ាងធ្ងន់ធ្ងរ ចំពោះការអនុវត្តច្បាប់នេះ។ ក្រុមហ៊ុនទាំង២ បានបញ្ជាក់ដែរថា ខ្លួននឹងមិនអនុវត្តតាមសំណើរបស់អាជ្ញាធរហុងកុង នៅពេលដ៏ខ្លីខាងមុខនេះឡើយ។
ថ្ងៃទី៧ ខែកក្កដា ក្រុមហ៊ុន Microsoft និង Zoom ក៏បានចូលរួមជាមួយក្រុមហ៊ុនបណ្តាញសង្គមដទៃទៀតដែរ ដោយបានផ្អាកមិនទទួលពិចារណាសំណើ ឬផ្តល់ទិន្ន័យអ្វីទាំងអស់ ទៅមន្ត្រី ឬប៉ូលិសហុងកុងឡើយ។ ក្រុមហ៊ុន Zoom បានលើកឡើងថាខ្លួន គាំទ្រការផ្លាស់ប្តូរគំនិត ដោយសេរីនិងបើកចំហ។ មិនតែប៉ុណ្ណោះ Zoom ក៏កំពុងពិនិត្យមើលការវិវត្តស្ថានការណ៍នៅហុងកុង និងរង់ចាំការណែនាំពីរដ្ឋាភិបាលអាមេរិក។
សូមរំឭកបន្តិចថា Tik Tok ដែលជាបណ្តាញសង្គមពេញនិយម និងជាផលិតផលរបស់ក្រុមហ៊ុនចិន ក៏បានសម្រេចដកខ្លួនចេញ ពីទីផ្សារតំបន់ហុងកុងនៅថ្ងៃទី៧ ខែកក្កដាដែរ ដោយពិបាកក្នុងការធ្វើប្រតិបត្តិការក្នុងទីក្រុងនេះ។
ក្រុមហ៊ុនបច្ចេកវិទ្យា និងបណ្តាញសង្គម បាននាំគ្នាមកតាំងទីនៅទីក្រុងហុងកុង ដោយសារតែពុំមានការរឹតត្បិតលើអ៊ីនធឺណិត ដូចនៅចិនដីគោក។ ប៉ុន្តែក្រោមច្បាប់សន្តិសុខថ្មីនេះ ប៉ូលិសហុងកុង នឹងទទួលបានអំណាចបន្ថែម នៅលើបណ្តាញអ៊ីនធឺណិត ដូចជា ការទាមទារឲ្យលុបចោលព័ត៌មាន ដែលចាត់ទុកថាប៉ះពាល់ដល់សន្តិសុខជាតិ។ ការអនុវត្តតាមការណែនាំ អាចនឹងរងពិន័យជាប្រាក់ ឬជាប់ពន្ធនាគារ៕
© រក្សាសិទ្ធិដោយ thmeythmey.com