លោក ចា​ស្ទី​ន ទ្រូ​ដូ ថា កាណាដា​ទប់ទល់ COVID-19 ប្រសើរ​ជាង​អាមេរិក​
COVID-19
អន្តរជាតិ
លោក ចា​ស្ទី​ន ទ្រូ​ដូ ថា កាណាដា​ទប់ទល់ COVID-19 ប្រសើរ​ជាង​អាមេរិក​
09, Jul 2020 , 10:59 am        
រូបភាព
នាយករដ្ឋមន្ត្រីកាណាដា លោក ចាស្ទ្រីន ទ្រូដូ ។ រូបភាព Reuters
នាយករដ្ឋមន្ត្រីកាណាដា លោក ចាស្ទ្រីន ទ្រូដូ ។ រូបភាព Reuters
​កាណាដា ទប់ស្កាត់​ការ​រាលដាល COVID-19 ប្រសើរ​ជាង​ប្រទេស​សម្ព័ន្ធមិត្ត​ខ្លួន​ជាច្រើន​រួមទាំង​​អាមេរិកផងដែរ​។ នាយករដ្ឋមន្ត្រី​កាណាដា ចា​ស្ទី​ន ទ្រូ​ដូ បញ្ជាក់​បែបនេះ នៅ​ថ្ងៃទី ៨ ខែកក្កដា ដែលជា​ការនិយាយ​ត្រង់ៗ​ដ៏​កម្រ​មួយ​ទៅកាន់​អាមេរិក​។

 
​មកទល់ពេលនេះ កាណាដា ដែលមាន​ប្រជាជន​តិចជាង​អាមេរិក​១០​ដង រកឃើញ​ករណី​ឆ្លង COVID-19 សរុប ១០៦ ១៦៧​ករណី និង​ស្លាប់ ៨៧១១​នាក់​។ នាយករដ្ឋមន្ត្រី​កាណាដា លោក ចា​ស្ទី​ន ទ្រូ​ដូ និយាយថា ស្ថានភាព​នេះ​កំពុងមាន​ស្ថិរភាព បើទោះបីជា​កន្លែង​ផ្ទុះ​រាលដាល​ខ្លាំង​ខ្លះ នៅតែមាន​។ 
 
​ផ្ទុយទៅវិញ អាមេរិក បាន​រកឃើញ​ករណី​ឆ្លង​លើស​៣​លាន​ករណី​ហើយ និង​អ្នកស្លាប់ ១៣១ ០០០​នាក់​។ អាជ្ញាធរ​អាមេរិក​បាន​រាយការណ៍​ពី​ការ​ករណី​ឆ្លង​ហក់​ឡើង​ខ្ពស់​ដល់​កម្រិត​អាសន្ន​ក្នុង​រដ្ឋ​ជាច្រើន​ក្នុង​រយៈពេល​ជាង​២​សប្ដាហ៍​ចុងក្រោយ​មកនេះ​។ 
 
​ថ្លែង​ក្នុង​សន្និសីទ​ព័ត៌មាន​មួយ នាយករដ្ឋមន្ត្រី ទ្រូ​ដូ បញ្ជាក់​ដូច្នេះ​ថា​៖«​យើង​អាច​គ្រប់គ្រង​វីរុស​នេះ​ប្រសើរ​ជាង​ប្រទេស​សម្ព័ន្ធមិត្ត​ជាច្រើន ជាពិសេស រួមទាំង ប្រទេសជិតខាង​យើង ផងដែរ​»​។ លោក​បន្តថា នេះ​នឹង​ជួយ​ដល់​កិច្ចប្រឹងប្រែង​ដើម្បី​បើក​សេដ្ឋកិច្ច​ឡើងវិញ​។ នេះ​បើតាម​ការចុះផ្សាយ​របស់​ទីភ្នាកងារ​ព័ត៌មាន Reuters ។​
 
​ចាប់តាំងពី​ខែមីនា កាណាដា និង​សហរដ្ឋអាមេរិក បាន​ហាមឃាត់​ការធ្វើដំណើរ​ដែល​មិនចាំបាច់​រវាង​ប្រទេស​ទាំងពីរ ហើយ​កំពុង​ពិភាក្សា​ថា តើ​គួរ​ពន្យារពេល​បម្រាម​នេះ​បន្ត ឬ​យ៉ាងណា នៅពេល​អស់​សុពលភាព នា​ថ្ងៃទី​២១ ខែកក្កដា ខាងមុខ​។ ក្នុង​ការស្ទង់មតិ​មួយ​នៅ​សប្តាហ៍​នេះ ដែល​ដកស្រង់​ចុះផ្សាយ​ដោយសារ​ព័ត៌មាន The Guardian ប្រជាជន​កាណាដា​ជាង​៨០​ភាគរយ បាន​និយាយថា ច្រកព្រំដែន​ជាមួយ​អាមេរិក គួរ​បន្ត​បិទ​សម្រាប់​អ្នកដំណើរ​។ 
 
​ថ្លែង​ក្នុង​សន្និសីទ​ដាច់ដោយឡែក​មួយ អនុប្រធាន​ផ្នែក​សុខភាព​សាធារណៈ​កាណាដា លោក Howard Njoo និយាយថា ការ​រាលដាល COVID-19 គឺ​ស្ថិតក្រោម​ការគ្រប់គ្រង​មួយផ្នែកធំ តែ​លោក​សង្កត់ធ្ងន់ថា វិធានការ​ទប់ស្កាត់​ដូចជា ការធ្វើ​ច​ត្តា​ឡី​ស័ក និង​តាមរក នឹង​នៅតែមាន​សារសំខាន់​។  លោក​ថា​៖«​ប្រសិនបើ​យើង​បន្ធូរបន្ថយ​ច្រើន ឬ​លឿន​ពេក ជំងឺ​រាតត្បាត​នេះ នឹង​ផ្ទុះ​ឡើងវិញ​ជាថ្មី​»​។​
 
​ទោះបីជា​ទំនាក់ទំនង​របស់លោក ទ្រូ​ដូ ជាមួយ​ប្រធានាធិបតី​អាមេរិក ដូ​ណា​ល់ ត្រាំ មាន​លក្ខណៈ​ល្អ​ក្នុងពេល​ជាង​១៨​ខែ​កន្លងទៅនេះ ប្រមុខ​រដ្ឋាភិបាល​ក្រុង​អូ​តា​វ៉ា​រូបនេះ​បានសម្រេច​មិន​ចូលរួម​កិច្ចប្រជុំ​ពាណិជ្ជកម្ម​មួយ​ជាមួយ​លោក ត្រាំ កាលពី​ថ្ងៃទី​៨ ខែកក្កដា ។ លោក ទ្រូ​ដូ បន្ត​លើក​កង្វល់​ពាក់ព័ន្ធ​លទ្ធភាព​ដាក់​ពន្ធ​របស់​អាមេរិក​លើ​ការនាំចេញ​អាលុយមីញ៉ូម​កាណាដា​ផងដែរ​៕
 

Tag:
 កាណាដា​
  សហរដ្ឋអាមេរិក​
  ចា​ស្ទី​ន ទ្រូ​ដូ​
© រក្សាសិទ្ធិដោយ thmeythmey.com