ជាតិ
រថយន្ត
សេដ្ឋកិច្ច
កម្ពុជានឹងចេញបណ្ណបើកបរអន្តរជាតិសម្រាប់ពលរដ្ឋយកប្រើប្រាស់នៅក្រៅប្រទេស
× ភ្នំពេញ៖ ក្រសួងសាធារណការ និងដឹកជញ្ជូន នឹងចេញប័ណ្ណបើកបរអន្តរជាតិឱ្យប្រជាពលរដ្ឋខ្មែរ យកទៅប្រើប្រាស់នៅក្រៅប្រទេស។ នេះបើតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។
លោក ស៊ុន ចាន់ថុល បានបញ្ជាក់ថា ការចេញប័ណ្ណបើកបរអន្តរជាតិនេះ ដើម្បីផ្ដល់ភាពងាយស្រួលឱ្យពលរដ្ឋខ្មែរ យកទៅប្រើប្រាស់ក្នុងការបើកបរយានយន្តនៅតាមបណ្ដាប្រទេសនានាបាន ។ ក្រសួងនឹងដំណើរការចេញប័ណ្ណបើកបរអន្តរជាតិនេះ នៅខែសីហាខាងមុខ។
ថ្លែងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ ឆ្នាំ២០២០ កាលពីថ្ងៃទី៧ កក្កដា រដ្ឋមន្ត្រីក្រសួងសាធារណការរូបនេះ បានបញ្ជាក់ដូច្នេះថា៖ «ក្រសួងនឹងចាប់ផ្តើមចេញប័ណ្ណបើកបរអន្តរជាតិ ដោយសារតែពេលយើងទៅដល់ប្រទេសគេ បើកឡានមិនបាន មានប័ណ្ណបើកបរខ្មែរបើកមិនបាន ដូចនេះយើងជាសមាជិកអង្គការសហប្រជាជាតិដែរ អ៊ីចឹង យើងអាចចេញបណ្ណបើកបរអន្តរជាតិ ជូនបងប្អូនប្រជាពលរដ្ឋដែលមាន ប័ណ្ណបើកបរ ហើយយកមកដូរសុំធ្វើប័ណ្ណបើកបរបណ្តោះអាសន្នសិនប៉ុន្មានខែចឹងទៅ យើងអាចចេញជូនពួកគាត់បាន»។
ប័ណ្ណបើកបរអន្តរជាតិនេះ ក៏មានតាមប្រភេទរថយន្តផងដែរ ក្នុងនោះមានប្រភេទ A, B, C ជាដើម។ លោក ស៊ុន ចាន់ថុល បានបញ្ជាក់ដូច្នេះថា៖«យើងបោះត្រាតាមប្រភេទដែលគាត់ស្នើសុំ បើគាត់ឡានទេសចរណ៍ ប្រភេទនឹងគឺបោះត្រាទៅលើរូបថត ហើយបោះត្រាលើប្រភេទនឹងតែម្តង អ៊ីចឹងខែក្រោយអាចដំណើរការបាន»។
បច្ចុប្បន្នការិយាល័យផ្ដល់សេវាប័ណ្ណបើកបរ ដែលស្ថិតនៅក្រោមចំណុះក្រសួងសាធារណការ និងដឹកជញ្ជូន មាន២ទីតាំង គឺស្ថិតនៅផ្សារទំនើបអ៊ីអន១ និងអ៊ីអន២។ក្រសួងសាធារណការ កំពុងត្រៀមរៀបចំសេវាផ្ដល់ប័ណ្ណបើកបរ ២ទីតាំងទៀតផងដែរ ដើម្បីផ្តល់ភាពកាន់តែងាយស្រួលសម្រាប់ពលរដ្ឋ ក្នុងការមកប្តូរប័ណ្ណបើកបរ។ ទីតាំងដែលក្រសួងសិក្សានោះ គឺនៅផ្សារទំនើបនូរ៉ូម៉ល របស់ក្រុមហ៊ុន ជីប ម៉ុង និងម៉ល ជីប ម៉ុង សែនសុខ៕
Tag:
ប័ណ្ណបើកបរ
ស៊ុន ចាន់ថុល
© រក្សាសិទ្ធិដោយ thmeythmey.com