កីឡាអន្តរជាតិ
អន្តរជាតិ
EPL៖ Chelsea ដណ្តើមបានលេខ៣ពី Leicester ឯ Sheffield កើនពិន្ទុប្រជែងកៅអីអឺរ៉ុប
×![]()
ដោយ: ទេព ពិទូរ្យ
Leicester City បានធ្លាក់ទៅចំណាត់ថ្នាក់ទី៤វិញ ក្រោយពួកគេប្រកួតស្មើជាមួយ Arsenal ក្នុងលទ្ធផល ១-១ នាជំនួបក្របខណ្ឌ Premier League នៅយប់ថ្ងៃទី៨ ខែកក្កដា។ Chelsea ដែលទទួលបាន៣ពិន្ទុបន្ថែមតាមរយៈការយកឈ្នះ Crystal Palace ៣-២ ដណ្តើមបានចំណាត់ថ្នាក់ទី៣ ពី Leicester។ Chelsea, Leicester និង Manchester United កំពុងប្រជែងគ្នាខ្លាំងក្នុងការដណ្តើមយកកៅអី Champions League រដូវកាលក្រោយ។
លទ្ធផលស្មើក្នុងការប្រកួតសប្តាហ៍ទី៣៤ បានធ្វើឲ្យក្រុមរហស្សនាមកញ្ជ្រោង ធ្លាក់ទៅកាន់លេខរៀងទី៤ ដោយទទួលបាន៥៩ពិន្ទុ គៀកនឹងក្រុមលេខ៥ Man Utd ដែលមាន៥៥ពិន្ទុ តែទើបប្រកួតបាន៣៣លើក។ Chelsea កើនដល់៦០ពិន្ទុ ឡើងទៅឈរលេខរៀងទី៣ ក្នុងតារាងលីគកំពូលអង់គ្លេសបណ្តោះអាសន្ន។
ស្របពេលក្រុមតោខៀវ Chelsea, Leicester និង Man Utd កំពុងប្រដេញគ្នាសម្រាប់តំណែង Top 4 រៀងៗខ្លួន Manchester City បានបន្តនៅតំបន់សុវត្ថិភាពសម្រាប់កៅអីក្របខណ្ឌកំពូលអឺរ៉ុបរដូវកាលក្រោយទៅហើយ បន្ទាប់ពីលត់ក្រុម Newcastle United ចាស់ដៃ ៥-០។ ក្រុមមេឃខៀវមាន៦៩ពិន្ទុ ឈរចំណាត់ថ្នាក់ទី២ ដោយនាំមុខក្រុមលេខ៣ ចំនួន៩ពិន្ទុ។
Wolverhampton Wanderers, Sheffield United និង Arsenal ក៏ជាក្រុមចូលរួមប្រជែងកៅអឺរ៉ុបនេះផងដែរ បើទោះក្រុមទាំងបីហាក់មានពិន្ទុឆ្ងាយបន្តិចពីក្រុមលេខរៀងទី៥ក៏ដោយ។ Sheffield United បានយកឈ្នះ Wolves ១-០ ដើម្បីឡើងទៅឈរចំណាត់ថ្នាក់ទី៧។
Wolves រកបាន៥២ពិន្ទុ Sheffield United មាន៥១ពិន្ទុ និង Arsenal មាន៥០ពិន្ទុ ក្រោយឆ្លងកាត់ការប្រកួត៣៤លើក ខណៈការប្រកួតនៅសល់ចំនួន៤លើកទៀត នឹងត្រូវបញ្ចប់រដូវកាល ២០១៩-២០នេះ។
ដោយឡែក Norwich City ដែលប្រកួតចាញ់ Watford ២-១ បានធ្វើឲ្យក្រុមស្ថិតនៅបាតតារាងមួយនេះ កាន់តែលែងមានឱកាសដើម្បីគេចផុតពីការកាត់ចោលទៅលីគទី២រដូវកាលក្រោយ។ Norwich រកបានតែ២១ពិន្ទុប៉ុណ្ណោះពីការប្រកួត៣៤លើក។ Watford ដែលរកបាន៣ពិន្ទុបន្ថែម នៅតែស្ថិតនៅចំណាត់ថ្នាក់ទី១៧ដដែល ប៉ុន្តែមានគម្លាតពិន្ទុនាំមុខក្រុមនៅទីតាំងត្រូវកាត់ចោល Aston Villa ចំនួន៤ពិន្ទុ។ Aston Villa ដែលនៅសល់១ប្រកួតក្នុងដៃ នឹងត្រូវតតាំងជាមួយក្រុមខ្លាំងបិសាចក្រហមដែលត្រូវការឈ្នះជាចាំបាច់សម្រាប់ជំនួបសប្តាហ៍ទី៣៤ នៅរាត្រីថ្ងៃទី៩ ខែកក្កដា។
West Ham United ក៏មិនទាន់អាចធានាបានថា គេចផុតការចាត់ចោលដែរ ក្រោយពួកគេចាញ់ Burnley ១-០ រួចមក។ West Ham ស្ថិតនៅលេខរៀងទី១៦ដដែល តែមាន៣១ពិន្ទុស្មើគ្នាជាមួយ Watford ស្របពេលក្រុមទាំងពីរនេះ រួមទាំង Aston Villa និង AFC Bournemouth ដែលមាន២៧ពិន្ទុដូចគ្នា ត្រូវប្រជែងគ្នាខ្លាំងដើម្បីបានសិទ្ធិលេងនៅក្របខណ្ឌកំពូលនៅរដូវកាលថ្មីទៀត។
សម្រាប់ Burnley វិញ បន្ទាប់ពីរកបាន៣ពិន្ទុបន្ថែម ដែលកើនដល៤៩ពិន្ទុ បានធ្វើឲ្យក្រុមនេះអាចដំឡើងខ្លួនទៅប្រកៀកនឹងក្រុមដែលត្រូវប្រជែងគ្នាយកកៅអី Europa League ផងដែរ៕
Tag:
Premier League
© រក្សាសិទ្ធិដោយ thmeythmey.com
