«​សីតុណ្ហភាព​ពិភពលោក​»​បន្ត​កើនឡើង រារាំង​ការដោះស្រាយ​វិបត្តិ​ប្រែប្រួល​អាកាសធាតុ
អន្តរជាតិ
«​សីតុណ្ហភាព​ពិភពលោក​»​បន្ត​កើនឡើង រារាំង​ការដោះស្រាយ​វិបត្តិ​ប្រែប្រួល​អាកាសធាតុ
10, Jul 2020 , 8:29 am        
រូបភាព
​អង្គការ​ឧតុនិយម​ពិភពលោក​(World Meteorological Organization) បាន​ព្យាករ​ថា​សីតុណ្ហភាព​ពិភពលោក នឹង​បន្ត​កើនឡើង​នៅក្នុង​រយៈពេល​៥​ឆ្នាំ​ខាងមុខ​។ វា​បង្ហាញថា ពិភពលោក​ទាំងមូល​ប្រឈម​ការលំបាក​កាន់តែខ្លាំង​ក្នុងការ​ដោះស្រាយ​វិបត្តិ​ប្រែប្រួល​អាកាសធាតុ​សាកល​ដោយ​ជោគជ័យ​។

 
​សីតុណ្ហភាព​ពិភពលោក​នឹង​បន្ត​កើនឡើង ហើយ​អាច​កើន​លើស ១ អង្សា ធៀប​នឹង​សីតុណ្ហភាព​មុន​សម័យ​ក្នុង​រយៈពេល​ប្រាំ​ឆ្នាំ​ខាងមុខ​។ នេះ​ជាការ​វាយតម្លៃ​ក្នុង​របាយការណ៍​សិក្សា​ថ្មី​មួយ​របស់​អង្គការ​ឧតុនិយម​ពិភពលោក​ដែល​ចេញផ្សាយ​ថ្ងៃ ៨ ខែកក្កដា​។ 
 
​របាយការណ៍​វិទ្យាសាស្ត្រ​នេះ​បាន​បង្ហាញថា  វា​មានឱកាស ២០​ភាគរយ ដែល​សីតុណ្ហភាព​អាច​នឹង​បន្ត​ឡើង​ចុះ ចន្លោះ​ពី​ឆ្នាំ​២០២០ ទៅ​ឆ្នាំ​២០២៤ ហើយ​ឆ្នាំ​ខ្លះ​សីតុណ្ហភាព​នេះ​អាច​នឹង​កើនឡើង​ដល់​លើស ១,៥​អង្សា​ថែមទៀត​ក៏មាន​។ ដោយសារ​ក្នុង​ឆ្នាំ​នីមួយៗ សីតុណ្ហភាព​កើន​ឡើងជា​ញឹកញាប់  វា​នឹង​បង្ក​ផលប៉ះពាល់​ច្រើន​ដល់​តំបន់​ទាំងអស់​នៅក្នុង​ពិភពលោក​ផង​។​
 
​យ៉ាងណា​ក៏ដោយចុះ ការកើនឡើង​សីតុណ្ហភាព​សកល​នេះ ពុំ​មានន័យថា សីតុណ្ហភាព​នេះ​នឹង​កើន​ហួស​កម្រិត ១,៥​អង្សា​ជា​អចិន្ត្រយ៍​ឡើយ​។ វា​គ្រាន់​មានន័យថា ការបន្ត​កើន​កំដៅ​នេះ​នៅតែ​បន្ត​កើតឡើង  ហើយ​ជា​លទ្ធផល ប្រទេស​ទាំងអស់​ជា​សមាជិក​នឹង​កាន់តែ​ជួប​ឧស​គ្គ​ច្រើន ក្នុងការ​អនុវត្ត​កិច្ចព្រមព្រៀង​អាកាសធាតុ​ទីក្រុង​ប៉ារីស​ឆ្នាំ​២០១៥​ដែរ​។  
 
​កិច្ចព្រមព្រៀង​អាកាសធាតុ​ជា​ប្រវត្តិសាស្ត្រ​នេះ មាន​គោលដៅ​ចម្បង​ទប់ស្កាត់​ការកើនឡើង​សីតុណ្ហភាព​មិន​ឲ្យ​លើស ២​អង្សា តាមរយៈ​ការកម្រិត​ការបញ្ចេញ​ឧស្ម័ន​កាបូ​និ​ច​ដែលជា​ដើមហេតុ​ចម្បង​ធ្វើ​ឲ្យ​កើន​កម្តៅ​ផែនដី​ដែរ​។ 
 
​របាយការណ៍​ដដែល​នេះ​បង្ហាញថា បច្ចុប្បន្ននេះ និន្នាការ​សកល​ជំរុញ​ឲ្យ​សីតុណ្ហភាព​ពិភពលោក​កើនឡើង​ប្រហែល ១,២​អង្សា​ជា​មធ្យម ធៀប​ទៅនឹង​សីតុណ្ហភាព​មុន​បដិវត្តន៍​ឧស្សាហកម្ម​។ នេះ​យោងតាម​លោក Michael Mann អ្នកជំនាញ​អាកាសធាតុ​នៅ​សាកលវិទ្យាល័យ​Penn State​។​
 
​អ្នក​វិ​ទ្យ​សាស្ត្រ​រូបនេះ​បាន​បញ្ជាក់ថា ពិភពលោក​ឥឡូវនេះ​កំពុងស្ថិត​ក្នុង​ចំណុចកណ្តាល​នៃ​ចំណុច​ឡើង​ចុះ​នៃ​សីតុណ្ហភាព​សកល ដែលជា​មធ្យម​មាន​កម្រិត ១,៤ អង្សា​ធៀប​នឹង​មុន​សម័យ​បដិវត្តន៍​ឧស្សាហកម្ម​។​
 
​លោក​បន្ថែមថា​៖« យើង​មិន​រំពឹងថា ការកើនឡើង​កម្ដៅ​នេះ នឹង​បន្ត​ទៅមុខ​ឡើយ​។ យើង​រំពឹងថា សីតុណ្ហភាព​នឹង​ធ្លាក់​ចុះមក​ស្មើ ឬ​ដល់​ក្រោម​និន្នាការ​បច្ចុប្បន្ន​ក្នុង​រយៈពេល​ប៉ុន្មាន​ឆ្នាំ​ខាងមុខ​ផង​»​។​
 
​ជុំវិញ ផលប៉ះពាល់​ដែល​អាច​បង្កដោយ​ការប្រែប្រួល​អាកា​ធាតុ​នេះ នៅ​ឆ្នាំ​២០២៤ គេ​ព្យាករ​ថា តំបន់​អាហ្វ្រិក​ខាងត្បូង និង​អូស្ត្រាលី ដែល​តែងតែមាន​ករណី​ភ្លើង​ឆេះ​ព្រៃ​ទ្រង់ទ្រាយ​ធំ នឹង​កាន់តែ​ក្តៅ​ស្ងួត​ខ្លាំង​។ ផ្ទុយទៅវិញ​តំបន់​សា​ហែល នៃ​ទ្វី​អាហ្វ្រិក នឹងមាន​សំណើម​ច្រើនជាង​មុន​។ ចំណែកឯ តំបន់​អឺរ៉ុប​នឹង​ជួប​បាតុភូតធម្មជាតិ​ដូចជា ខ្យល់ព្យុះ​កាន់តែច្រើន ហើយ​តំបន់​អា​ត្ល​ង់​តិច​ខាងជើង​នឹង​ប្រឈម​ការកើនឡើង​នៃ​កម្លាំង​ខ្យល់​បក់ ដែល​អាចជា​ហេតុ​នាំ​ឲ្យ​កើន​មាន​ខ្យល់ព្យុះ​ច្រើន​នៅ​តំបន់​អឺរ៉ុប​ផង​៕

Tag:
 ការប្រែប្រួល​អាកាសធាតុ​
  សីតុណ្ហភាព​ពិភពលោក
© រក្សាសិទ្ធិដោយ thmeythmey.com