ជាតិ
នយោបាយជាតិ
លោក សួន សេរីរដ្ឋា ត្រូវបានតែងតាំងជារដ្ឋលេខាធិការក្រសួងអភិវឌ្ឍន៍ជនបទ
× លោក សួន សេរីរដ្ឋា អតីតប្រធានគណបក្សអំណាចពលរដ្ឋខ្មែរ ត្រូវបានតែងតាំងមុខតំណែងជារដ្ឋលេខាធិការក្រសួងអភិវឌ្ឍន៍ជនបទ តាមរយៈព្រះរាជក្រឹត្យមួយចុះកាលពីថ្ងៃទី៩ ខែកក្កដា ឆ្នាំ២០២០។ លោកបានអះអាងប្រាប់សារព័ត៌មានថ្មីៗ លោកទើបតែទទួលបានព្រះរាជក្រឹត្យនេះផងដែរ។
លោក សួន សេរីរដ្ឋា អាយុ៤៦ឆ្នាំ ធ្លាប់ត្រូវបានតុលាការផ្តន្ទាទោសឲ្យជាប់ពន្ធនាគារ៥ឆ្នាំ និងពិន័យជាប្រាក់១០លានរៀល ពីបទញុះញង់កុំឲ្យយោធិន ស្តាប់បង្គាប់មេដឹកនាំ ធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមអំណាចសាលដីកាលេខ ១៤៩ ចុះថ្ងៃទី១៨ ខែ ០៥ ឆ្នាំ២០១៨ របស់តុលាការកំពូល»។
កាលពីថ្ងៃទី២៣ ខែសីហា ព្រះករុណា ព្រះមហាក្សត្រ បានចេញព្រះរាជក្រឹត្យមួយ ត្រាស់បង្គាប់ឲ្យលើកលែងទោស អតីតប្រធានគណបក្សអំណាចពលរដ្ឋខ្មែរ រូបនេះ។
«សុបិន្តរបស់ខ្ញុំដែលចេញធ្វើនយោបាយ គឺដើម្បីជួយពលរដ្ឋ ពិសេសកសិករដែលរស់ដោយសារដីស្រែចម្ការ ។ ខ្ញុំធ្លាប់និយាយប្រាប់កសិករថា យើងជាកសិករមិនមែនជាអ្នកក្រទេ តែគឺជាមហាសេដ្ឋី ព្រោះយើងមានដីស្រែ ដីចម្ការធំ ដែលគ្នាអ្នកទីក្រុងខ្លះមួយគ្រួសារមានកម្មសិទ្ធិដី តែ១០០ ការ៉េ សង់ផ្ទះមួយល្វែងប៉ុណ្ណោះ»។ នេះជាការលើកឡើងរបស់លោក សួន សេរីរដ្ឋា។
ទាក់ទងនឹងតំណែងជារដ្ឋលេខាធិការក្រសួងអភិវឌ្ឍន៍ជនបទ លោកបានបញ្ជាក់ថា លោកមានពេល និងមានឱកាសទៅជួយកសិករអ្នកស្រែ អ្នកចម្ការវិញ។ «ខ្ញុំ ជាកូនអ្នកស្រែ ! ខ្ញុំ បានរៀន បានធ្វើដល់ទីក្រុង បានចេញទៅរៀន និងធ្វើការនៅបរទេស ហើយបានវិលមកជួយស្រុកកំណើតវិញ គឺបានគុណដីស្រែ»៕
© រក្សាសិទ្ធិដោយ thmeythmey.com