សង្គមអន្តរជាតិ
អន្តរជាតិ
អាមេរិក បើកភ្លើងបៃតងលក់យន្តហោះចម្បាំង F-35 ជាង១០០គ្រឿងឲ្យជប៉ុន យន្តហោះចម្បាំង F-35B លើនាវាដឹកយន្តហោះ USS Essex (AFP)
× ក្រសួងការបរទេសអាមេរិក បានអនុម័តគម្រោងទិញយន្តហោះចម្បាំងស៊េរី F-35 របស់ក្រុមហ៊ុន Lockheed Martin ពីសំណាក់ជប៉ុនសរុប១០៥គ្រឿង ដែលប៉ាន់ស្មានថាតម្លៃ២៣ពាន់លានដុល្លារ។ ទីក្រុងតូក្យូ នឹងក្លាយជាអតិថិជនបរទេសធំបំផុតរបស់យន្តហោះចម្បាំងទំនើបមួយប្រភេទនេះ។
«វាសំខាន់ណាស់សម្រាប់ប្រយោជន៍ជាតិអាមេរិកក្នុងការជួយជ្រោមជ្រែងជប៉ុនអភិវឌ្ឍ និងរក្សាសមត្ថភាពស្វ័យការពារប្រកបដោយប្រសិទ្ធភាពនិងខ្លាំងក្លា»។ ក្រសួងការបរទេសអាមេរិក សរសេរបែបនេះក្នុងសេចក្តីថ្លែងការណ៍ នៅថ្ងៃទី៩ ខែកក្កដាដែលប្រកាសពីគម្រោងទិញលក់ ដោយបន្ថែមថា ផែនការលក់សព្វាវុធនេះ នឹងពុំផ្លាស់ប្ដូរតុល្យភាពយោធាក្នុងតំបន់ឡើយ។
ក្នុងសេចក្តីថ្លែងការណ៍ ដែលដកស្រង់ចុះផ្សាយដោយទីភ្នាក់ងារព័ត៌មាន Reuters ក្រសួងការបរទេសអាមេរិក បញ្ជាក់ទៀតថា រដ្ឋាភិបាលជប៉ុន បានស្នើទិញយន្តហោះចម្បាំង F-35A ចំនួន ៦៣គ្រឿង និងយន្តហោះចម្បាំង F-35B ចំនួន ៤២ គ្រឿង, ម៉ាស៊ីនយន្តហោះ Pratt and Whitney F135 ចំនួន ១១០គ្រឿង ព្រមទាំងសម្ភារយោធាពាក់ព័ន្ធផ្សេងទៀត ។ ការអនុវត្តគម្រោងលក់យន្តហោះសម្រាប់ជប៉ុននេះ ដែលរាប់បញ្ចូលទាំងការហ្វឹកហាត់ និងការគាំទ្របច្ចេកទេស នឹងចំណាយពេលរហូតដល់២៥ឆ្នាំ។
តាមការចុះផ្សាយរបស់សារព័ត៌មាន Defense News ទីភ្នាក់ងារកិច្ចសហប្រតិបត្តិការសន្តិសុខផ្នែកការពារជាតិនៃក្រសួងការបរទេសអាមេរិក បានផ្ដល់ដំណឹងនៃផែនការលក់យន្តហោះដែលគិតជាទឹកប្រាក់២៣ពាន់លានដុល្លារនេះទៅកាន់សភា ។ យ៉ាងណា តម្លៃអាចប្រែប្រួលខ្លះ អំឡុងពេលការចរចារវាងរដ្ឋាភិបាលនិងក្រុមហ៊ុនឯកជនផលិតយន្តហោះ Lockheed Martin ដែលមានរោងចក្រផលិតនៅរដ្ឋ Texas ។ ការចរចា នឹងចាប់ផ្ដើម ក្រោយសភាអនុម័តគម្រោងលក់។
ប្រសិនបើគ្មានអ្វីប្រែប្រួលទេនោះ ជប៉ុន នឹងក្លាយជាប្រទេសប្រើយន្តហោះចម្បាំង F-35 ធំបំផុតលំដាប់ទី២ ក្រោយតែសហរដ្ឋអាមេរិកមួយប៉ុណ្ណោះ ហើយក៏ជាអតិថិជនបរទេសធំបំផុតរបស់យន្តហោះចម្បាំងទំនើបផុតលេខមួយនេះផងដែរ។
មែនទែនទៅ ជប៉ុន គឺជាប្រទេសមួយក្នុងចំណោមប្រទេសតិចតួចប៉ុណ្ណោះ ក្នុងនោះ អ៊ីស្រាអែល ដែលជាម្ចាស់យន្តហោះចម្បាំង F-35 ដ៏ទំនើបរបស់សហរដ្ឋអាមេរិក។ កាលពីខែមេសា ឆ្នាំ២០១៩ កងទ័ពជើងអាកាសជប៉ុន ធ្លាប់បានអះអាងពីករណីបាត់ដានយន្តហោះ F-35A មួយគ្រឿង អំឡុងពេលហោះហើរចេញពីមូលដ្ឋានទ័ពអាកាស Misawa ជាមួយយន្តហោះចម្បាំង F-35A ៣គ្រឿងទៀត៕
Tag:
សហរដ្ឋអាមេរិក
F-35
ជប៉ុន
ការពារជាតិ
© រក្សាសិទ្ធិដោយ thmeythmey.com