អន្តរជាតិ
ទឹកជំនន់នៅប្រទេសចិន។ រូបភាព Xinhua
×![]()
ដោយ: ធៀន ភារិន្ទ
ក្រុងចំនួន៤ របស់ចិន ដែលស្ថិតនៅតាមបណ្តោយទន្លេ យ៉ង់សេ(Yangtze) បានប្រកាសអាសន្នទឹកជំនន់កម្រិតខ្ពស់ បន្ទាប់ពីមានភ្លៀងធ្លាក់ខ្លាំង ដែលបណ្ដាលបាក់ដីនៅតំបន់មួយចំនួន ហើយទឹកជំនន់លិចផ្លូវ និងដីស្រែចំការ។ គ្រោះធម្មជាតិមួយនេះ បានបង្កឲ្យមនុស្សយ៉ាងហោចណាស់ ១៤០នាក់ស្លាប់ និងបាត់ខ្លួន។ នេះបើតាមការចុះផ្សាយរបស់ទូរទស្សន៍ចិនCCTV នៅថ្ងៃទី១០ ខែកក្កដា។ 
ក្រុង Xianning, ក្រុងJingzhou នៅក្នុងខេត្តហ៊ូប៉ី និងក្រុង Nanchang និងក្រុង Shangrao នៅក្នុងខេត្តជាំងស៊ី ដែលស្ថិតនៅតាមបណ្តោយទន្លេYangtze បានប្រកាស «អាសន្នទឹកជំនន់ក្នុងកម្រិតក្រហម»។ ទឹកជំនន់នេះ គឺបង្កដោយកម្រិតទឹកភ្លៀងធ្លាក់ខ្លាំង ខុសពីសព្វដង។
តាមការចុះផ្សាយរបស់ទូរទស្សន៍រដ្ឋចិនCCTV ប្រជាជនយ៉ាងហោចណាស់១៤០នាក់ បានស្លាប់ និងបាត់ខ្លួនដោយសារតែគ្រោះធម្មជាតិនេះ ដែលបានធ្វើឲ្យខូចខាតទ្រព្យសម្បត្តិ និងសេដ្ឋកិច្ចចិនប្រមាណជា៨,៦ពាន់លានដុល្លារ។ ទឹកភ្លៀង ដែលបានបង្កឲ្យមានការជន់លិចនៅក្នុងប្រទេសចិននេះ គឺកើតចេញពីរំហួតទឹកសមុទ្រ មកពីសមុទ្រចិនខាងត្បូង និងមហាសមុទ្រឥណ្ឌា។
បើតាមការបញ្ជាក់របស់រដ្ឋបាលឧត្តុនិយមចិន នៅក្នុងខែមិថុនា ចិនមានភ្លៀងធ្លាក់រហូតដល់ចំនួន ១៣,៥ភាគរយ ខ្ពស់ជាង ភ្លៀងធ្លាក់នៅក្នុងរវដូវវស្សា។ ប៉ុន្តែនេះ មិនទាន់ស្ថិតដល់កម្រិតទឹកភ្ញៀងធ្លាក់ខ្ពស់បំផុតឡើយ។ ចាប់តាំងពីឆ្នាំ ១៩៦១មក ចិនមានកម្រិតទឹកភ្លៀងធ្លាក់ ខ្ពស់ជាងភ្លៀងធ្លាក់នៅក្នុងរវដូវវស្សា រហូតដល់ ២០ភាគរយឯណោះ។
ទឹកជំនន់ នឹងកាន់តែបង្កឲ្យមានគ្រោះថ្នាក់ និងធំឡើងដោយសារតែសកម្មភាពរបស់មនុស្ស។ លោក Ma Jun នាយកវិទ្យាស្ថានសាធារណៈ និងកិច្ចការបរិស្ថាន បានលើកឡើងថា ទឹកជំនន់ភាគច្រើន គឺបង្កដោយសារការអភិវឌ្ឍហួសហេតុពេក នៅលើតំបន់ទំនាបក្បែរទន្លេ ដែលជាតំបន់ទឹកលិច។ លើសពីនេះ លោក Ma បានបន្ថែមថា ការកាប់បំផ្លាញព្រៃឈើ ការកាន់កាប់ដីលិចទឹក ការកសាងវារីអគ្គីសនី ក៏ជាមូលហេតុ ដែលបណ្តាលឲ្យមានទឹកជំនន់ផងដែរ។
តាមការសិក្សារបស់អ្នកស្រាវជ្រាវនៅក្នុងក្រុង Nanjing គិតចាប់ពីឆ្នាំ២០០៦ ដល់២០១៨ ទឹកជំនន់ បានបំផ្លាញទ្រព្យសម្បត្តិ និងសេដ្ឋកិច្ចចិនប្រមាណជា ២៥,៣ពាន់លានដុល្លារ។ ចំនួនទឹកប្រាក់នេះ គឺកើនឡើងជិត ១ភាគ៣ នៃការខូតខាតសេដ្ឋកិច្ចពីឆ្នាំ១៩៨៤ រហូតដល់២០១៨ បើគិតជាមធ្យមប្រចាំឆ្នាំ ៕
Tag:
ចិន
© រក្សាសិទ្ធិដោយ thmeythmey.com
