ក្រសួងអប់រំ នឹងប្រើវិធានការវះកាត់លើសហព័ន្ធ ដើម្បីផ្តល់ឱកាសឲ្យអ្នកមានសមត្ថភាព

កីឡាជាតិ

ជាតិ

ក្រសួងអប់រំ នឹងប្រើវិធានការវះកាត់លើសហព័ន្ធ ដើម្បីផ្តល់ឱកាសឲ្យអ្នកមានសមត្ថភាព

11, Jul 2020 , 4:59 pm

រូបភាព

លោក ស សុខា ពេលដឹកនាំកិច្ចប្រជុំត្រួតពិនិត្យសមាសភាព គ្រូបង្វឹក គ្រូជំនួយនិងកីឡាករ ដែលសហព័ន្ធស្នើសុំប្រមូលផ្តុំជម្រើសជាតិ, រូបភាពពីអគ្គនាយកដ្ឋានកីឡា

ដោយ:

ការធ្វើកំណែទម្រង់ក្នុងសហព័ន្ធ មិនមែនជាការបន្ទច់បង្អាក់ដំណើរអភិវឌ្ឍន៍របស់សហព័ន្ធកីឡាជាតិនីមួយៗនោះទេ។ ផ្ទុយទៅវិញ វាជាការផ្តល់ឱកាសដល់យុវជន និងអ្នកមានសមត្ថភាព ដើម្បីរួមចំណែកអភិវឌ្ឍន៍វិស័យកីឡានៅកម្ពុជា។ នេះជាការយល់ឃើញរបស់លោក ស សុខា រដ្ឋលេខាធិការក្រសួងអប់រំយុវជននិងកីឡា ដែលចាត់ទុកការធ្វើកំណែទម្រង់ក្នុងសហព័ន្ធ ជារឿងចាំបាច់ ដែលត្រូវធ្វើនាពេលបច្ចុប្បន្ន។

លោក ស សុខា រដ្ឋលេខាធិការក្រសួងអប់រំ យុវជន និងកីឡានៅថ្ងៃទី១០ ខែកក្កដា ឆ្នាំ២០២០ បានប្រកាសពីការប្រើវិធានការកំណែទម្រង់លើសហព័ន្ធកីឡាជាតិនីមួយៗ ដែលមានមន្ត្រីដើរតួនាទីពីរក្នុងពេលតែមួយ។ ក្នុងន័យនេះមន្ត្រីម្នាក់មិនអាចមានតួនាទីពីរក្នុងសហព័ន្ធនោះទេ ពោលគឺបុគ្គលម្នាក់បើមានតួនាទីជាសមាជិកប្រតិបត្តិហើយ មិនអាចទៅធ្វើជាគ្រូបង្វឹក ឬគ្រូជំនួយបានឡើយ។ តែពួកគេអាចលាលែងពីតំណែងក្នុងសហព័ន្ធទៅធ្វើជាគ្រូបង្វឹក ឬលាលែងពីគ្រូបង្វឹកទៅធ្វើជាមន្ត្រីសហព័ន្ធបាន។

សម្រាប់លោក ស សុខា វាល្មមដល់ពេល ដែលសហព័ន្ធនីមួយៗត្រូវលះបង់ និងបើកចិត្តឲ្យទូលាយក្នុងការវះកាត់មន្ត្រីអសកម្ម ឬគ្រូបង្វឹកអសមត្ថភាព ដែលយកវិស័យកីឡាធ្វើជាមុខរបរ។ ភាពមិនប្រក្រតីទាំងនេះ ជាឧបសគ្គរាំងស្ទះក្នុងការអភិវឌ្ឍន៍វិស័យកីឡាកម្ពុជាឲ្យមានភាពរីកចម្រើន។

លោកបានបញ្ជាក់ថា៖«ការកែទម្រង់ក្នុងសហព័ន្ធនីមួយៗ គឺជាការចាំបាច់ក្នុងពេលបច្ចុប្បន្ននេះ ព្រោះអាណត្តិមួយចំនួនរបស់សហព័ន្ធមកដល់ម៉ោងនេះ អ្នកបាននៅក៏នៅ អ្នកមិនបាននៅក៏ទៅអស់ ហើយមួយចំនួនមិនអាចបំពេញការងារ។ ដូច្នេះដើម្បីសម្របសម្រួលផ្តល់ឱកាសដល់អ្នកដទៃ យើងត្រូវតែហ៊ានបើកបេះដូងវះកាត់ ដើម្បីឲ្យអ្នកទាំងនោះចូលរួមជាមួយយើង»។

សហព័ន្ធកីឡាជាតិជាធាតុមួយ ដែលមិនអាចខ្វះបានរបស់ក្រសួងអប់រំយុវជននិងកីឡា ក៏ដូចជាគណៈកម្មាធិការជាតិអូឡាំពិកកម្ពុជាក្នុងដំណើរឆ្ពោះទៅត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។ ការកំណែទម្រង់របស់ក្រសួងអប់រំ មិនមែនជាការបន្ទច់បង្អាក់ដំណើរការអភិវឌ្ឍរបស់សហព័ន្ធនោះទេ តែវាជាការរួមចំណែកក្នុងការអភិវឌ្ឍន៍កីឡាទៅវិញទេ។

«កុំឲ្យគិតថា អ្វីៗដែលក្រសួងកំពុងធ្វើនេះ(កំណែទម្រង់)ជាការបន្ទច់បង្អាក់ កុំឲ្យសហព័ន្ធនីមួយៗរីកចម្រើន តាមពិតសហព័ន្ធ គឺជាភ្នែក ជាច្រមុះ និងជាដៃគូដ៏ល្អបំផុតរបស់ក្រសួង។ ដូច្នេះមានរឿងអ្វីយើងចរចា និងពិភាក្សាគ្នាបាន តែសូមកុំអត្តនោម័តិដោយខ្លួនឯង សូមពិភាក្សាជាមួយក្រសួង។ ក្រសួងមិនមែនដើរតួជាឪពុកម្តាយទេ គឺដើរតួជាបងប្អូនមិត្តភក្តិ»។ លោក ស សុខា លើកឡើងបែបនេះ ហើយអះអាងថា វិធានការកំណែទម្រង់នេះនឹងចងក្រងដាក់ឲ្យប្រើប្រាស់ក្នុងពេលឆាប់ៗខាងមុខនេះ។

ក្រសួងអប់រំយុវជននិងកីឡានៅថ្ងៃទី១០ ខែកក្កដា ឆ្នាំ២០២០ បានរៀបចំកិច្ចប្រជុំមួយ ដើម្បីត្រួតពិនិត្យភាពមិនប្រក្រតីក្នុងការដាក់សមាសភាពគ្រូបង្វឹក គ្រូជំនួយ និងកីឡាករកីឡាការិនីរបស់សហព័ន្ធ ដើម្បីស្នើសុំប្រមូលផ្តុំក្រុមជម្រើសជាតិ។ ក្រោយការត្រួតពិនិត្យរបស់អង្គប្រជុំ ដែលដឹកនាំដោយលោក ស សុខា រកឃើញថា សហព័ន្ធកីឡាជាតិចំនួន១៤ ដែលត្រូវកែប្រែតួនាទី និងផ្លាស់ប្តូរសមាសភាពគ្រូបង្វឹក និងកីឡាករ។

សហព័ន្ធទាំងនោះរួមមានតេកា្វន់ដូ WT, សីដក់, វាយកូនបាល់, ហែលទឹក, ការ៉ាតេ, ទូកក្តោង, វ៉ូវីណាម, តេក្វាន់ដូ ITF, ជិះសេះ, វាយឃ្លីលើតុ, ទ្រីយ៉ាត្លុង, យូដូ, កីឡារាំ និងសូរិនហ្ស៊ីកាំប៉ូ។

លោក សុខ សប្បាយណា អនុរដ្ឋលេខាធិការក្រសួងអប់រំយុវជននិងកីឡាអះអាងថា ការជ្រើសរើសកីឡាករដើម្បីប្រមូលផ្តុំហ្វឹកហាត់ក្នុងក្រុមជម្រើសជាតិជារឿងចាំបាច់ ដែលសហព័ន្ធត្រូវយកចិត្តទុកដាក់ខ្ពស់។ ព្រោះការជ្រើសរើសកីឡាករមិនឆ្លុះបញ្ចាំងពីភាពត្រឹមត្រូវនឹងធ្វើកីឡាករ ដែលប្រឹងប្រែងហ្វឹកហាត់បាក់ទឹកចិត្ត ឬអាចធ្វើឲ្យបែកបាក់ផ្ទៃក្នុងក៏អាចថាបាន៕