សង្គមអន្តរជាតិ
អន្តរជាតិ
អ្នកការទូតអាមេរិក៖ ទំនាក់ទំនងអាមេរិក-វៀតណាមបច្ចុប្បន្ន មានភាពរឹងមាំខ្លាំងជាងពេលណាទាំងអស់ អគ្គរដ្ឋទូតអាមេរិកប្រចាំវៀតណាម Daniel Kritenbrink ។ រូបភាព VNA
× អគ្គរដ្ឋទូតអាមេរិកប្រចាំវៀតណាម លោក Daniel Kritenbrink បានវាយតម្លៃខ្ពស់លើទំនាក់ទំនង និងកិច្ចសហប្រតិបត្តិការទ្វេភាគីរវាងអាមេរិក និងវៀតណាម។ អ្នកការទូតជាន់ខ្ពស់អាមេរិករូបនេះ បានមើលឃើញពីការវិវត្តន៍យ៉ាងឆាប់រហ័សរវាងប្រទេសទាំងពីរ ក្នុងការកសាងភាពជាដៃគូ និងមិត្តភាពក្នុងកម្រិតកំពូលមួយ។
តាមរយៈសេចក្តីថ្លែងការណ៍ក្នុងខួបលើកទី២៥ នៃចំណងមិត្តភាពអាមេរិក-វៀតណាម លោក Daniel Kritenbrink នៅថ្ងៃទី១០ កក្កដា បានលើកឡើងថា បច្ចុប្បន្នប្រទេសទាំងពីរមិនស្ទាក់ស្ទើរក្នុងការហៅគ្នាទៅវិញទៅមកថា ជាមិត្ត និងដៃគូនោះទេ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម Vietnam News។
នាឱកាសដដែលនោះ លោកអគ្គរដ្ឋទូត បានពណ៌នាថា ទំនាក់ទំនងប្រទេសទាំងពីរគឺជាទំនាក់ទំនងវិសាមញ្ញមួយ។ លោក ហ៊ាននិយាយថា ប្រទេសទាំងពីរ បានកសាងភាពជាដៃគូ និងមិត្តភាពយ៉ាង រហ័ស និងជោគជ័យ ដែលចំណុចនេះ លោក អះអាងថា គឺជាដ៏គួរឲ្យមោទកភាពសម្រាប់ប្រទេសទាំងពីរ ផងដែរ។
មន្ត្រីការទូតជាន់ខ្ពស់រូបនេះ បានរម្លឹកពីប្រវត្តិសាស្ត្ររវាងប្រទេសទាំងពីរកាលពី២៥ឆ្នាំមុន។ ពោលគឺជាពេលដែលប្រទេសទាំងពីរចាប់ផ្តើមកសាងទំនាក់ទំនងការទូតជាថ្មីឡើងវិញ និងជាពេលដែលអាមេរិក និងវៀតណាម ដាក់ចិត្តចាប់ដៃគ្នាធ្វើកិច្ចសហប្រតិបត្តិការ និងទុករឿងសង្គ្រាមប្រវត្តិសាស្ត្រគូសត្រូវ ជាមួយគ្នានៅមួយឡែក។
ខណៈអះអាងជាថ្មីពីការបន្តទទួលខុសត្រូវលើកម្អែលសង្គ្រាមប្រវត្តិសាស្ត្រដែលអាមេរិកបានបង្កក្នុងទឹកដីវៀតណាម លោក ក៏បានបញ្ជាក់ពីគោលជំហមិនងាករេរបស់រដ្ឋាភិបាលអាមេរិកក្នុងការបង្កើតទំនុកចិត្តរវាងអាមេរិក និងវៀតណាម ធ្វើយ៉ាងណាធានាឲ្យបាននូវកំណើនសេដ្ឋកិច្ច និងពាណិជ្ជកម្មប្រកបដោយតម្លាភាព សេរី និងតុល្យភាព។ វិស័យការពារ និងសន្តិសុខ ក៏ត្រូវរាប់បញ្ចូលជាការងារអាទិភាពសម្រាប់ប្រទេសទាំងពីរផងដែរ៕
© រក្សាសិទ្ធិដោយ thmeythmey.com