នាវិក​អាមេរិក​១៧ រងរបួស​ក្នុង​ហេតុការណ៍​ផ្ទុះ​ឆេះ​នាវា​ដឹក​ឧទ្ធម្ភាគចក្រ​នៅ​កាលីហ្វ័រ​នីញ៉ា​
អន្តរជាតិ
នាវិក​អាមេរិក​១៧ រងរបួស​ក្នុង​ហេតុការណ៍​ផ្ទុះ​ឆេះ​នាវា​ដឹក​ឧទ្ធម្ភាគចក្រ​នៅ​កាលីហ្វ័រ​នីញ៉ា​
13, Jul 2020 , 9:45 am        
រូបភាព
នាវា USS Bonhomme Richard កំពុងឆេះនៅឯកំពង់ផែ San Diego រដ្ឋកាលីហ្វ័រនីញ៉ា។ រូបភាព AP
នាវា USS Bonhomme Richard កំពុងឆេះនៅឯកំពង់ផែ San Diego រដ្ឋកាលីហ្វ័រនីញ៉ា។ រូបភាព AP
​មនុស្ស​យ៉ាងហោចណាស់​២១​នាក់​ដោយមាន​ទាំង​យោធា​ផង ត្រូវបាន​បញ្ជូន​ទៅកាន់​មន្ទីរពេទ្យ​ក្រោយ​ហេតុការណ៍​ផ្ទុះ​ឆេះ​នាវាចម្បាំង​មួយគ្រឿង​នៅ​មូលដ្ឋាន​ក្នុង​ទីក្រុង San Diego រដ្ឋ​កាលីហ្វ័រ​នីញ៉ា​នៅ​ថ្ងៃទី​១២ ខែកក្កដា​។ ក្រុមមន្ត្រី​អាមេរិក កំពុង​រក​មូលហេតុ​នាំ​ឲ្យ​មាន​ហេតុការណ៍​ផ្ទុះ​ឆេះ​នេះ​។​

 
​នាវា USS Bonhomme Richard ដែលជា​ប្រភេទ​នាវាចម្បាំង​សម្រាប់​គាំទ្រ​ប្រតិបត្តិការ​ឡើងគោក កំពុង​ស្ថិតនៅ​កំពង់ផែ San Diego នៃ​រដ្ឋ​កាលីហ្វ័រ​នីញ៉ា ដើម្បី​ទទួល​ការថែទាំ​នៅពេលដែល​ហេតុការណ៍​ផ្ទុះ​កើតឡើង​។ ផ្សែង​ខ្មួលខ្មាញ់​ត្រូវបាន​គេ​មើលឃើញ ហោះ​ចេញពី​ផ្នែក​ជាច្រើន​របស់​នាវា ខណៈដែល​ក្រុម​សង្គ្រោះ​ប្រើប្រាស់​ទូក​បាញ់​ទឹក​ដើម្បី​គ្រប់គ្រង​ការ​រាលដាល​របស់​ភ្លើង​។ 
 
​បើតាម Twitter របស់​អង្គភាព Naval Surface Forces របស់​កង​នាវាចរណ៍​ប៉ាស៊ីហ្វិក នាវិក​១៧​នាក់ និង​ស៊ីវិល​៤​នាក់ ត្រូវបាន​បញ្ជូន​ទៅកាន់​មន្ទីរពេទ្យ​ក្រោយ​រងរបួស​ស្រាល​ក្នុង​ហេតុការណ៍​នេះ ខណៈ​អ្នក​ពន្លត់​អគ្គិភ័យ​ជាច្រើន​នាក់ រង​ជួប​បញ្ហា​រលាកភ្លើង និង​ឈ្លក់ផ្សែងរ​ផងដែរ​។ លោក Colin Stowell ប្រធាន​អង្គភាព​ពន្លត់​អគ្គិភ័យ​ទីក្រុង San Diego ប្រាប់​ទូរទស្សន៍ CNN ថា ភ្លើង​អាច​ឆេះ​បី​បួន​ថ្ងៃ​ទៀត ហើយ​ភ្លើង​ទើប​ឆេះ​ដល់​បាត​នាវា​។​
 
​មិនទាន់​ការបញ្ជាក់​ពី​មូលហេតុ​នាំ​ឲ្យ​មានការ​ផ្ទុះ​រហូតដល់​នាំ​ឲ្យ​មានការ​ឆេះ​ឡើយ​។ ដោយឡែក លោក Mike Raney អ្នកនាំពាក្យ​កងទ័ពជើងទឹក​អាមេរិក​ប្រចាំ​ទីក្រុង San Diego និយាយថា គ្រាប់​ដែលមាន​លើ​នាវា ត្រូវបាន​ចាក់សោរ​អស់ហើយ​មុនពេល​នាវា​នេះ​ចូល​កំពង់ផែ​ដើម្បី​ការជួសជុល​តាម​ផែនការ​នោះ​។ ចំណែក​នាវា​បំពាក់​មី​ស៊ី​ល​ប្រដេញ​ពីរ​គ្រឿង USS Fitzgerald និង USS Russell ដែល​ចត​ក្បែរ​នោះ ក៏ត្រូវ​បាន​អូស​ចេញ​ភ្លាម​ដែរ​។​
 
​នាវិក​ចំនួន​១៦០​នាក់ មាន​វត្តមាន​លើ​នាវា​នេះ​មុនពេល​ផ្ទុះ ខណៈ​ជាទូទៅ​នាវា​នេះ​ផ្ទុក​មនុស្ស​ជិត​មួយ​ពាន់​នាក់​។ កំពង់ផែ San Diego គឺជា​ផ្ទះ​របស់​នាវា USS Bonhomme Richard ដែលជា​ផ្នែក​មួយ​នៃ​អង្គភាព​ទ័ពជើងទឹក​ប្រចាំ​តំបន់​ប៉ាស៊ីហ្វិក​។​
 
USS Bonhomme Richard ដែល​ដាក់​ដំណើរការ​នៅ​ឆ្នាំ​១៩៩៨ ជា​ប្រភេទ​នាវា​ធំជាងគេ​របស់​កងទ័ព​ជើង​ទឹក​អាមេរិក តាម​ក្រោយ​នាវា​ដឹក​យន្តហោះ​ប៉ុណ្ណោះ​។ នាវា​នេះ មាន​ភារកិច្ច​ដឹក​ឧទ្ធម្ភាគចក្រ​របស់​កង​កម្លាំង​ម៉ា​រី​ន​អាមេរិក ក៏ដូចជា​ដឹកជញ្ជូន​យោធា​ទៅ​ច្បាំង​៕
 

Tag:
 អាមេរិក​
  កាលីហ្វ័រ​នីញ៉ា
© រក្សាសិទ្ធិដោយ thmeythmey.com