Mercedes ឡើងកំពូលតារាង F1 ក្រោយ Hamilton ឈ្នះនៅទីលាន Styrian

កីឡាអន្តរជាតិ

រថយន្ត

អន្តរជាតិ

13, Jul 2020 , 7:19 pm

រូបភាព

ដោយ: ទេព ពិទូរ្យ

Lewis Hamilton ម្ចាស់ការពារតំណែងជើងឯកឆ្នាំចាស់ បានយកឈ្នះការប្រណាំងរថយន្ត Formula One នៅទីលាន Styrian Grand Prix ក្នុងប្រទេសអូទ្រីស សម្រាប់រដូវកាល ២០២០។ ឆ្លងកាត់ការប្រណាំងពីរលើកក្រុម Mercedes ឈរកំពូលតារាងផ្នែកគ្រឿងម៉ាស៊ីន មាន៨០ពិន្ទុ នាំមុខ McLaren Renault ដែលឈរលេខ២ ចំនួន៤១ពិន្ទុ។

អត្ថបទទាក់ទង

Bottas ជួយក្រុម Mercedes ឈ្នះការប្រណាំងបើកឆាក F1នៅទីលានអូទ្រីស

នាទីលានប្រណាំងលើកទី២ ក្នុងប្រទេសអូទ្រីស Styrian Grand Prix នៅថ្ងៃទី១២ ខែកក្កដា Hamilton បញ្ចប់ទៅក្នុងចំណាត់ថ្នាក់ទី១ ដោយប្រើថេរវេលា ១ម៉ោង ២២នាទី និង៥០វិនាទី ក្នុងការប្រណាំងទាំង៧១ជុំ។ មិត្តរួមក្រុម Mercedes កីឡាករ Valtteri Bottas បញ្ចប់ក្នុងចំណាត់ថ្នាក់ទី២ ខណៈកីឡាករ Max Verstappen ដែលបើកបរឲ្យ Red Bull ទទួលបានចំណាត់ថ្នាក់ទី៣។

នេះជាជ័យជម្នះទី៨៥ក្នុងអាជីពរបស់អ្នកប្រណាំងសញ្ជាតិអង់គ្លេស វ័យ៣៥ឆ្នាំ ក្នុងព្រឹត្តិការណ៍ F1 ពិភពលោក ដែលមានន័យថារូបគេកំពុងដើរឆ្នោះទៅរកការបំបែកកំណត់ត្រាឈ្នះការប្រណាំងច្រើនជាងគេលើលោករបស់លោក Michael Schumacher អតីតកីឡាករប្រណាំងសញ្ជាតិអាល្លឺម៉ង់ ដែលឈ្នះចំនួន ៩១ដង។

ការឈ្នះក្នុងការប្រណាំងលើកទីពីរប្រចាំរដូវកាលឆ្នាំ២០២០នេះ បាននាំឲ្យ Hamilton ឈរនៅលេខរៀងទីពីរក្នុងតារាងពិន្ទុ F1 បណ្តោះអាស្ន ដោយរកបាន៣៧ពិន្ទុ តាមពីក្រោយមិត្តរួមក្រុម Bottas ចំនួន៦ពិន្ទុ ដ្បិតអ្នកប្រណាំងសញ្ជាតិហ្វាំឡង់រូបនេះបានឈ្នះការប្រណាំងនៅជំនួបបើកឆាក និងទទួលបានលេខ២ ក្នុងការប្រណាំងលើកនេះ។

ទាំង Hamilton និង Bottas សុទ្ធតែបានរួមចំណែងជួយឲ្យក្រុមរបស់ពួកគេ Mercedes នាំមុខពិន្ទុលើផ្នែកគ្រឿងម៉ាស៊ីន។ ឆ្លងកាត់២ប្រកួត Mercedes រកបាន៨០ពិន្ទុ នាំមុខក្រុមលេខ២ McLaren Renault ចំនួន៤១ពិន្ទុ។

ការប្រណាំងនៅទីលានបន្ទាប់ ដែលជាទីលានទី៣សម្រាប់រដូវកាលនេះ នឹងធ្វើឡើងនៅក្នុងប្រទេសហុងគ្រី Hungarian Grand Prix នាថ្ងៃទី១៧-១៩ ខែកក្កដា៕