ជាតិ
សង្គមជាតិ
នាយករដ្ឋមន្ត្រី ឯកភាពឲ្យសម្រាកពីថ្ងៃ១៧ ដល់ថ្ងៃ២១សីហា ជំនួសថ្ងៃចូលឆ្នាំ ដែលមិនបានឈប់
× ភ្នំពេញ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ស្នើឲ្យសម្ដេចនាយករដ្ឋមន្ត្រី ហ៊ុន សែន ពិនិត្យ និងដាក់ចេញថ្ងៃឈប់សម្រាក៥ថ្ងៃ គឺពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ ដើម្បីសងថ្ងៃឈប់ចូលឆ្នាំខ្មែរ ដែលរដ្ឋាភិបាលហាមពលរដ្ឋឈប់សម្រាក ដើម្បីទប់ស្កាត់ការរាតត្បាតជំងឺកូវីដ-១៩។ សម្តេចនាយករដ្ឋមន្ត្រី បានចារយល់ព្រមលើសំណើនោះហើយ។
លោក អូន ព័ន្ធមុនីរ័ត្ន បានផ្ញើសំណើនេះទៅសម្តេចនាយករដ្ឋមន្ត្រី ជាអ្នកសម្រេច ក្រោយពីបើកកិច្ចប្រជុំជាមួយនឹងសមាគមកាត់ដេរកម្ពុជា សហព័ន្ធទេសចរណ៍ សភាពាណិជ្ជកម្មកម្ពុជា និងអ្នកពាក់ព័ន្ធផ្សេងទៀត។ លោក ជម្រាប់សម្តេចថា ការយកថ្ងៃទី ១៧-២១ ខែសីហានេះ ជាថ្ងៃសងឈប់សម្រាក ដោយសារតែពេលវេលានោះ ស្ថិតនៅចន្លោះថ្ងៃឈប់សម្រាកមួយខែ នៃពិធីបុណ្យភ្ជុំបិណ្ឌ ដែលនឹងប្រព្រឹត្តឡើងនៅថ្ងៃទី១៦-១៨ ខែកញ្ញា។ ជាពិសេស ជាថ្ងៃដែលកម្មករ កម្មការិនី ទទួលបានប្រាក់ខែមុនថ្ងៃឈប់សម្រាក ដែលអាចឲ្យពួកគេមានលទ្ធភាពក្នុងការធ្វើដំណើរកម្សាន្តនានា។
បើតាមរដ្ឋមន្ត្រីសេដ្ឋកិច្ចរូបនេះ ថ្ងៃឈប់នៅខែសីហានោះ ក៏ជាពេលវេលាមួយ ដែលសហគ្រាស បញ្ចប់ចង្វាក់ផលិតកម្ម និងអាចនាំចេញទំនិញ ទៅតាមការបញ្ជា នៅមុនថ្ងៃទី១២ ខែសីហា ដែលជាកាលបរិច្ឆេទនៃការចូលជាធរមាន នៃការព្យួរប្រព័ន្ធអនុគ្រោះពន្ធលើទំនិញ លើកលែងតែអាវុធ (Everything But Arms)។ លើសពីនេះ ក៏ជាពេលឲ្យម្ចាស់សណ្ឋាគារ និងម្ចាស់ផ្ទះសំណាក់ នៅតាមតំបន់ទេសចរណ៍នានា ត្រៀមរៀបចំបើកដំណើរការអាជីវកម្មឡើងវិញ ដើម្បីទាក់ទាញភ្ញៀវទេសចរផងដែរ។
លោករដ្ឋមន្ត្រី ក៏បានស្នើសុំយកថ្ងៃឈប់សម្រាកនោះ ជាថ្ងៃពន្យារពេលនៃការដាក់លិខិតប្រកាសពន្ធ សម្រាប់ប្រចាំខែសីហា ព្រមទាំងស្នើឲ្យក្រសួងសុខាភិបាលក្រសួងទេសចរណ៍ ក្រសួងសាធារណការ អាជ្ញាធរដែនដី រួមទាំងអ្នកពាក់ព័ន្ធផ្សេងទៀត សហការគ្នាពង្រឹងការអនុវត្ត និងផ្សព្វផ្សាយពីវិធានការទប់ស្កាត់ជំងឺកូវីដ-១៩ផងដែរ៕
Tag:
ឈប់សម្រាក
ចូលឆ្នាំខ្មែរ
© រក្សាសិទ្ធិដោយ thmeythmey.com