COVID-19
អន្តរជាតិ
សិស្សមួយក្រុមហៅអ្នកកើត COVID-19 ទៅជប់លៀង ហើយភ្នាល់គ្នាថា «អ្នកណាឆ្លងមុនគេ»
× សិស្សមួយក្រុមនៅសាកលវិទ្យាល័យក្នុងក្រុង Tuscaloosa រដ្ឋ Alabama សហរដ្ឋអាមេរិក បានបង្កើតគំនិតដ៏មិននឹកស្មានដល់មួយដោយយកករណី COVID-19 ទៅលេងសើច។ អ្នកស្រី Sonya McKinstry សមាជិកក្រុមប្រឹក្សាក្រុងបានអះអាងប្រាប់ ABC News ថា ពួកគេបានអញ្ជើញអ្នកផ្ទុក COVID-19 ទៅចូលរួមក្នុងពិធីជប់លៀង ហើយបានភ្នាល់គ្នារកអ្នកដែលត្រូវឆ្លងមុនគេក្នុងចំណោមអ្នកចូលរួម។
លោក Randy Smith ប្រធានផ្នែកពន្លត់អគ្គិភ័យនៅក្រុង Tuscaloosa បានបញ្ជាក់ថា លោកក៏ទទួលបានសេចក្តីរាយការណ៍ពីករណីនេះផងដែរ ប៉ុន្តែដំបូងឡើយ លោកបានគិតថា វាគ្រាន់តែជាពាក្យចចាមអារ៉ាម។ «មិនត្រឹមតែក្រុមវេជ្ជបណ្ឌិតឡើយ សូម្បូតែថ្នាក់រដ្ឋ ក៏បានបញ្ជាក់ពីករណីនេះដូចគ្នាផងដែរ»។
ក្នុងបទសម្ភាសជាមួយ ABC News អ្នកស្រី Sonya និយាយទាំងមួរមៅថា៖ «វាគ្មានន័យទាល់តែសោះដែលពួកគេ យកលុយទៅភ្នាល់គ្នារឿងបែបនេះ... ហើយអ្នកដែលឆ្លងមុនគេ ជាអ្នកឈ្នះលើការភ្នាល់»។ អ្នកស្រីបន្តសម្តែងនូវការហួសចិត្ត ដែលមានអ្នកចូលរួមធ្វើបែបនេះ ខណៈអាជ្ញាធរប្តឹងចាត់វិធានការគ្រប់បែបយ៉ាងដើម្បីទប់ស្កាល់ការរាលដាល COVID-19។
សាកលវិទ្យាល័យ Alabama បានផ្អាកកម្មសិក្សាផ្ទាល់ (Face-to face courses) តាំងពីដើមខែមីនា មក ហើយពលរដ្ឋទាំងអស់ត្រូវបានណែនាំឲ្យរស់នៅក្រោមវិធានចត្តាឡីស័ក។ អ្នកដែលរំលោភបំពានវិធានសុខាភិបាល ត្រូវរងពិន័យក្នុងម្នាក់ចាប់ពី៥០០ដុល្លារឡើងទៅ។
នាបទបង្ហាញនៅចំពោះមុខក្រុមប្រឹក្សាក្រុង លោក Randy Smith ដែលពាក់ម៉ាស់ផងដែរន៉ មិនបានបញ្ជាក់ពីប្រភពរបស់និស្សិតទាំងនោះឡើយ។ Tuscaloosa ជាទីក្រុងធំជាងគេលំដាប់ទី៧នៅរដ្ឋ Alabama ដោយមានសាកលវិទ្យាល័យ Alabama និងគ្រឹះស្ថានអប់រំជាច្រើនទៀត។
មកដល់ពេលនេះ គេមិនទាន់រកឃើញករណីឆ្លងពីពិធីជប់លៀងនោះឡើយ។ លោក Richard Rush អ្នកនាំពាក្យសាលាក្រុង បានថ្លែងប្រាប់ ABC News ថា អាជ្ញាធរ ព្យាយាមសហការជាមួយស្ថាប័នតំបន់គ្រប់ផ្នែក ដើម្បីប្រយុទ្ធប្រឆាំងនឹងការរាលដាល COVID-19៕
© រក្សាសិទ្ធិដោយ thmeythmey.com