រដ្ឋាភិបាលអាមេរិក ប្ដូរចិត្តឲ្យនិស្សិតបរទេសបន្តស្នាក់នៅវិញ ទោះត្រូវរៀនតាមអនឡាញក្ដី

COVID-19

អន្តរជាតិ

រដ្ឋាភិបាលអាមេរិក ប្ដូរចិត្តឲ្យនិស្សិតបរទេសបន្តស្នាក់នៅវិញ ទោះត្រូវរៀនតាមអនឡាញក្ដី

15, Jul 2020 , 7:29 pm

រូបភាព

និស្សិតកំពុងដើរក្នុងបរិវេណសាកលវិទ្យាល័យមួយក្នុងរដ្ឋធានីវ៉ាស៊ីនតោន។ រូបភាព AFP

ដោយ: តន ចាន់រិទ្ធារ៉ា

រដ្ឋាភិបាលអាមេរិក បានប្ដូរចិត្តលុបចោលការសម្រេចចិត្តដ៏ចម្រូងចម្រាសរបស់ខ្លួនក្នុងការបញ្ចប់ទិដ្ឋាការរបស់និស្សិតបរទេសក្នុងករណីពួកគេត្រូវរៀនអនឡាញនៅឆមាសខាងមុខ ខណៈជំងឺ COVID-19 បន្តរាលដាល។ នេះបើតាមការប្រកាសរបស់ចៅក្រមមួយរូបនៅថ្ងៃទី១៤ ខែកក្កដា ។ បញ្ជានេះ រងប្រតិកម្មខ្លាំងពីគ្រឹះស្ថានអប់រំរបស់អាមេរិក ព្រោះប៉ះពាល់ដល់ចំណូលរបស់ពួកគេ ក៏ដូចជាការសិក្សារបស់និស្សិតរាប់ម៉ឺននាក់ផងដែរ។

ក្នុងសវនាការថ្ងៃទី១៤ ខែកក្កដា ចៅក្រុម Allison Burroughs នៃរដ្ឋម៉ាសាឈូសេត ប្រកាសថា រដ្ឋាភិបាលអាមេរិកបានលុបចោលការសម្រេចចិត្តមិនឲ្យនិស្សិតបរទេសស្នាក់នៅអាមេរិក បើត្រូវរៀនតាមអនឡាញ និងការអនុវត្តផែនការនេះទាំងអស់។ លោកចៅក្រមបន្តថា រដ្ឋាភិបាលអាមេរិក និងគ្រឹះស្ថានអប់រំ បានឯកភាពគ្នាឲ្យរក្សាស្ថានភាពដើមដដែល។

អត្ថបទទាក់ទង

អាមេរិកអាចបញ្ជូននិស្សិតបរទេសទៅស្រុកវិញ បើថ្នាក់ពួកគេរៀនអនឡាញ

សាកលវិទ្យាល័យ Havard និងវិទ្យាស្ថានបច្ចេកវិទ្យាម៉ាសាឈូសេត (MIT) ដែលគាំទ្រដោយគ្រឹះស្ថានអប់រំមួយចំនួនទៀត ជាអ្នកប្ដឹងជំទាស់ការសម្រេចចិត្តរបស់អង្គភាពអន្តោប្រវេសន៍ និងការអនុវត្តគយរបស់អាមេរិក (ICE) ដែលបានដាក់ចេញវិធានការបិទទិដ្ឋាការរបស់និស្សិតកាលពីដើមខែកក្កដានេះ។ មកទល់ពេលនេះ សាលានៅអាមេរិកមិនទាន់សម្រេចចិត្តលើការរៀនតាមអនឡាញនៅឡើយទេ ស្របពេលដែលជំងឺ COVID-19 មិនទាន់ស្រាកស្រាន្តនោះ។

បើតាមទីភ្នាក់ងារព័ត៌មាន AFP ក្នុងបណ្ដឹងរបស់ខ្លួន សាលាឧត្តមសិក្សាទាំងពីរនេះអះអាងថា វិធានការបណ្ដេញនិស្សិតបរទេស ប៉ះពាល់និស្សិតខ្លាំងទាំងការសិក្សា និងបញ្ហាហិរញ្ញវត្ថុផងដែរ។ ក្នុងរបាយការណ៍របស់វិទ្យាស្ថានអប់រំអន្តរជាតិ និស្សិតបរទេសដែលកំពុងរៀននៅអាមេរិកមានចំនួនជាងមួយលាននាក់ក្នុងឆ្នាំសិក្សា២០១៨-២០១៩ ។ ពីតំបន់អាស៊ី ភាគរយច្រើននៃនិស្សិតបរទេសមានជនជាតិចិន និងកូរ៉េខាងត្បូងជាដើម។

គិតត្រឹមថ្ងៃទី១៤ ខែកក្កដា អាមេរិកមានករណីសរុបឆ្លងជាងបីលានបីសែននាក់ និងស្លាប់ជិត១៤ម៉ឺននាក់៕