អស់រយៈពេលជាង១សប្តាហ៍ហើយ ដែលក្លើ សំណាង និងសុធីរ មិនបានជួបគ្នា ហើយក៏មិនទាក់ទងគ្នាតាមបណ្តាញសង្គមដែរ ព្រោះ មិត្តទាំងពីរបានធ្វើដំណើរទៅកាន់រមណីយដ្ឋានទេសចរណ៍តាមបណ្តាខេត្តនានាដើម្បីចង់ដឹងឲ្យច្បាស់ថា តើកូនខ្មែរចាប់អារម្មណ៍នឹងសម្បត្តិទេសចរណ៍ វប្បធម៌ ប្រវត្តិសាស្ត្រនៃដែនដីសុវណ្ណភូមិយ៉ាងដូចម្តេចដែរក្នុងបរិបទកូវីដនេះ។
សុធីរ៖ ខ្មែរយើងដើរកម្សាន្តច្រើនមែនទែនទៅតាមខេត្តក្រុង ក្នុងរយៈពេល២ ឬ៣ខែចុងក្រោយនេះ។
សំណាង៖ អើ! ដើរច្រើនមែនទែន។ ពួកគេធ្វើដំណើរស្ទើរគ្រប់ខេត្តក្រុងទាំងអស់ ជាពិសេស តំបន់ភ្នំ តំបន់ខ្ពស់រាប តំបន់សមុទ្រ តំបន់ប្រាសាទ និងតំបន់ជនជាតិភាគតិច។ល។
សុធីរ៖ ហេតុអ្វីបានជាមានចលនាដើរកម្សាន្តក្នុងស្រុកច្រើនម្ល៉េះ?
សំណាង៖ អានេះ សួរដូចអត់ដឹងអីសោះតែម្តង! កូវីដ ស្ទាក់ពួកគេមិនឲ្យដើរទៅក្រៅប្រទេសបានហ្នឹងណា៎!
សុធីរ៖ អ៊ីចឹង បើអត់មានកូវីដ ពួកគេមិនដើរកម្សាន្តក្នុងស្រុកទេ?
សំណាង៖ ថាអ៊ីចឹង ក៏មិនខុសដែរ។ តាមពិត បើគ្មានកូវីដ កូនខ្មែរមួយចំនួនដើរកម្សាន្តក្នុងប្រទេស តែមួយចំនួនទៀតជាប់ស្នេហ៍ជាមួយទេសភាព និងសម្ភារនៅឯបរទេស។ អ្នកទេសចរប្រភេទទីពីរនេះ ភាគច្រើនជា«បរទេសនិយម»។
សុធីរ៖ អា សំណាង! អញលឺតែគេអួតថា ទេសភាពនៅបរទេស និងស្រុកគេល្អណាស់។ ប្រទេសគេទំនើបណាស់។ល។ មែនអត់អ្ហា!
សំណាង៖ ថា អ៊ីចឹងក៏មិនខុសដែរ! តែទេសភាពនៅខ្មែរ ក៏អស្ចារ្យដែរ។ អ្ហែងត្រូវដឹងថា ស្រុកខ្មែរជាដែនដីសុវណ្ណភូមិ។ បើនិយាយពីទេសភាពនៅស្រុកស្រែវិញ វាប្រៀបដូចជាផ្ទាំងគំនូរក្នុងរឿងនិទានអ៊ីចឹង។ ល្អ និងស្អាតណាស់។ ល្អ ស្អាត អស្ចារ្យ រហូតដល់អញមិនអាចពិពណ៌នាប្រាប់ឯងបានឡើយ។ អ៊ីចឹង អ្វីដែលគេនិយាយថា ទេសភាពស្រុកគេល្អ អស្ចារ្យលើសស្រុកខ្មែរ គឺមិនត្រឹមត្រូវទេ។ តែបើគេនិយាយថា ទេសភាពល្អ ស្អាត ម្យ៉ាងម្នាក់ គឺត្រឹមត្រូវជាង។
សុធីរ៖ បើអញស្តាប់អ្ហែងនិយាយ មានន័យថា កូវីដធ្វើឲ្យកូនខ្មែរស្គាល់តម្លៃនៃសម្បត្តិ ឬសក្តានុពលទេសចរណ៍ខ្មែរកាន់តែខ្លាំង មិនថា អ៊ីចឹង?។
សំណាង៖ រឿងកូវីដនេះ មិនល្អទេ និយាយជារួម។ តែនិយាយដោយឡែក កូវីដបានធ្វើឲ្យកូនខ្មែរស្គាល់សម្បត្តិធម្មជាតិ ជាពិសេស តំបន់ទេសចរណ៍ព្រហ្មចារីខ្មែរកាន់តែច្រើនជាងមុន។ បើកូនខ្មែរមិនដឹង បើមិនស្គាល់ កូនខ្មែរពិតជាមិនឲ្យតម្លៃលើសម្បត្តិរបស់ខ្មែរខ្លួនឯងឡើយ។ សរុបមកវិញ សូមឲ្យកូនខ្មែរស្គាល់រមណីយដ្ឋានទេសចរណ៍ ឬអ្វីជារបស់ខ្មែរឲ្យអស់សិន មុននឹងធ្វើដំណើរទៅកម្សាន្តនៅប្រទេសគេ។ ប្រទេសគេ ល្អរបៀបគេ ខ្មែរយើងល្អរបៀបខ្មែរយើង។ សូមឲ្យកូនខ្មែរទាំងអស់នាំគ្នាផ្សព្វផ្សាយសម្បត្តិទេសចរណ៍យើងទៅកាន់ប្រទេសគេ! ចូរកុំនាំគ្នាអួតតែពីប្រទេសគេមកកាន់ជនជាតិយើង!។ អា សុធីរ! អញសួរអ្ហែងមើលថា តើកូនខ្មែរម្នាក់ៗអាចធ្វើជាអ្នកផ្សព្វផ្សាយទេសចរណ៍ខ្មែរទៅកាន់បរទេសបានឬទេ?
សុធីរ៖ ត្រូវតែធ្វើបាន។ ខ្មែរអាចធ្វើបាន! បើធ្វើប៉ុនហ្នឹងមិនបាន «កូនខ្មែរ»មិនចាំបាច់ធ្វើអ្វីផ្សេងទៀតឡើយ៕