ជាតិ
សង្គមជាតិ
លោក ហង់ជួន ណារ៉ុន រដ្ឋមន្រ្តីក្រសួងអប់រំ (រូបពីក្រសួងអប់រំ)
×![]()
ភ្នំពេញ៖ ក្រសួងអប់រំ យុវជន និង កីឡា អនុញ្ញាតឲ្យគ្រឹះស្ថានសិក្សាឯកជន រៀបចំវិញ្ញាសាសម្រាប់ប្រឡងមធ្យមសិក្សាទុតិយភូមិ (បាក់ឌុប) នៅថ្ងៃទី១៧-១៨ ខែសីហា ឆ្នាំ២០២០ ទៅតាមគ្រឹះស្ថានសិក្សារៀងៗខ្លួន។ ប៉ុន្តែគ្រឹះស្ថានសិក្សាឯកជន ត្រូវតែរៀបចំវិញ្ញាសាទៅតាមស្តង់ដាដែលក្រសួងបានដាក់ចេញកន្លងមក។ មុននឹងរៀបចំការប្រឡង ក្រសួងតម្រូវឲ្យគ្រឹះស្ថានសិក្សាបញ្ចូនបញ្ជីឈ្មោះទៅឲ្យក្រសួងឲ្យបានមុនខែសីហា។ 
សម្រាប់មុខវិជ្ជាប្រឡងបាក់ឌុប ក្រសួងកំណត់ដូចនឹងមុខវិជ្ជា ដែលក្រសួងធ្លាប់ចេញកន្លងមក។ មុខវិជ្ជាប្រឡងបាក់ឌុបសម្រាប់ថ្នាក់វិទ្យាសាស្ត្រ មានដូចជា ប្រវត្តិវិទ្យា ជីវវិទ្យា គីមីវិទ្យា ភាសាបរទេស អក្សរសាស្ត្រខ្មែរ រូបវិទ្យា និងគណិតវិទ្យា។ ចំណែកថ្នាក់វិទ្យាសាស្ត្រសង្គម មានដូចជា ផែនដី និងបរិស្ថានវិទ្យា ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌-ពលរដ្ឋវិជ្ជា និងអក្សរសាស្ត្រខ្មែរ។
ដើម្បីឲ្យដំណើរការប្រឡងបាក់ឌុបប្រកបដោយគុណភាព ក្រសួងអប់រំនឹងកំណត់ឲ្យបេក្ខជនប្រឡងតែ១០ ទៅ១៥នាក់ ក្នុងមួយបន្ទប់។ គ្រឹះស្ថានសិក្សាឯកជន ក៏ត្រូវរៀបចំបន្ទប់ប្រឡងដាច់ដោយឡែករវាងថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម។ ជាមួយគ្នាដែរ សាលាក៏ត្រូវចាត់ចែងឲ្យមានគណៈមេប្រយោគ និងគណៈកម្មការផ្សេងៗសម្រាប់តាមដាន និងត្រួតពិនិត្យនូវដំណើរការប្រឡង។
នៅពេលបញ្ចប់ដំណើរការប្រឡងរួច គ្រឹះស្ថានសិក្សាឯកជនត្រូវរៀបចំវិញ្ញាសាដាក់ក្នុងស្រោមបិទសោសម្ងាត់ ដើម្បីបញ្ជូនមកឲ្យក្រសួងត្រួតពិនិត្យ។ ក្រោយពីក្រសួងពិនិត្យរួចរាល់ហើយ ក្រសួងអប់រំក៏អនុញ្ញាតឲ្យគ្រឹះស្ថានសិក្សាឯកជនរៀបចំឲ្យមានប្រធាន អនុប្រធានមណ្ឌលកំណែ គណៈកម្មការកណ្តាល គណៈកម្មការបែងចែកសន្លឹកកិច្ចការ គណៈកម្មការស្រង់ បូកពិន្ទុ ផ្ទៀងផ្ទាត់ពិន្ទុ និងគូសជាប់ និងធ្លាក់។ ក្រសួងនឹងចុះត្រួតពិនិត្យរាល់ដំណើរការប្រឡងបាក់ឌុប។
ទាក់ទងនឹងកាលបរិច្ឆេទសម្រាប់ធ្វើកំណែវិញ្ញាសាប្រឡងបាក់ឌុប និងកាលបរិច្ឆេទប្រកាសលទ្ធផលប្រឡងបាក់ឌុប លោក រស់ សុវាចា អ្នកនាំពាក្យក្រសួងអប់រំ មិនទានអាចបញ្ជាក់បាននៅឡើយទេ។ ម្យ៉ាងទៀត លោកក៏មិនទាន់អាចបញ្ជាក់ពីចំនួនសាលាឯកជនដែលបានផ្តល់ព័ត៌មានទៅឲ្យក្រសួង និងមានឈ្មោះបេក្ខជនប្រឡងប៉ុន្មាននាក់នៅឡើយទេ។ តែយ៉ាងណាលោកនឹងបញ្ជាក់ នៅពេលណាមានសេចក្តីជូនដំណឹង។
ក្រសួងអប់រំបានអះអាងថា ក្នុងករណីគ្រឹះស្ថានសិក្សាឯកជនណាដែលមិនមានលទ្ធភាពរៀបចំការប្រឡងបាក់ឌុបទេ ក្រសួងនឹងអនុគ្រោះឲ្យប្រឡងជាមួយគ្រឹះស្ថានសិក្សារដ្ឋនៅតាមក្រោយផងដែរ។ ក្រសួង មិនទាន់កំណត់ទេថា សិក្សសាលារដ្ឋ នឹងត្រូវប្រឡងបាក់នៅពេលណា៕
Tag:
ក្រសួងអប់រំ
គ្រឹះស្ថានសិក្សា
បាក់ឌុប
© រក្សាសិទ្ធិដោយ thmeythmey.com
