ជាតិ
ក្រុមហ៊ុនមួយរបស់ជប៉ុន មកជួយអភិវឌ្ឍបន្លែសុវត្ថិភាពសម្រាប់ទីផ្សារក្នុងស្រុក និងការនាំចេញ
លោក Masahiro និងលោក វេង សាខុន ក្នុងពិធីចុះអនុស្សរណៈ
×![]()
ក្រសួងកសិកម្ម រុក្ខាប្រមាញ់និងនេសាទ បានចុះហត្ថលេខាលើអនុស្សរណនៃការយោគយល់គ្នា ជាមួយក្រុមហ៊ុន Yamato Green Co.,Ltd របស់ជប៉ុន ស្តីពី "ការអភិវឌ្ឍបន្លែសុវត្ថិភាពសម្រាប់ទីផ្សារក្នុងស្រុក និងការនាំចេញ" ក្នុងគោលបំណងអភិវឌ្ឍផលិតកម្មបន្លែកម្ពុជាឲ្យរីកចម្រើនស្របតាមតម្រូវការទីផ្សារបន្លែ។ កម្មវិធីដែលចុះហត្ថលេខាកាលពីថ្ងៃទី១៥ ខែកក្កដា មានការចូលរួមពីលោក វេង សាខុន រដ្ឋមន្ត្រីក្រសួងកសិកម្ម និងលោក Masahiro Mikami តំណាងក្រុមហ៊ុនជប៉ុន។
យោងតាមក្រសួងកសិកម្ម រុក្ខាប្រមាញ់និងនេសាទ ខ្លឹមសារចំនួន ៤ ត្រូវបានចុះហត្ថលេខាក្នុងនោះ
មាន ការពង្រឹងទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ តាមរយៈការចូលរួមអភិវឌ្ឍវិស័យកសិកម្មកម្ពុជា ការពង្រឹង និងពង្រីកកិច្ចសហប្រតិបត្តិការនិយោគ និងអភិវឌ្ឍលើផលិតកម្មបន្លែទាំងការដាំដុះ កែច្នៃ វេចខ្ចប់ រហូតដល់ការនាំចេញទៅកាន់ទីផ្សារក្នុងស្រុក និងបរទេសតាមរយៈការប្រើប្រាស់បច្ចេកវិទ្យាទំនើប ទាន់សម័យពីប្រទេសជប៉ុន។
លោក Masahiro និងលោក វេង សាខុន ក្នុងពិធីចុះអនុស្សរណ
រួមជាមួយគ្នានេះ ភាគីទាំងពីរនាំគ្នាចូលរួមលើកកម្ពស់គុណភាព សុវត្ថិភាពបន្លែនិងនិរន្តរភាពនៃបរិមាណផ្គត់ផ្គង់ដើម្បីឆ្លើយតបតាមតម្រូវការ ឬតាមចំណង់ចំណូលចិត្តអ្នកបរិភោគ និងទីផ្សារនាំចេញ រួមទាំងការលើកកម្ពស់សមត្ថភាពអ្នកផលិត តាមរយៈ ការប្រើប្រាស់បច្ចេកវិទ្យា ខ្សែចង្វាក់តម្លៃបន្ថែម និងនិន្នាការទីផ្សារ) និងការប្រើប្រាស់ធាតុចូល។
ក្រសួងកសិកម្ម បានអនុវត្តកម្មវិធីកំណែទម្រង់វិស័យផលិតកម្មបន្លែកម្ពុជាក្នុងទិសដៅធ្វើទំនើបភាវូបនីយកម្មបន្លែគ្រប់ខ្សែច្រវាក់ផលិតកម្ម ប្រែក្លាយផលិតកម្មបែលលក្ខណៈគ្រួសារ ទៅជាផលិតកម្មបែប កសិ-ឧស្សាហកម្ម ដើម្បីធានាបរិមាណផ្គត់ផ្គង់ គុណភាព និងសុវត្ថិភាពតាមតម្រូវការក្នុងស្រុក និងនាំចេញ។ ក្រុមហ៊ុនជប៉ុនចំនួន ១០ នឹងចូលរួមអភិវឌ្ឍលើខ្សែចង្វាក់ផលិតកម្មបន្លែនៅកម្ពុជា។ នេះបើតាមក្រសួងកសិកម្ម រុក្ខាប្រមាញ់និងនេសាទ៕
© រក្សាសិទ្ធិដោយ thmeythmey.com
