សម្ដេច ហ៊ុន សែន គ្រោងទម្លាក់ថវិកា ៥លានដុល្លារទៀត សម្រាប់ជួយកសិករទូទាំងប្រទេស

ជាតិ

សម្ដេច ហ៊ុន សែន គ្រោងទម្លាក់ថវិកា ៥លានដុល្លារទៀត សម្រាប់ជួយកសិករទូទាំងប្រទេស

17, Jul 2020 , 12:29 am

រូបភាព

ដោយ:

ភ្នំពេញ៖ សម្ដេច ហ៊ុន សែន នាយករដ្ឋមន្ត្រីកម្ពុជា គ្រោងទម្លាក់ថវិកា៥លានដុល្លារអាមេរិក សម្រាប់ជួយកសិករទូទាំងប្រទេស នៅក្នុងវិស័យវារីវប្បកម្ម។ សម្ដេច ថ្លែងដំណើរទស្សនកិច្ចនៅមជ្ឈមណ្ឌលស្រាវជ្រាវ និងអភិវឌ្ឍពូជត្រីនៅស្រុកពាមរក៍ ខេត្តព្រៃវែង កាលពីថ្ងៃទី ១៤ កក្កដា។

សម្ដេច ហ៊ុន សែន មើលឃើញថា វិស័យកសិកម្ម ជាពិសេសវារីវប្បកម្ម (ការចិញ្ចឹមត្រី កង្កែប អន្ទង់ជាដើម) មានលក្ខណៈឋិតឋេរ និងមិនសូវរងផលប៉ះពាល់ឡើយ នៅក្នុងអំឡុងពេលកូវីដ-១៩ នេះ ដែលផ្ទុយពីវិស័យឧស្សាហកម្ម និងសេវាកម្ម។ ដោយមើលឃើញពីភាពវិជ្ជមាននៃវិស័យកសិកម្ម ប្រមុខរដ្ឋាភិបាល គ្រោងទម្លាក់ថវិកា៥លានដុល្លារទៀត ដើម្បីទុកឱ្យពលរដ្ឋយកទៅប្រើប្រាស់ធ្វើជាដើមទុន និងពង្រីកមុខរបរក្នុងផ្នែកវារីវប្បកម្មនេះ។ បច្ចុប្បន្ននេះ រដ្ឋាភិបាល បានទម្លាក់ថវិកា៥០ម៉ឺនដុល្លារ សម្រាប់ជួយដល់កសិករហើយ។

ថ្លែងចំពោះមុខប្រជាកសិករនៅខេត្តព្រៃវែង នាយករដ្ឋមន្ត្រី ហ៊ុន សែន បានបញ្ជាក់ថា៖«ឥឡូវយកទើបអស់កន្លះលាន(ចំណាយ៥០ម៉ឺនដុល្លារ)។ ខ្ញុំថា ឱ្យចំណាយ៥លានដុល្លារថែមទៀត ក៏វាមិនហួសហេតុដែរ ដើម្បីពង្រីកឱ្យកសិករយើងចិញ្ចឹមត្រី ។ អត់ខ្លាចវិនិយោគទេ ព្រោះការវិនិយោគនេះ ជាការិនិយោគបង្កើតការងារឱ្យកសិករ បង្កើតប្រាក់ចំណូលឱ្យកសិករ វាក៏មានតម្លៃ មិនអន់ជាងការវិនិយោគធ្វើសាលារៀននោះទេ ដូច្នេះអត់មានរឿងអីត្រូវខ្លាចវិនិយោគទេ»។

បច្ចុប្បន្ននេះ មានកសិករចិញ្ចឹមត្រីប្រមាណ ៤៦, ០០០គ្រួសារ ខណៈសម្តេចចង់ពង្រីកបន្ថែមឱ្យបានដល់ ១០ម៉ឺនគ្រួសារ ដើម្បីបង្កើនការចិញ្ចឹមត្រីផ្គត់ផ្គង់តម្រូវការទីផ្សារក្នុងស្រុក។

បើតាមរបាយការណ៍របស់ក្រសួងកសិកម្មក្នុងឆ្នាំ២០០៩ ការងារចិញ្ចឹមត្រីបាន ៥ម៉ឺនតោន។ ប៉ុន្តែនៅឆ្នាំ២០១៩វិញ ការងារចិញ្ចឹមត្រីបានចំនួន ៣៧,៤០៨តោន ភ្ញាស់កូនត្រីបាន ២២២លានក្បាល ហើយរយៈពេល ៥ឆ្នាំចុងក្រោយមានកំណើនជាមធ្យម ២០ភាគរយក្នុងមួយឆ្នាំ៕