COVID-19
អន្តរជាតិ
នយោបាយអន្តរជាតិ
លោក ប្រាយុទ្ធ ត្រៀមរុះរើរដ្ឋាភិបាល ក្រោយរដ្ឋមន្ត្រីសំខាន់ៗលាលែងពីតំណែង
× នាយករដ្ឋមន្ត្រី ប្រាយុទ្ធ ចន្ទអូចា នៅថ្ងៃទី១៦ ខែកក្កដា បានបង្ហើបពីគម្រោងរុះរើរដ្ឋាភិបាលរបស់លោក បន្ទាប់ពីឧបនាយករដ្ឋមន្ត្រីម្នាក់ និងរដ្ឋមន្ត្រីសំខាន់ៗដែលទាក់ទងវិស័យសេដ្ឋកិច្ចលាលែងពីតំណែងរៀងៗខ្លួន។ ក្រៅពីមន្ត្រីក្នុងជួរបក្សកាន់អំណាចកម្លាំងប្រជារាស្ត្រ លោក ប្រាយុទ្ធ ក៏សម្លឹងមើលបេក្ខជនខាងក្រៅដើម្បីបំពេញសមាសភាពរដ្ឋាភិបាលថ្មី ស្របពេលរដ្ឋាភិបាលរបស់លោកកំពុងរកផ្លូវអូសថៃចេញពីវិបត្តិ COVID-19 ។
ឧបនាយករដ្ឋមន្ត្រីទទួលបន្ទុកសេដ្ឋកិច្ច Somkid Jatusripitak, រដ្ឋមន្ត្រីហិរញ្ញវត្ថុ Uttama Savanaya, រដ្ឋមន្ត្រីថាមពល Sontirat Sontijirawong, រដ្ឋមន្ត្រីឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ Suvit Maesincee និងអគ្គលេខាធិការរងការិយាល័យនាយករដ្ឋមន្ត្រី Kobsak Pootrakul បានលាលែងពីតំណែងជាបន្តបន្ទាប់នៅថ្ងៃទី១៥ និងទី១៦ ខែកក្កដា។ ឧបនាយករដ្ឋមន្ត្រី Somkid និងរដ្ឋមន្ត្រីទាំងបី ត្រូវបានចាត់ទុកជាក្រុមការងារសេដ្ឋកិច្ចរបស់រដ្ឋាភិបាល។
ពីខេត្តស៊ីសាកេត នាយករដ្ឋមន្ត្រីថៃ ប្រាយុទ្ធ ចន្ទអូចា បានទទួលយកលាលែងពីតំណែងរបស់ថ្នាក់ក្រោមលោក។ លោកអះអាងថា លោកមិនមានសម្ពាធអ្វីឡើយក្នុងការរៀបចំសមាសភាពរដ្ឋាភិបាលថ្មី ហើយលោកគ្រោងបញ្ចេញបញ្ជីឈ្មោះថ្មីនៅខែក្រោយ។ បើតាមកាសែតបាងកកប៉ុស្តិ៍ លោកក៏សារភាពថា បានទាក់ទងបុគ្គលជាច្រើនដើម្បីបំពេញបញ្ជីក្រុមការងារសេដ្ឋកិច្ចជាថ្មីក្នុងការស្រោចស្រង់ប្រទេសពីជំងឺ COVID-19 ព្រមទាំងសមាសភាពរដ្ឋមន្ត្រីឯទៀត។
«ការដោះដូរនឹងធ្វើឡើងឆាប់ៗ។ បញ្ជីឈ្មោះអាចរួចរាល់នៅខែក្រោយ។ ខ្ញុំបានទាក់ទងមនុស្សមួយចំនួនឲ្យចូលរួមក្នុងរដ្ឋាភិបាល ប៉ុន្តែពួកគេមិនទាន់ផ្ដល់ចម្លើយតបវិញឡើយ។» នេះជាការលើកឡើងរបស់លោក ប្រាយុទ្ធ ដែលបង្ហាញការសោកស្ដាយចំពោះការចាកចេញរបស់មន្ត្រីរបស់លោកដែលធ្វើការជាមួយគ្នា។ បើតាមមេដឹកនាំថៃរូបនេះ ការលាលែងរបស់មន្ត្រីគ្រាក់ៗនេះ ផ្ដើមចេញពីរឿងនយោបាយតែម្ដង។
តាមពិតទៅ ការលាលែងរបស់រដ្ឋមន្ត្រីខាងលើ ធ្វើឡើងក្រោយការរុះរើក្បាលម៉ាស៊ីនដឹកនាំបក្សកម្លាំងប្រជារាស្ត្រដែលមានសំឡេងច្រើនក្នុងសម្ព័ន្ធភាពចម្រុះដឹកនាំរដ្ឋាភិបាល។ ដ្បិតបក្សនេះមានសមាសភាពអ្នកនយោបាយមកពីក្រុមផ្សេងគ្នា ការបង្កើតក្បាលម៉ាស៊ីនដឹកនាំថ្មីក៏នាំឲ្យមានការលាលែងពេលនេះដើម្បីបើកផ្លូវឲ្យសមាជិកបក្សមកពីក្រុមផ្សេងទៀតដឹកនាំរដ្ឋាភិបាលម្ដង។ សព្វថ្ងៃ ឧបនាយករដ្ឋមន្ត្រីទទួលបន្ទុកសន្តិសុខ ប្រាវីត វង្សសុវណ្ណ ជាមេបក្សជំនួសលោក Uttama។
ក្នុងសន្និសីទសារព័ត៌មានក្រោយដាក់ពាក្យលាលែង លោក Uttama លើកឡើងថា ក្រុមរបស់លោកឃើញពេលវេលានេះជាចំណុចសក្តិសមត្រូវដើរចេញ ដើម្បីឲ្យថៃឆ្ពោះទៅមុខ និងបន្ធូរសម្ពាធនយោបាយខ្លះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com