COVID-19
អន្តរជាតិ
ករណីឆ្លង COVID-19 នៅឥណ្ឌាឡើងលើសមួយលាននាក់ហើយ
× ករណីឆ្លងជំងឺ COVID-19 នៅឥណ្ឌាបានកើនលើសមួយលាននាក់ហើយ។ នេះបើតាមការប្រកាសរបស់ក្រសួងសុខាភិបាលឥណ្ឌានៅថ្ងៃទី១៧ ខែកក្កដា។ ដើម្បីទប់ស្កាត់ការឆ្លងកាន់តែច្រើន ការរឹតត្បិតសកម្មភាពប្រជាជន ត្រូវបានអនុវត្តនៅតាមតំបន់ជាច្រើនក្នុងប្រទេសអាស៊ីខាងត្បូងមួយនេះ។
បើតាមការប្រកាសរបស់ក្រសួងសុខាភិបាលឥណ្ឌា អ្នកជំងឺ COVID-19 មានសរុប១០០៣៨៣២នាក់ និងស្លាប់ជាង២៥០០០នាក់។ វិធានការបិទប្រទេស ត្រូវបានអនុវត្តជាថ្មីនៅតាមតំបន់ដែលមានការផ្ទុះករណីឆ្លងខ្លាំង បន្ទាប់ពីបានរដ្ឋាភិបាលបានបន្ធូរបន្ថយការរឹតត្បិតខ្លះនាពេលកន្លងមក។
ទីភ្នាក់ងារព័ត៌មាន AFP ផ្សាយថា នៅថ្ងៃទី១៦ ខែកក្កដា រដ្ឋ Bihar ដែលមានប្រជាជន១២៥លាននាក់ និងនៅជាប់ណេប៉ាល់ ត្រូវបានបិទម្ដងទៀតដោយមានរយៈពេល១៥ថ្ងៃ។ សាលារៀន វិហារសាសនា កន្លែងកម្សាន្ត និងទីតាំងមិនចាំបាច់ទូទាំងរដ្ឋនេះ ត្រូវបានបញ្ជាឲ្យបិទ ប៉ុន្តែគេរង់ចាំមើលប្រសិទ្ធភាពបញ្ជានេះក្នុងរដ្ឋមានប្រជាជនច្រើនបែបនេះ។
ដោយឡែក ទីក្រុងបណ្ដុំបច្ចេកវិទ្យា Bangalore វិញ ក៏បានអនុវត្តវិធាការរឹតត្បិតក្នុងសប្ដាហ៍នេះ បន្ទាប់ពីករណីឆ្លងថ្មីហក់ឡើង។ កាកបាទក្រហមអន្តរជាតិព្រមានថា អាស៊ីខាងត្បូង អាចជាកន្លែងផ្ទុះជំងឺ COVID-19 ថ្មី បន្ទាប់ពីអាមេរិក និងតំបន់អាមេរិកខាងត្បូង។
នៅកម្រិតពិភពលោក COVID-19 ចម្លងមនុស្សប្រមាណ១៣,៩លាននាក់ និងស្លាប់ជាង៥៩ម៉ឺននាក់៕
© រក្សាសិទ្ធិដោយ thmeythmey.com