COVID-19
ជាតិ
សុខភាព
កម្ពុជាមានអ្នកជំងឺ COVID-19 ចំនួន១៧១ករណី ក្នុងនោះ៣៨នាក់ កំពុងសម្រាកព្យាបាល
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល
×![]()
ដោយ: រួបរួម
អ្នកកើតជំងឺរលាកសួតដែលបង្កដោយមេរោគកូរ៉ូណាប្រភេទថ្មី (COVID-19) នៅកម្ពុជាឡើងដល់១៧១នាក់ហើយ បន្ទាប់ពីក្រសួងសុខាភិបាលបានជូនព័ត៌មានពីករណីវិជ្ជមាន៥នាក់បន្ថែមទៀត នាថ្ងៃសុក្រ ទី១៧ ខែកក្កដា នេះ។
ក្នុងចំណោមអ្នកជំងឺទាំង១៧១នាក់ មានប្រុស១២៩នាក់ និងស្រី៤២នាក់ ដោយមាន១៣៣នាក់ ដែលស្មើនឹង៧៧.៧៨ភាគរយ បានជាសះស្បើយ។ អ្នកសះស្បើយទាំងនោះដោយមានបុរស ៩៤នាក់ និងស្រី៣៩នាក់។
អ្នកជំងឺ៣៨នាក់ ដែលកំពុងសម្រាកព្យាបាលរួមមាន ជនជាតិខ្មែរ៧នាក់ (ស្រី១នាក់) ពីឥណ្ឌូណេស៊ីបុរសជនជាតិខ្មែរ២៥នាក់ ពីអារ៉ាប៊ីសាអូឌីត ជនជាតិខ្មែរ៣នាក់ (ស្រី១នាក់) ពីសហរដ្ឋអាមេរិកនិងជនជាតិអាមេរិក២នាក់ ដែលទើបមកពីសហរដ្ឋអាមេរិក។
បើគិតចាប់តាំងពីកម្ពុជា បើកទូលាយលើជើងហោះហើរឡើងវិញ ករណីឆ្លងចុងក្រោយ សុទ្ធតែជាករណីនាំចូលដែលត្រូវបានតេស្តឃើញក្រោយ ដែលអ្នកជំងឺធ្វើដំណើរមកដល់អាកាសយានដ្ឋានអន្តរជាតិភ្នំពេញ។ ករណីភាគច្រើនជាពលរដ្ឋខ្មែរ ហើយក្រោយពេលដែលកម្ពុជាកំណត់សេវាកម្មព្យាបាលលើជនបរទេស មានជនជាតិឥណ្ឌូណេស៊ីម្នាក់ដែលជាសះស្បើយ និងអាមេរិក២នាក់ ប៉ុណ្ណោះដែលតេស្តឃើញនៅកម្ពុជា។
ជារួមករណីឆ្លងកូវីដ-១៩ ទាំង១៧១ករណីនៅកម្ពុជា មានខ្មែរ៩៧នាក់ បារាំង៤០នាក់ ម៉ាឡេស៊ី១៣នាក់ អង់គ្លេស៥នាក់ អាមេរិក៤នាក់ ចិន៣នាក់ ឥណ្ឌូណេស៊ី៣នាក់ វៀតណាម៣នាក់ កាណាដា២នាក់ និងបែលហ្ស៊ិក១នាក់។ អ្នកដែលស្ថិតក្រោមការព្យាបាលមានខ្មែរ៣៦នាក់ និងអាមេរិក២នាក់ ដោយកម្ពុជាមិនមានករណីស្លាប់ឡើយ៕
© រក្សាសិទ្ធិដោយ thmeythmey.com
