ជាតិ
សង្គមជាតិ
ស្ត្រីដែលបង្ករបួសលើកុមារី៥ឆ្នាំ ត្រូវចោទពីបទទារុណកម្ម និងអំពើឃោរឃៅ ដោយស្ថានភាពទម្ងន់ទោស
ស្រ្តីដៃដល់ដែលយកកាំបិតវះមុខក្មេងស្រី កំពុងផ្តល់ចម្លើយដល់សមត្ថកិច្ច
×![]()
ភ្នំពេញ៖ ស្ត្រីវ័យ៤៣ឆ្នាំ ឈ្មោះ លីវ ប៊ុនធឿន ដែលយកកាំបិតវះមុខ ច្រមុះ ក្រោមចង្កា និង ដៃរបស់កុមារីអាយុ៥ឆ្នាំ ឈ្មោះ លីយ៉ា នោះ ត្រូវបានសាលាដំបូងរាជធានីភ្នំពេញសម្រេចចោទប្រកាន់ពីបទទារុណកម្ម និងអំពើឃោរឃៅដោយមានស្ថានភាពទម្ងន់ទោសតាមមាត្រា២១១ នៃក្រមព្រហ្មទណ្ឌ ដែលត្រូវប្រឈមជាប់គុកពី១០ទៅ២០ឆ្នាំ។ នេះបើតាមលោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញដែលបានប្រាប់អ្នកសារព័ត៌មានថ្មីៗ។ 
ស្ត្រីដៃដល់ ផ្តល់សារភាពកំហុសនៅមុខសមត្ថកិច្ចថា ខ្លួនខឹងកុមារីរងគ្រោះ ដែលបានធ្វើឲ្យរបួសក្បាលដល់កូនប្រុសខ្លួន រហូតដល់ដេកមិនលក់ពីរយប់ ទើបសម្រេចចិត្តយកកាំបិត ទៅប្រព្រឹត្តបទល្មើសលើក្មេងស្រីរងគ្រោះតែម្តង ដើម្បីសងសឹកឲ្យកូន។ នៅចំពោះមុខប៉ូលិស ស្ត្រីដៃដល់ ប្រាប់ពីការតាំងចិត្តថា ក្មេងស្រីរងគ្រោះ បង្កស្លាកស្នាមលើកូនខ្លួនប៉ុនណា ខ្លួននឹងបង្កស្លាកស្នាមលើក្មេងស្រីរងគ្រោះ ប៉ុននោះដែរ។
ហេតុការណ៍នេះកើតឡើងនៅថ្ងៃទី១៦ ខែកក្កដា ឆ្នាំ២០២០ ដែលស្ថិតនៅបុរីពិភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។ បច្ចុប្បន្នកុមាររងគ្រោះត្រូវបានសម្រាកព្យាបាលនៅមន្ទីរពេទ្យកុមារជាតិ ក្រោមការឧបត្ថម្ភពីសំណាក់សប្បុរជនជាច្រើន៕
Tag:
ស្ត្រី
កុមារ
អំពើហិង្សា
© រក្សាសិទ្ធិដោយ thmeythmey.com
