លោកស្រី កែ ឡេង ជឿ សុរ៉ាឃីម អាចស្នងតំណែង តែលោក ស សុខា ហាក់មិនរំពឹងមាន កែ ឡេង ទីពីរ

កីឡាជាតិ

ជាតិ

លោកស្រី កែ ឡេង ជឿ សុរ៉ាឃីម អាចស្នងតំណែង តែលោក ស សុខា ហាក់មិនរំពឹងមាន កែ ឡេង ទីពីរ

18, Jul 2020 , 4:39 pm

រូបភាព

ដោយ:

កីឡាការិនី កែ ឡេង ម្ចាស់មេដាយមាសពិភពលោក៤ជំនាន់ ជឿថា កីឡាការិនី ស្រ៊ាង សុរ៉ាឃីម នឹងអាចស្នងតំណែងខ្លួនបាន។ ការលើកឡើងបែបនេះ ធ្វើឡើងក្រោយកីឡាការិនីវ័យ៥៨ឆ្នាំរូបនេះ បានសម្រេចចូលនិវត្តន៍ពីអាជីពជាកីឡាការិនីប៉េតង់ ក្រោមហេតុផលមានបញ្ហាសុខភាព និងភ្នែក។ ទោះគ្មានជំនឿកម្ពុជាអាចមានកីឡាការិនី កែ ឡេង ទីពីរ លោក ស សុខា ប្រធានសហព័ន្ធកីឡាប៊ូលនិងប៉េតង់កម្ពុជា ប្តេជ្ញានឹងខិតខំប្រឹងប្រែងអភិវឌ្ឍន៍ធនធានឲ្យឈានទៅរកចំណុចកំពូលដែលសហព័ន្ធចង់បាន។

កីឡាការិនី កែ ឡេង នៅថ្ងៃទី១៧ កក្កដា ឆ្នាំ២០២០ បានសម្រេចប្រកាសបញ្ចប់អាជីពជាកីឡាការិនីប៉េតង់ជាផ្លូវការ ដោយសារកត្តាសុខភាព និងភ្នែកមិនអំណោយផល។ ក្រោយដើរលើវិថីនេះ ជាង៤០ឆ្នាំ កីឡាការិនីវ័យ៥៨ឆ្នាំរូបនេះ បានសាងស្នាដៃថ្នាក់ជាតិ និងអន្តរជាតិជាច្រើនជូនជាតិមាតុភូមិ។ ជាពិសេស ការដណ្តើមបានមេដាយមាសពិភពលោក៤ជំនាន់ ដែលជួយលោកស្រី ក្លាយជាកីឡាការិនីប៉េតង់ទី១លើពិភពលោក។

យើងសង្កេតឃើញថា បច្ចុប្បន្នពុំទាន់មានកីឡាការិនីរូបណាមានសមត្ថភាពខ្លាំងដូចឬប្រហាក់ប្រហែលកីឡាការិនី កែ ឡេង នៅឡើយទេ។ ប៉ុន្តែកីឡារូបនេះអះអាងថា ខ្លួនបានសំឡឹងឃើញកីឡាការិនីដែលអាចស្នងតំណែងលើវិញ្ញាសាវាយពិន្ទុខ្លួនរួចហើយ គឺកីឡាការិនី ស្រ៊ាង សុរ៉ាឃីម។ ប៉ុន្តែលោកស្រី ទាមទារឲ្យ សុរ៉ាឃីម ត្រូវព្យាយាមហ្វឹកហាត់បន្ថែមទៀត ពិសេសលើផ្នែកស្មារតី។

«ខ្ញុំមើលឃើញហើយ(កីឡាការិនី ដែលអាចស្នងតំណែង) គឺកីឡាការិនី សុរ៉ាឃីម គ្នាមានវ័យក្មេងមែន តែមានភាពអំណត់ក្នុងការហ្វឹកហាត់។ គាត់ហាត់បណ្តើរលួចមើលខ្ញុំហ្វឹកហាត់វាយស៊ីបបណ្តើរ ដូច្នេះទោះគាត់មិនអាចស្មើខ្ញុំ ក៏អាចឈាន៧០ទៅ៨០ភាគរយដែរ»។ លោកស្រី កែ ឡេង លើកឡើងដូច្នេះ ហើយបានបន្ថែមថា ការរីកចំរើនរបស់ សុរ៉ាឃីម នៅយឺតដោយសាររូបគេនៅមានវ័យក្មេង ហើយអារម្មណ៍មិនទាន់ស្ងប់ល្អ។

កីឡាការិនី ស្រ៊ាង សុរ៉ាឃីម ធ្លាប់និយាយកន្លងមកថា នាងមិនហ៊ានស្រមៃថា អាចមានសមត្ថភាព និងសាងភាពល្បីល្បាញដូចរៀមច្បងវីរកីឡាការិនី កែ ឡេង ម្ចាស់មេដាយមាសពិភពលោក៤ជំនាន់នោះទេ។ ប៉ុន្តែកីឡាការិនីរូបនេះ ហាក់មានការតាំងចិត្តខ្ពស់ក្នុងការអភិវឌ្ឍន៍សមត្ថភាព និងសាងស្នាដៃជូនជាតិបន្តនៅឆាកអន្តរជាតិ។

ក្នុងបទសម្ភាសជាមួយសារព័ត៌មានថ្មីៗ រូបគេ បានបញ្ជាក់យ៉ាងដូច្នេះថា៖«សម្រាប់ខ្ញុំមិនទាន់ដឹងនោះទេ តែនៅក្នុងចិត្តនៅតែតាំងចិត្តខិតខំប្រឹងប្រែងហ្វឹកហាត់ឲ្យបានល្អ ឲ្យបានខ្លាំង ដើម្បីយកស្នាដៃ ទោះបីមិនបាន១០០ភាគរយដូចគាត់ តែសុំតែ១ភាគពីពួកគាត់ក៏បាន»។

កីឡាការិនី ស្រ៊ាង សុរ៉ាឃីម បានក្លាយជាកីឡាការិនីថ្នាលរបស់សហព័ន្ធអំឡុងឆ្នាំ២០១៤ ក្រោយរូបគេដណ្តើមបានមេដាយសំរឹទ្ធក្នុងការប្រកួតជើងឯកថ្នាក់ជាតិ។ មុនចូលរួមជាមួយសហព័ន្ធរូបគេជាកីឡាការិនីឆ្នើមប្រចាំវិទ្យាល័យអង្គរបូរី ដោយធ្លាប់ឈ្នះមេដាយមាស និងរង្វាន់ម៉ូតូ១គ្រឿង ក្នុងការប្រកួតជម្រើសថ្នាក់ខេត្តដណ្តើមពានរង្វាន់សម្តេចវិបុលបញ្ញា សុខ អាន។

ក្រោយប្រឡូកក្នុងវិស័យកីឡាប៉េតង់ប្រមាណ៦ឆ្នាំ កីឡាការិនីវ័យ២១ឆ្នាំរូបនេះ សម្រេចបានសមិទ្ធផលជាច្រើនទាំងលើថ្នាក់ជាតិ និងអន្តរជាតិ។ សមិទ្ធផលធំៗរបស់ នាង រួមមានមេដាយប្រាក់ និងសំរឹទ្ធពិភពលោកកាលពីឆ្នាំ២០១៧ និងមេដាយមាស Asian Beach Games នៅវៀតណាមឆ្នាំ២០១៦ និងមេដាយមាសក្នុងការប្រកួតកីឡាស៊ីហ្គេមឆ្នាំ២០១៩ នៅហ្វីលីពីន និងមានស្នាដៃជាច្រើនទៀត។ សមិទ្ធផលទាំងនេះជួយឲ្យ សុរ៉ាឃីម ទទួលបានការងារក្នុងក្របខណ្ឌក្រសួងការពារជាតិ និងអាហារូបករណ៍១០០ភាគរយនៅសាកលវិទ្យាល័យទៀតផង។

ជាមួយគ្នានេះ លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជា ហាក់គ្មានជំនឿថា កម្ពុជាអាចមានកីឡាការិនី កែ ឡេង ទីពីរនោះទេ។ ប៉ុន្តែ លោក ប្តេជ្ញានឹងប្រឹងប្រែងដុះខាត់ និងអភិវឌ្ឍន៍ធនធានកីឡាករឲ្យមានគុណភាពកាន់តែប្រសើរថែមទៀត។

«យើងមិនដឹងនិងហ៊ានកំណត់ថា យើងអាចមានបងស្រី កែ ឡេង ទីពីរនោះទេ តែយើងនឹងខិតខំប្រឹងប្រែងបណ្តុះបណ្តាលក្រុមការងារ ពិសេសកីឡាករកីឡាការិនី ឲ្យឈានទៅរកកម្រិតខ្ពស់ ដែលយើងចង់ទៅដល់ទាំងអស់គ្នា»។ នេះជាការលើកឡើងរបស់លោក ស សុខា ហើយបានបន្ថែមថា លោកមិនអាចកំណត់ពីពេលវេលាក្នុងការកសាងធនធានម្នាក់ឲ្យមានគុណភាពខ្ពស់បាននោះទេ។

ប៉ុន្តែ លោក អះអាងថា បច្ចុប្បន្នសហព័ន្ធកំពុងខិតខំធ្វើលើកិច្ចការអភិវឌ្ឍធនធានកីឡាករនេះ។ លោកបាននិយាយដូច្នេះថា៖«ក្នុងការស្វែងរកគ្រាប់ពេជ្របន្ទាប់ពីបង កែ ឡេង យើងកំពុងធ្វើរាល់ថ្ងៃ ហើយគ្រាប់ពេជ្ររបស់យើងកំពុងសំលៀង»។

ទោះបីកីឡាការិនី កែ ឡេង បានបញ្ចប់អាជីពជាកីឡាការិនីប៉េតង់ក៏ដោយ លោកស្រី មិនទៅណាឆ្ងាយពីវិស័យកីឡាមួយនេះឡើយ។ ពោលគឺ លោកស្រី នឹងជួយសហព័ន្ធលើការបណ្តុះបណ្តាលធនធានថ្នាល ខណៈបច្ចុប្បន្ន លោកស្រី ក៏ជាគ្រូបង្វឹកមួយរូបនៅសមាគមកីឡាកងយោធពលខេមរភូមិន្ទផងដែរ។

ម្ចាស់មេដាយមាសពិភពលោក៤ជំនាន់ជាប់គ្នារូបនេះអះអាងថា លោកស្រី មិនទទួលសំណើរទៅបង្វឹកនៅក្រៅប្រទេសនោះទេ។ អ្នកកំពង់ឆ្នាំងរូបនេះប្តេជ្ញាថា ខ្លួននឹងខិតខំរួមចំណែកជួយបណ្តុះបណ្តាលធនធានប៉េតង់កម្ពុជាឲ្យតែសម្បូរបែប តាមរយៈការចែករំលែកបទពិសោធ ដែលខ្លួនមាន ទៅដល់យុវជនទាំងនោះ។ លោកស្រី កែ ឡេង ត្រូវបានតែងតាំងឲ្យធ្វើជាទីប្រឹក្សាសហព័ន្ធកីឡាប៊ូល និងប៉េតង់៕