សង្គមអន្តរជាតិ
អន្តរជាតិ
ក្មេងប្រុស៦ឆ្នាំម្នាក់ ទទួលការកោតសរសើរពីតារាអាមេរិកល្បីៗក្រោយជួយសង្គ្រោះប្អូនស្រីពីឆ្កែខាំ
× ក្មេងប្រុសអាយុ៦ឆ្នាំម្នាក់ ទទួលការកោតសរសើរពីសំណាក់តារាអាមេរិកល្បីៗជាច្រើនចំពោះភាពក្លាហានខ្លួនក្នុងការជួយសង្គ្រោះប្អូនស្រីពីឆ្កែខាំ។ អ្នកទាំងនោះគឺមានដូចជា Chris Evans, Robert Downey Jr និង Chris Hemsworth ដែលជាតារាសម្តែងតួវីរបុរសក្នុងចក្រវាល Marvel ក្នុងខ្សែភាពយន្ត Avengers ។
កុមារា Bridger Walker ដែលរស់នៅរដ្ឋ Wyoming ហ៊ានយកខ្លួនទៅពាំងការពារប្អួនស្រី ខណៈឆ្កែធំមួយក្បាលបម្រុងហក់ទៅខាំនាង។ ហេតុការណ៍នេះបានកើតឡើងកាលពីថ្ងៃទី ៩ ខែកក្កដាកន្លងទៅ ។
ប្អូនប្រុសរូបនេះ ត្រូវឆ្កែខាំធ្ងន់ធ្ងរ ត្រង់ចំណុចថ្ពាល់ ហើយត្រូវពេទ្យវះកាត់ជាបន្ទាន់ ដោយហេតុថា រូបគេនេះមានស្នាមរហែកជាច្រើនឆ្នូតលើមុខ។ បន្ទាប់ពីហេតុការណ៍នេះ ឪពុកម្ដាយរបស់ក្មេងប្រុសតូចនេះ បាននិយាយថា៖«ប្រសិនបើនរណាម្នាក់ត្រូវស្លាប់នោះ ខ្ញុំគិតថា វាគួរតែកើតលើខ្ញុំ»។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
រឿងរ៉ាវរបស់ក្មេងប្រុសនេះ បានល្បីសុសសាយលើបណ្ដាញសង្គម ហើយតារាល្បីឈ្មោះជាច្រើននាក់បានប្រតិកម្មចំពោះរឿងនេះ ដោយសរសេរសារគាំទ្រលើកទឹកចិត្តរូបគេ។
ក្នុងចំណោមនោះ លោក Chris Evans ដែលជាតារាសម្តែងដើរតួ Captain America ក្នុងភាពយន្ត Avengers ដែលជា Idolរបស់ក្មេងប្រុសរងគ្រោះនេះ បាននិយាយតាមរយៈវីដេអូលើ Instagram ក្នុងសប្តាហ៍នេះថា៖«ប្អូនគឺជាវីរបុរស អ្វីដែលប្អូនប្រុសបានធ្វើគឺពិតជាក្លាហាន ហើយប្អូនស្រីរបស់អ្នក គឺសំណាងខ្លាំងណាស់ ដែលមានអ្នកជាបងប្រុស»។ លោកបន្តថា៖«ឪពុកម្ដាយអ្នក ប្រាកដជាមានមោទនកភាពចំពោះអ្នកហើយ»។
ក្រៅពី Chris Evans លោក Robert Downey Jr ដែលសម្តែងជាតួ Iron Man ក្នុងរឿង Avengers ក៏បានសន្យាផ្ដល់អំណោយពិសេសឲ្យទៅក្មេងប្រុស Bridger សម្រាប់ខួបកំណើតគេនាពេលខាងមុខផងដែរ។
ចំណែក លោក Chris Hemsworth ដែលដើរតួ Thor ក្នុងខ្សែភាពយន្តវីរបុរសក្នុងចក្រវាល Marvel ដូចគ្នានេះ ក៏បានលើកសរសើរក្មេងប្រុស Bridger ថា គំរូនៃភាពក្លាហាន។ លោកនិយាយដូច្នេះថា៖«ភាពក្លាហានរបស់ប្អូន គឺធ្វើឲ្យគ្រប់គ្នាភ្ញាក់ផ្អើលជាខ្លាំង»៕
© រក្សាសិទ្ធិដោយ thmeythmey.com