ជាតិ
សង្គមជាតិ
២៥ខេត្ត/រាជធានី
អាជ្ញាធរគ្រោងពង្រីកស្ដង់លក់បន្លែសុវត្ថិភាព «សៅរ៍-អាទិត្យ» ដើម្បីបំពេញតម្រូវការអ្នកទិញ
× សៀមរាប៖ បន្លែសុវត្ថិភាពកំពុងមានតម្រូវទីផ្សារល្អ សម្រាប់ប្រជាពលរដ្ឋក្នុងខេត្តសៀមរាប។ ពលរដ្ឋដែលមានជីវភាពមធ្យម បានងាកមកជ្រើសរើសបន្លែសុវត្ថិភាព ដោយសារភាពជឿជាក់ពីកសិករខ្មែរ ពិសេសគឺមានប្រភពច្បាស់លាស់ មិនខ្លាចប៉ះពាល់សុខភាព។ ស្ដង់លក់បន្លែសុវត្ថិភាព ដែលដាក់លក់រៀងរាល់ព្រឹកថ្ងៃសៅរ៍-អាទិត្យ គ្រោងនឹងពង្រីកការលក់ដូរបន្ថែម ក្នុងនោះអាជ្ញាធរក៏មានគម្រោងដាក់លក់នៅពេលល្ងាចផងដែរ។
លោក ភឿន គឹមលី ប្រធានមន្ទីរពាណិជ្ជកម្មខេត្តសៀមរាប បានឱ្យដឹងថា ពលរដ្ឋកាន់តែច្រើន បង្ហាញការគាំទ្រចំពោះបន្លែនិងផ្លែឈើដែលនាំមកលក់ដោយកសិករនានាតាមបណ្ដាស្រុកមួយចំនួនក្នុងខេត្តសៀមរាប។ លោកបន្ថែមថា បច្ចុប្បន្នស្ដង់លក់ដូរដែលស្ថិតនៅលើសួនច្បារមហាសណ្ឋាគារអង្គរ មានចំនួន១១ស្ដង់ ដែលដាក់លក់ដោយកសិករមកពីស្រុកបន្ទាយស្រី ស្វាយលើ សូទ្រនិគម ប្រាសាទបាគង ក្រុងសៀមរាប និងស្រុកពួកជាដើម ដែលសុទ្ធសឹងជាបន្លែនិងផ្លែឈើសុវត្ថិភាព។
លោកប្រធានមន្ទីរពាណិជ្ជកម្មបញ្ជាក់ថា នៅខែក្រោយនេះផ្សារសៅរ៍អាទិត្យដែលគាំទ្រដោយរដ្ឋបាលខេត្ត មន្ទីរពាណិជ្ជកម្ម និងមន្ទីរកសិកម្ម រុក្ខាប្រមាញ់ និងនេសាទ គ្រោងពង្រីក៥ស្ដង់ទៀតដើម្បីបំពេញតម្រូវការអ្នកទិញ។ លើសពីនេះ អាជ្ញាធរគ្រោងរៀបចំការលក់នៅពេលល្ងាចបន្ថែមទៀត ក្រោយស្ងប់ស្ងាត់ជំងឺកូវីដ១៩ ជំនួសឱ្យការលក់តែពេលព្រឹកចាប់ពីម៉ោង៧ដល់ម៉ោង១១។ លោក ភឿន គឹមលី បញ្ជាក់ថា ការលក់ពេលល្ងាចគឺលក់តែប្រភេទផ្លែឈើតែប៉ុណ្ណោះ៕
Tag:
បន្លែសុវត្ថិភាព
កសិកម្ម
© រក្សាសិទ្ធិដោយ thmeythmey.com