ជាតិ
សង្គមជាតិ
ស្ត្រីខ្មែរ-អាមេរិកដែលរត់ពីភ្នំពេញ ត្រូវបានរកឃើញនៅកំពង់ចាម ហើយបន្តធ្វើចត្ដាឡីស័កនៅទីនោះ ស្រ្តីដែលរត់ចេញពីកន្លែងធ្វើចត្តាឡីស័ក ដែលសមត្ថកិច្ចបានរកឃើញនៅខេត្តកំពង់ចាម។ រូបភាព៖BTV
× ភ្នំពេញ៖ ស្ត្រីជនជាតិខ្មែរ-អាមេរិក ដែលរត់ពីកន្លែងចត្តាឡីស័កនៅភ្នំពេញ ត្រូវបានរកឃើញវិញហើយនៅខេត្តកំពង់ចាម។ នេះបើតាមលោក អ៊ុន ចាន់ដា អភិបាលខេត្តកំពង់ចាម ដែលបានបញ្ជាក់ដល់អ្នកសារព័ត៌មានថ្មីៗតាមទូរសព្ទ។
លោកបន្តថា បន្ទាប់ពីរកឃើញភ្លាម អាជ្ញាធរ បានដាក់ស្ត្រីរូបនោះធ្វើចត្តាឡីស័កនៅសណ្ឋាគារមួយកន្លែងនៅក្រុងកំពង់ចាម។
លោ អ៊ុន ចាន់ដា អភិបាលខេត្តកំពង់ចាម បានបញ្ជាក់ថា ស្ត្រីរូបនេះបានចាកចេញពីភ្នំពេញមកកំពង់ចាម ដោយជិះរថយន្តតាក់ស៊ី។ បើតាមការសារភាពរបស់ស្ត្រីនោះ ប្រាប់សមត្ថកិច្ចបានអះអាងថា នាងបានធ្វើដំណើរដោយជួលរថយន្តតាក់ស៊ីជិះតែម្នាក់ឯង។
លោក អភិបាលខេត្តកំពង់ចាមរូបនេះនិយាយដូច្នេះថា៖«គាត់បានចាកចេញពីភ្នំពេញពីម៉ោង៧ល្ងាច ហើយមកដល់កំពង់ចាមម៉ោង១០យប់។ ដូច្នេះ យើងនឹងនាំគាត់ធ្វើចត្តាឡីស័កនៅសណ្ឋាគារមួយដែលយើងបានរៀបចំ»។
យ៉ាងណាមិញ លោក ចាន់ដា និយាយថា លោកពុំទាន់ដឹងពីមូលហេតុដែលស្ត្រីរូបនេះចាកចេញពីភ្នំពេញធ្វើដំណើរទៅកាន់ខេត្តកំពង់ចាមឡើយ។ បើតាមលោក ចាន់ដា ស្ត្រីរូបនេះគ្មានរោគចេញសញ្ញាទាក់ទងនឹងជំងឺកូវីដ-១៩នោះទេ។
ទាក់ទងព័ត៌មានអ្នកដែលបានប្រាស្រ័យទាក់ទងនឹងស្ត្រីរូបនេះ លោកអភិបាលខេត្តកំពង់ចាម អះអាងថា អាជ្ញាធរជំនាញនឹងបន្តសាកសួរនៅថ្ងៃស្អែកបន្ថែម ខណៈកិច្ចការចម្បងនៅពេលនេះគឺទុកដាក់ស្ត្រីរូបនេះនៅមណ្ឌលចត្តាឡីស័កជាមុនសិន៕
© រក្សាសិទ្ធិដោយ thmeythmey.com