កីឡាអន្តរជាតិ
អន្តរជាតិ
Aubameyang ស៊ុត២គ្រាប់ជួយ Arsenal ទម្លាក់ Man City ឡើងវគ្គផ្តាច់ព្រ័ត្រ FA Cup
×![]()
ដោយ: ទេព ពិទូរ្យ
Arsenal បានទម្លាក់ក្រុមម្ចាស់ជើងឯកចាស់ Manchester City ដើម្បីឡើងទៅកាន់វគ្គផ្តាច់ព្រ័ត្រពានរង្វាន់ FA Cup ឆ្នាំ ២០២០នេះ។ អ្នកចាត់ការក្រុមកាំភ្លើងធំ Mikel Arteta យកឈ្នះក្រុមអតីតមេខ្លួនលោក Pep Guardiola ដោយលទ្ធផល ២-០ ក្នុងការប្រកួតវគ្គពាក់កណ្តាលផ្តាច់ព្រ័ត្រដែលធ្វើឡើងនៅកីឡដ្ឋាន Wembley យប់ថ្ងៃទី១៨ ខែកក្កដា។
២គ្រាប់របស់ខ្សែប្រយុទ្ធឆ្នើម Pierre-Emerick Aubameyang នៅនាទី១៩ និង៧១ គ្រប់គ្រាន់ដើម្បីនាំក្រុមរបស់លោក Arteta ឈានដល់វគ្គផ្តាច់ព្រ័ត្រ FA Cup ជាលើកទី២១។ នេះមានន័យថា Arsenal ឆ្លងចូលវគ្គផ្តាច់ព្រ័ត្រច្រើនជាងគេដោយលើស Manchester United មួយលើក ចាប់តាំងពីពាននេះកកើតឡើងនៅឆ្នាំ១៩២៣មក។ សព្វថ្ងៃក្រុមដែលមានមូលដ្ឋានក្នុងក្រុងឡុងដ៏មួយនេះក៏ជាក្រុមឈ្នះជើងឯក FA Cup ច្រើនជាងគេផងដែរ ចំនួន១៣លើក លើសគូប្រជែងបិសាចក្រហមដែលឈ្នះ១២លើក។
យ៉ាងណាក៏ដោយ Man Utd ដែលមានលោក Ole Gunnar Solskjær ជាអ្នកចាត់ការ អាចមានឱកាសនាំក្រុមឈានចូលវគ្គផ្តាច់ព្រ័ត្រ FA Cup នេះជាលើកទី២១ដូចគ្នា ប្រសិនបើពួកគេយកឈ្នះ Chelsea នាការប្រកួតវគ្គ១/២ផ្តាច់ព្រ័ត្រនៅយប់ថ្ងៃទី១៩ ខែកក្កដានេះ។
Arsenal ត្រូវរង់ចាំជំនួបរវាង Man Utd និង Chelsea នេះ ដើម្បីយកមួយក្រុមទៅប៉ះគ្នាជាមួយខ្លួននៅវគ្គផ្តាច់ព្រ័ត្រដែលនឹងធ្វើឡើងនៅរាត្រីថ្ងៃទី១ ខែសីហា នៅកីឡដ្ឋាន Wembley ដដែលនេះ។ ប្រសិនបើបិសាចក្រហមអាចឆ្លងចូលវគ្គផ្តាច់ព្រ័ត្រហើយដណ្តើមយកពាននេះបានពី Arsenal សម្រាប់ឆ្នាំ២០២០ នោះ Man Utd ក៏នឹងអាចតាមស្មើកំណត់ត្រាឈ្នះ FA Cup ចំនួន ១៣លើកដូចគ្នាដែរ៕
Tag:
FA Cup
© រក្សាសិទ្ធិដោយ thmeythmey.com
