COVID-19
អន្តរជាតិ
នយោបាយអន្តរជាតិ
ផ្ទុះបាតុកម្មមួយនៅបាងកក ទាមទារឲ្យរដ្ឋាភិបាលលោកប្រាយុទ្ធលាលែង
× បាតុករថៃប្រមាណ២៥០០នាក់ បានចេញតវ៉ាតាមដងផ្លូវទីក្រុងបាងកកនៅយប់ថ្ងៃទី១៨ ខែកក្កដា ដោយទាមទារឲ្យរដ្ឋាភិបាលនាយករដ្ឋមន្ត្រី ប្រាយុទ្ធ ចន្ទអូចា លាលែង និងរំលាយសភាចោល។ ការធ្វើបាតុកម្មអំឡុងពេលវិបត្តិ COVID-19នេះ ត្រូវបានចាត់ទុកជាការតវ៉ាតាមដងផ្លូវធំបំផុតមួយ ចាប់តាំងពីរដ្ឋប្រហារឆ្នាំ២០១៤មក។
ក្រុមបាតុករថៃ បានប្រមូលផ្ដុំគ្នានៅក្បែរវិមានប្រជាធិបតេយ្យក្នុងទីក្រុង បាងកក ដោយតវ៉ាប្រឆាំងរដ្ឋាភិបាលស៊ីវិលអាយុ១ឆ្នាំរបស់លោក ប្រាយុទ្ធ ចន្ទអូចា ដែលជាអតីតមេរដ្ឋប្រហារទម្លាក់រដ្ឋាភិបាលស្របច្បាប់កាលពី៦ឆ្នាំមុន។
អ្នករៀបចំបាតុកម្មនេះ បានដាក់ចេញការទាមទារចំនួន៣ រួមមាន រំលោយសភាចោល បញ្ចប់ការបៀតបៀនលើអ្នករិះគន់រដ្ឋាភិបាល និងធ្វើវិសោធនកម្មលើរដ្ឋធម្មនុញ្ញដែលរៀបរៀងដោយយោធា ដែលគេជឿថាជួយឲ្យបក្សលោកប្រាយុទ្ធឈ្នះការបោះឆ្នោតកាលពីឆ្នាំមុន។ នេះ សំដៅលើនីតិវិធីតែងតាំងសមាជិកព្រឹទ្ធសភាថៃ។
យ៉ាងណាមិញ ក្រុមប៉ូលិសថៃ នៅឈរប្រចាំការនៅទីនោះ ប៉ុន្តែសម្រេចមិនធ្វើសកម្មភាពអ្វីដើម្បីបញ្ឈប់បាតុកម្មនេះឡើយ។
តាមការចុះផ្សាយរបស់ទីភ្នាក់ងារព័ត៌មាន Reuters បាតុកម្មបានចាប់ផ្ដើមដោយសិស្សមួយក្រុម តែអំឡុងពេលល្ងាច មនុស្សរាប់រយនាក់ទៀតបានចូលរួម ដែលបង្កើនតួលេខដល់ ២៥០០នាក់។ នេះបើតាមការប៉ាន់ស្មានរបស់អ្នករៀបចំ ហើយប៉ាន់ស្មានដោយអ្នកព័ត៌មាននៅកន្លែងកើតហេតុ។
ការតវ៉ានេះ បានបំបែកនៅពាក់កណ្ដាលយប់ តែក្រុមអ្នករៀបចំបាតុកម្ម បានអះអាងថា ពួកគេនឹងវិលត្រលប់មកតវ៉ាតាមដងផ្លូវទៀតក្នុងពេល២សប្តាហ៍ ប្រសិនបើការទាមទារពួកគេមិនសម្រេចជោគជ័យទេនោះ។
មែនទែនទៅ រដ្ឋាភិបាលលោកប្រាយុទ្ធ រងការរិះគន់ខ្លាំងឡើងៗពីសំណាក់សាធារណជនថៃក្នុងពេលរយៈពេលប៉ុន្មានខែចុងក្រោយ។ ចាប់តាំងពីប្ដូរពីរដ្ឋាភិបាលសឹកទៅស៊ីវិលរួច តុលាការក្រុងបាងកក បានរំលាយបក្សប្រឆាំងធំទី២ ដែលផ្ដល់អំណាចឲ្យបក្សលោកប្រាយុទ្ធកាន់តែខ្លាំងក្នុងសភា។
ដោយសារទំនាស់ផ្ទៃក្នុង សមាជិកគណៈរដ្ឋមន្ត្រីថៃមួយចំនួនដែលទទួលបន្ទុកកិច្ចការសេដ្ឋកិច្ច បានលាលែងពីតំណែង កាលពីក្នុងសប្តាហ៍នេះ ដែលធ្វើឲ្យបញ្ហាសេដ្ឋកិច្ចដោយបង្កឡើងដោយ COVID-19 កាន់តែពិបាកគ្រប់គ្រង៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com