COVID-19
អន្តរជាតិ
ប្រធានាធិបតីអ៊ីរ៉ង់ Hassan Rouhani (AFP)
×![]()
ប្រធានាធិបតីអ៊ីរ៉ង់ Hassan Rouhani នៅថ្ងៃទី១៨ ខែកក្កដា បានបញ្ជាក់ថា ប្រជាជនអ៊ីរ៉ង់ ២៥លាននាក់ អាចឆ្លងជំងឺ COVID-19 ។ ជារឿងគួរឲ្យភ្ញាក់ផ្អើល តួលេខដែលមេដឹកនាំនេះបានលើកឡើង គឺខុសគ្នាឆ្ងាយដាច់ពីតួលេខផ្លូវការដែលមានត្រឹម ២៧១ ៦០៦ករណី គិតត្រឹមថ្ងៃសៅរ៍ដដែល។ 
«ការប៉ាន់ស្មានរបស់យើង គឺថា មកទល់ពេលនេះ ប្រជាជនអ៊ីរ៉ង់ ២៥លាននាក់ បានឆ្លង COVID-19 ហើយប្រមាណ ១៤០០០នាក់ បានបាត់បង់ជីវិត»។ លោកប្រធានាធិបតី Rouhani បញ្ជាក់បែបនេះក្នុងសុន្ទរកថា ដែលចាក់ផ្សាយលើទូរទស្សន៍។
បើតាម Reuters លោកបន្តថា ម្យ៉ាងទៀត វាមានលទ្ធភាពដែលមនុស្សចន្លោះពី៣០ ទៅ ៣៥លាននាក់ទៀត នឹងប្រឈមហានិភ័យចំពោះវីរុសនេះ។ យ៉ាងណាមិញ លោកពុំបានបញ្ជាក់ព័ត៌មានលម្អិតជុំវិញការលើកឡើងនេះឡើយ។
ទាក់ទិននឹងរឿងនេះ ការិយាល័យរបស់លោក Rouhani បញ្ជាក់ថា តួលេខឆ្លងប្រមាណ២៥លាននាក់ ដែលស្មើ៣០ភាគរយនៃប្រជាជនអ៊ីរ៉ង់សរុប ៨០លាននាក់នេះ គឺ ផ្អែកលើសេណារីយ៉ូប៉ាន់ស្មានមួយ ដែលដកស្រង់ពីរបាយការណ៍ស្រាវជ្រាវរបស់ក្រសួងសុខាភិបាលអ៊ីរ៉ង់។
យ៉ាងណាមិញ មន្ត្រីអ៊ីរ៉ង់ម្នាក់នៅក្រុមការងារប្រយុទ្ធប្រឆាំង COVID-19 របស់រដ្ឋាភិបាល បានអះអាងថា មនុស្ស២៥លាននាក់ដែលលោកប្រធានាធិបនីបានលើកឡើងនោះ គឺជាអ្នកជំងឺមានរោគសញ្ញាស្រាល ដែលមិនត្រូវការសម្រាកព្យាបាលនៅមន្ទីរពេទ្យ។ នេះបើតាមការចុះផ្សាយរបស់ទីភ្នាក់ងារព័ត៌មានរដ្ឋអ៊ីរ៉ង់ ISNA ។
សូមបញ្ជាក់ថា អ៊ីរ៉ង៉ គឺជាប្រទេសក្នុងតំបន់មជ្ឈិមបូព៌ាមួយដែលរងគ្រោះខ្លាំងបំផុតដោយជំងឺរាតត្បាតសកល COVID-19 ខណៈករណីឆ្លងនិងស្លាប់បន្តហក់ឡើងខ្ពស់ ចាប់តាំងពីការរឹតត្បិត COVID-19 ត្រូវបានបន្ធូរបន្ថយ ពីដើមខែមេសាមក។
នៅថ្ងៃទី ១៨ ខែកក្កដា ក្រសួងសុខាភិបាលអ៊ីរ៉ង់ បានរាយការណ៍ករណីស្លាប់ ១៨៨នាក់ ក្នុងពេលត្រឹម២៤ម៉ោង ដែលធ្វើឲ្យករណីស្លាប់សរុបក្នុងប្រទេសនេះឡើងដល់ ១៣ ៩៧៩នាក់ហើយ។ ដោយមើលឃើញបញ្ហានេះកាន់តែធ្ងន់ធ្ងរ អាជ្ញាធរអ៊ីរ៉ង់បានចាប់ផ្ដើមដាក់ចេញការរឹតត្បិតឡើងវិញក្នុងរដ្ឋធានី តេហេរ៉ង់ និងតំបន់មួយចំនួនទៀត ដើម្បីទប់ស្កាត់ការរាលដាល៕
Tag:
អ៊ីរ៉ង់
COVID-19
© រក្សាសិទ្ធិដោយ thmeythmey.com
