ផលិតជីកសិកម្មពីកាកសំណល់ផ្លែឈើរបស់កញ្ញា ចាន់សេរីរ័ត្ន បានការគាំទ្រច្រើនពីកសិករ

ជាតិ

សង្គមជាតិ

សុខភាព

២៥ខេត្ត/រាជធានី

ផលិតជីកសិកម្មពីកាកសំណល់ផ្លែឈើរបស់កញ្ញា ចាន់សេរីរ័ត្ន បានការគាំទ្រច្រើនពីកសិករ

19, Jul 2020 , 8:30 pm

រូបភាព

កញ្ញា-ប៊ុត-ចាន់សេរីរ័ត្ន-កំពុងនៅកន្លែងផលិត-និងរក្សាទុកជី-នៅខាងក្រោយផ្ទះកញ្ញាដែលស្ថិតនៅសង្កាត់ក្បាលកោះ-ខណ្ឌមានជ័យ-ភ្នំពេញ។

ដោយ: អ៊ូ សុខមាន (OU Sokmean)

ភ្នំពេញ៖ ជាង១០ឆ្នាំមកហើយដែលកញ្ញា ប៊ុត ចាន់សេរីរ័ត្ន ផលិតជីកសិកម្មប្រភេទទឹក ពីកាកសំណល់ផ្លែឈើគ្រប់ប្រភេទ សម្រាប់ប្រើប្រាស់លើការចិញ្ចឹមសត្វ និងការដាំដំណាំចម្រុះ។ បើតាម កញ្ញា ចាន់សេរីរ័ត្ន ការប្រើប្រាស់ជីកសិកម្មនេះ ក្រៅពីធ្វើឱ្យដំណាំរបស់ប្រជាកសិករមានគុណភាពនិងសុវត្ថិភាពនោះហើយ ក៏ផ្តល់នូវទិន្នផលបានល្អ និងច្រើន មិនចាញ់នឹងការប្រើជីក៏ដូចថ្នាំពុលគីមីកសិកម្ម ឡើយ។ កញ្ញាវ័យ២៥ឆ្នាំរូបនេះ បានអះអាងថា បច្ចុប្បន្នជីកសិកម្មនេះកំពុងមានគាំទ្រនិងតម្រូវការច្រើនពីប្រជាកសិករ។

កាកសំណល់ផ្លែឈើនានា ដូចជាល្ហុង ស្វាយទុំ ចេក ឪឡឹក ម្នាស់ និងផ្លែឈើផ្សេងៗនោះ កញ្ញា ចាន់សេរីរ័ត្ន អាចយកមកផលិតទៅជាជីកសិកម្មបាន៤ប្រភេទ។ ក្នុងនោះមាន ប្រភេទជីសម្រាប់ការពាររបស់ដំណាំ ដែលផ្តល់ភាវរស់ក្នុងដី ជួយឱ្យដីធូរ មានជីវជាតិ និងកំចាត់បាក់តេរី។ ប្រភេទជីបណ្តេញសត្វល្អិត (ពពួកសត្វចង្រៃ ដូចជា ក្រា បាក់តេរីផ្សេងៗ)។ ប្រភេទបំប៉នពិសេស គឺប្រើសម្រាប់បំប៉នឬសដំណាំ ដើម ស្លឹកឱ្យឆាប់លូសលាស់ និងធំធាត់ល្អ។ រីឯជីទឹកមួយប្រភេទ គឺប្រើប្រាស់ទៅការចិញ្ចឹមសត្វគ្រប់ប្រភេទ ដើម្បីផ្តល់សារធាតុចិញ្ចឹមការខ្ពស់ ជួយការពារជំងឺសត្វឬបាត់តេរីដែលមាននៅក្នុងទ្រង់ និងលាមកសត្វ។

ជីកសិកម្មបប្រភេទទឹក ដែលកញ្ញា ប៊ុត ចាន់សេរីរ័ត្ន ច្រកដាក់កាដុងចំណុះ៣០លីត្រ សម្រាប់លក់ឱ្យអតិថិជន។

ជារៀងរាល់សប្តាហ៍ កញ្ញា ចាន់សេរីរ័ត្ន អាចលក់ជីកសិកម្មនេះ បានយ៉ាងណាស់១ពាន់លីត្រ ទៅឱ្យម្ចាស់កសិដ្ឋានដំណាំធំៗនៅបណ្តាខេត្តនានា។ បើតាមយុវតីដែលចេះជំនាញផលិតជីកសិកម្មពីឪពុកតាំងពីកុមារភាពរូបនេះ ក្រៅពីមានម្ចាស់កសិដ្ឋានដំណាំធំៗទទួលទិញជាប្រចាំហើយនោះ ក៏មានដេប៉ូផ្គត់ផ្គង់ផលិតផលកសិកម្មបម្រើដល់ការដាំដុះទទួលទិញដើម្បីលក់បន្ត និងមានប្រជាកសិករដាំដំណាំលក្ខណៈគ្រួសារទិញច្រើនផងដែរ។ ពិសេសប្រជាកសិករ ដែលប្រែក្លាយពីការដាំបន្លែដោយប្រើប្រាស់ជីនិងថ្នាំពុលគីមី មកដាំបន្លែសុវត្ថិភាពវិញ។

កញ្ញា ប៊ុត ចាន់សេរីរ័ត្ន បាននិយាយប្រាប់សារព័ត៌មានថ្មីៗ(ThmeyThmey)ដូច្នេះ៖«ក្នុងរយៈពេល៣ឆ្នាំចុងក្រោយនេះ ជីទឹកកសិកម្មរបស់ខ្ញុំមានការទទួលស្គាល់និងគាំទ្រពីកសិកម្មគ្រប់មជ្ឈដ្ឋាន ដោយថ្ងៃខ្លះខ្ញុំផលិតមិននឹងទាន់តម្រូវការអ្នកបញ្ជាទិញក៏មានដែរ»។ ចាន់សេរីរ័ត្ន បន្តអះអាងទៀតថា៖« ជីកសិកម្មដែលខ្ញុំផលិតពីផ្លែឈើនេះ គឺផលិតចេញរូបមន្តប្រចាំគ្រួសារ និងគ្មានការទិញសារធាតុមេផលិតពិខាងក្រៅប្រទេសឡើយ ហើយជីដែលខ្ញុំផលិតលក់នេះ គឺមានការទទួលស្គាល់ពីអាជ្ញាធរពាក់ព័ន្ធ។ ពិសេស គឺពីមន្ទីរកសិកម្មរុក្ខាប្រមាញ់ និងនេសាទ ខេត្តកណ្តាល»។

កញ្ញា ចាន់សេរិរ័ត្ន រៀបជីដាក់ឡានដើម្បីដឹកជូនអតិថិជន។

ជាមួយនឹងគ្នានេះ យុវតីដែលមានទីលំនៅក្នុងសង្កាត់ក្បាលកោះ ខណ្ឌមានជ័យ រាជធានីភ្នំពេញរូបនេះ បានបញ្ជាក់ថា ការបង្កើតជីកសិកម្មនេះឡើង គឺដើម្បីចង់រួមចំណែកឱ្យប្រជាកសិករផលិត នូវផលិតផលកសិកម្មដែលមានសុវត្ថិភាពសម្រាប់ប្រកួតប្រជែងនៅលើទីផ្សារ ដោយចំណាយថ្លៃដើមតិច បើប្រៀបធៀបនឹងការប្រើប្រាស់ជី-ថ្នាំពុលគីមីកសិកម្ម ដែលមានតម្លៃខ្ពស់ និងគ្រោះថ្នាក់ដល់សុខភាព៕

ជីកសិកម្មរបស់កញ្ញា ចាន់សេរីរ័ត្ន មានតម្លៃពី៣០,០០០ទៅ៥០,០០០រៀលក្នុងមួយកាដុងដែលមានចំណុះ៥លីត្រ និងតម្លៃពី១៦០,០០០ទៅ២១០,០០០រៀល ក្នុងចំណុះ៣០លីត្រ។ កញ្ញាបានបញ្ជាក់ថា ទឹកជីនេះមួយលីត្រ អាចជាមួយទឹកធម្មតាបានរហូតដល់១០០ទៅ២០០លីត្រ សម្រាប់ប្រើប្រាស់ទៅដំណាំនីមួយៗ៕