COVID-19
២៥ខេត្ត/រាជធានី
អាជ្ញាធរ ផ្អាកកន្លែងកម្សាន្តមួយ ក្នុងក្រុងសៀមរាបដែលបើកគ្មានច្បាប់អាជីវកម្មត្រឹមត្រូវ អំឡុងពេលកូវីដ-១៩ កម្លាំងចម្រុះចុះផ្អាក និងធ្វើកិច្ចសន្យាដល់ម្ចាស់អាជីវកម្មកម្សាន្ត X Bar ដែលបំពានសារាចរណ៍រាជរដ្ឋាភិបាលកំឡុងជំងឺកូវីដ១៩។ រូបភាព៖ រដ្ឋបាលខេត្តសៀមរាប
× សៀមរាប៖ កម្លាំងចម្រុះ ដែលមានមន្ទីរទេសចរណ៍ខេត្តសៀមរាប រដ្ឋបាលក្រុង និងអធិការដ្ឋាននគរបាលក្រុងសៀមរាប នាយប់ថ្ងៃទី១៧ កក្កដា បានចុះផ្អាកសកម្មភាពទីតាំងមណ្ឌលកម្សាន្តមួយកន្លែង គ្មានច្បាប់អាជីវកម្ម និងល្មើសបទបញ្ជារបស់រាជរដ្ឋាភិបាល ក្នុងការទប់ស្កាត់ការរីតត្បាតនៃជំងឺកូវីដ១៩។
មណ្ឌលកម្សាន្តឈ្មោះថា X Bar ដែលមានម្ចាស់ជាជនបរទេស ត្រូវបានកម្លាំងចម្រុះដែលដឹកនាំដោយមន្ទីរទេសចរណ៍ខេត្តសៀមរាប ចុះផ្អាកសកម្មភាព និងណែនាំឱ្យម្ចាស់អាជីវកម្ម ត្រូវគោរពច្បាប់ឱ្យបានត្រឹមត្រូវ ពិសេសត្រូវរង់ចាំការណែនាំជាថ្មីរបស់រាជរដ្ឋាភិបាល មុនបើកអាជីវកម្មរបស់ខ្លួន។
ទាក់ទងនឹងករណីនេះ អ្នកនាំពាក្យរដ្ឋបាលខេត្តសៀមរាប លោក លី សំរិទ្ធ ប្រាប់សារព័ត៌មានថ្មីៗតាមទូរសព្ទនារសៀលថ្ងៃទី១៩ កក្កដាថា ករណីខាងលើមិនមានច្រើនទេ ហើយរដ្ឋបាលខេត្តបានធ្វើការយ៉ាងយកចិត្តទុកដាក់ ដោយមិនធ្វេសប្រហែសឡើយ ធ្វើយ៉ាងណាទប់ស្កាត់មិនឱ្យមានការជួបជុំក្នុងទ្រង់ទ្រាយធំៗ ឬការលួចបើកកន្លែងកម្សាន្តឡើយ។ អ្នកនាំពាក្យបន្ថែមថា កន្លងមកមន្ត្រីក្រសួងសុខាភិបាល បានចុះឱ្យដំបូន្មានច្រើនដល់អាជ្ញាធរខេត្តទាក់ទងនឹងជំងឺកូវីដ១៩ ហើយសង្ឃឹមថា នឹងមានការករណីឆ្លងនៅរលកទី១ ទី២ និងទី៣ឡើយសម្រាប់ខេត្តសៀមរាប៕
© រក្សាសិទ្ធិដោយ thmeythmey.com