ពីនេះ ពីនោះ
ពាក្យផ្លូវការគឺ«ជំនាងផ្ទះ»តែពលរដ្ឋភាគច្រើនហៅថា«ជនាងផ្ទះ»ឬ«ជីនាងផ្ទះ»
×
កន្លងមកសាធារណជននៅតែប្រើពាក្យ«ជនាងផ្ទះ»,«ជីនាងផ្ទះ» និង«ជំនាងផ្ទះ»ទាំងស្រពេចស្រពិល ដោយមិនច្បាស់ថាពាក្យណាត្រឹមត្រូវឡើយ។
សម្តេចព្រះសង្ឃរាជ ជួន ណាត បានបញ្ជាក់ពាក្យដែលត្រឹមត្រូវនោះគឺ «ជំនាងផ្ទះ» ដែលជានាមសព្ទ មានន័យថា ទេវតាដែលថែរក្សាផ្ទះ, វត្ថុស័ក្តិសិទ្ធដែលអាស្រ័យក្នុងផ្ទះ។ បើតាមប្រពៃណីខ្មែរ នៅវេលាគេសង់ផ្ទះថ្មី មុននឹងដាក់ដំបូលគេតែងយកសំពត់ជាតី ឬព្រៃពណ៌ក្រហមប្រមាណជាកន្លះម៉ែត្រ ដែលគូរយន្តទៅដាក់ភ្ជាប់ចំកណ្តាលមេដំបូល ដែលគេរៀបទ្រនឹប ដែលមានបង្អែម ចម្អាប, ទៀន ធូប,ភ្ញីផ្កាជាដើម។ ឧទាហរណ៍៖ អុជទៀនធូបបូជារំលឹកដល់ជំនាងផ្ទះ ដើម្បីសុំឲ្យជួយថែរក្សាកូនចៅ ឲ្យសុខសប្បាយ។
ក្រោយពេលសាងសង់ផ្ទះរួចរាល់ហើយ គេតែងតែដាក់ជំនាងផ្ទះ នៅក្នុងផ្ទះ ដែលគេជឿថា នឹងមានទេវតាតាមថែរក្សាផ្ទះ ដោយអ្នកខ្លះជឿទៀតថា នឹងមានខ្មោចជំនាងផ្ទះមកលេង ឬមកពន្យល់សប្តិជាដើម។ ជាទូទៅគេតែងរៀបចំសែនរាល់ថ្ងៃសីល និងថ្ងៃប្រារព្ធពិធីសាសនានានា ដូចជា ពីធីបុណ្យចូលឆ្នាំខ្មែរ, ចូលឆ្នាំចិន, សែនក្បាលទឹក, ពិធីអកអំបុក និងសំពះព្រះខែ, សែននំព្រះខែជាដើម៕
© រក្សាសិទ្ធិដោយ thmeythmey.com