កីឡាជាតិ
ជាតិ
លីគកំពូលសប្តាហ៍ទី៨ស៊ុតបញ្ចូលទីគ្នា៣១គ្រាប់ ខណៈកីឡាករបរទេសពីររូបរកបាន Hat-Trick កីឡាករ រ៉ឹង ប៊ុនហៀង (ឆ្វេង)និងកីឡាករ កែវ សុខផេង អបអរក្រោយរកគ្រាប់បាល់បានឲ្យវិសាខា
× ការប្រកួតបាល់ទាត់ក្របខណ្ឌមិត្តហ្វូនខេមបូឌានលីគសប្តាហ៍ទី៨ ក្រុមនីមួយៗមានការស៊ុតបញ្ចូលទីគ្នាចំនួន៣១គ្រាប់ ដែលភាគច្រើនរកបានដោយកីឡាករបរទេស។ ក្នុងនោះកីឡាករបរទេសពីររូបសម្រេចបាន៣គ្រាប់(Hat-Trick)រៀងៗខ្លួន។ គិតត្រឹមសប្តាហ៍នេះ ក្រុមព្រះខ័នរាជស្វាយរៀងបន្តឈរកំពូលតារាង ដោយមានភ្នំពេញក្រោនឈរលេខរៀងបន្ទាប់។
គ្រាប់បាល់ចំនួន៣១គ្រាប់ត្រូវបានក្រុមនីមួយៗស៊ុតបញ្ចូលទីគ្នាក្នុងការប្រកួតបាល់ទាត់ក្របខណ្ឌមិត្តហ្វូនខេមបូឌានលីគប្រចាំសប្តាហ៍ទី៨។ ក្នុងចំណោមគ្រាប់បាល់ទាំងនេះ កីឡាករបរទេសរកបានចំនួន២០គ្រាប់ ខណៈកីឡាករកម្ពុជារកបាន១១គ្រាប់។ គ្រាប់បាល់នេះមានការកើតឡើងបើធៀបនឹងសប្តាហ៍ទី៧ ដែលមានការស៊ុតបញ្ចូលទីគ្នាចំនួន២៦គ្រាប់។ ប៉ុន្តែគ្រាប់បាល់នេះស្មើជាមួយសប្តាហ៍ទី៦ ដែលមានការស៊ុតបញ្ចូលទីចំនួន៣១គ្រាប់ដូចគ្នា។
អ្វីដែលគួរឲ្យកយកត់សម្គាល់ក្នុងសប្តាហ៍ទី៨នេះ កីឡាករបរទេសពីររូបរួមមាន Timothy Chiemerie Okereke របស់ក្លិបភ្នំពេញក្រោន និងកីឡាករ Santana Palva frane របស់បឹងកេតសម្រេចបាន Hat-Trick រៀងៗខ្លួន។ ចំណែកកីឡាករ Jean Marie Privat របស់ព្រះខ័នរាជស្វាយរៀងសម្រេចបាន Hat-Trick នៅសប្តាហ៍ទី៦ និងទី៧។
កីឡាករ Timothy Chiemerie Okereke បានជួយឲ្យភ្នំពេញក្រោនយកឈ្នះអគ្គស្នងការដ្ឋាននគរបាលជាតិ ៤-០ ដែលមានការរួមចំណែក១គ្រាប់ពីកីឡាករ ម៉ៅ ពិសិដ្ឋ។ ចំណែកកីឡាករ Santana Palva frane ជួយឲ្យបឹងកេតយកឈ្នះក្រុម កងយោធពលខេមរភូមិន្ទក្នុងលទ្ធផល ៦-១ ដែលរួមចំណែកម្នាក់១គ្រាប់ពី Mizuno Hikaru ម៉ាត់ នូរុណ និង លី មីហ្សាន។
សម្រាប់ការប្រកួតសប្តាហ៍ទី៨នោះដែរ ក្រុមវិសាខាបានយកឈ្នះយុវជនអាយុក្រោម១៨ឆ្នាំបាទីក្នុងលទ្ធផល ៦-០ ក្នុងនោះកីឡាករ រ៉ឹង ប៊ុនហៀង និង កែវ សុខផេង រកបានម្នាក់ពីរគ្រាប់ និងរួមចំណែកម្នាក់១គ្រាប់ពីកីឡាករ Ajayi Opeyemi Kored និង Mihaijevic Filp។ ចំណែកក្រុមណាហ្គាវើលបានយកឈ្នះអគ្គិសនីកម្ពុជា ៥-១ រីឯអង្គរថាយហ្គឺរយកឈ្នះអាស៊ីអឺរ៉ុប ៣-០ ខណៈគីរីវង់សុខសែនជ័យយកឈ្នះសូលទីឡូអង្គរក្នុងលទ្ធផល ៣-២។
គិតត្រឹមសប្តាហ៍ទី៨ ក្រុមព្រះខ័នរាជស្វាយរៀងបន្តឈរកំពូលតារាងដោយមាន១៩ពិន្ទុ ដែលឈរពីក្រោយដោយភ្នំពេញក្រោនមាន១៨ពិន្ទុ បឹងកេតមាន១៧ពិន្ទុ វិសាខាមាន១៦ពិន្ទុ ណាហ្គាវើល និងអង្គរថាយហ្គឺរមាន១៥ពិន្ទុដូចគ្នា៕
Tag:
បាល់ទាត់
Cambodian League 2020
© រក្សាសិទ្ធិដោយ thmeythmey.com