ក្រៅពីការសំដែងលើឆាក ឬសកម្មភាពនានាក្នុងអាជីព តារាល្បីៗលំដាប់ពិភពលោក ក៏ទទួលបាននូវការចាប់អារម្មណ៍ពាក់ព័ន្ធនឹងការតុបតែងផ្សេងៗផងដែរ ដូចជា សម្លៀកបំពាក់ គ្រឿងអលង្ការ គេហដ្ឋាន ជាពិសេសរថយន្តជាដើម។ ពីតារាចម្រៀង តារាសម្តែង កីឡាករ រួមទាំងតារាបង្ហាញម៉ូដ សារព័ត៌មានរថយន្ត Hot Cars បានលើកឡើងពីតារា១០នាក់ ដែលទិញរថយន្តកីឡា (Sports Cars) ទំនើបទៅកែច្នៃ ដើម្បីទាក់ទាញក្រុមអ្នកគាំទ្ររបស់ខ្លួន។
តារាទាំងនោះ រួមមាន៖
១. Chris Brown៖ តារាចម្រៀង រាំ និងសម្តែងអាមេរិក វ័យ៣១ឆ្នាំរូបនេះ បានយករថយន្តម៉ូដែល Lamborghini Huracan ដ៏ទំនើប បិទពណ៌ចម្រុះដ៏ទាក់ទាញ។ តែនេះមិនមែនជាលើកទីមួយ និងជាលើកចុងក្រោយនោះឡើយសម្រាប់ Brown ពីព្រោះ គេតែងតែនិយមលេង និងកែច្នៃរថយន្តជាបន្តបន្ទាប់។
២. Deadmau5៖ តន្ត្រីករ និងជា DJ ចម្រៀងកាដាណា វ័យ៣៩ឆ្នាំ បានតុបតែងរថយន្ត Ferraro 458 របស់ខ្លួន តាមលំនាំរឿងគំនូសជីវចល ជារូបឆ្មា Nyan Cat ពណ៌ខៀវ និងតក្កុតា Kitty។ រថយន្តដែលទាក់ទាញក្មេងជាពិសេសនោះ មានតម្លៃដើម២៥ម៉ឺនដុល្លារអាមេរិក។
៣. Flo Rida៖ អ្នកចម្រៀងរ៉េបអាមេរិកវ័យ៤០ឆ្នាំ ក្លាយជាម្ចាស់កម្មសិទ្ធិរថយន្ត Bugatti Veyrons ដ៏កម្រ។ ទោះជាវារថយន្តប្រណីតដែលមានតម្លៃប្រមាណ៣លានដុល្លារអាមេរិកហើយក៏ដោយ ប៉ុន្តែ Flo នៅតែមិនអស់ចិត្ត ដោយគេបានស្រោបបន្ថែមជាមួយពណ៌ដើម្បីបង្កើនការទាក់ទាញ។
៤. Will.I.Am៖ តន្ត្រីករ តារាចម្រៀង និងជាតារាទូរទស្សន៍ដ៏ល្បីល្បាញវ័យ៤៥ឆ្នាំ បានប្រើប្រាស់រថយន្ត DMC-12 DeLorean ដ៏ល្បីល្បាញ ក្នុងរឿង Back to The Future ទៅរចនាតាមបែបសិល្បៈ។ រថយន្តពណ៌សដែលមានស្លាបដ៏ទាក់ទាញនេះ បានកើតសម្ផស្សមួយកម្រិតទៀត ប៉ុន្តែហាក់ដូចជាឃ្លាតឆ្ងាយពីភាពដើមរបស់ខ្លួន។
៥. Josh Gordon៖ កីឡាករបាល់ទាត់ NFL អាមេរិក វ័យ២៩ឆ្នាំ បានច្នៃរថយន្ត Porsche Panamera ទៅពណ៌ក្រឡាប៉ារ៉ា។ Panamera ស្ថិតក្នុងចំណោមរថយន្តដែលលឿនបំផុតរបស់ក្រុមហ៊ុន Porsche។ កីឡាករពាក់លេខ១០នៃក្រុមSeattle Seahawks រូបនេះ ព្យាយាមរចនាឲ្យមានការទាក់ទាញបន្ថែមទៀតពីសំណាក់ក្រុមអ្នកគាំទ្រខ្លួន។
៦. Justin Bieber៖ តារាចម្រៀងកាណាដាវ័យ២៦ឆ្នាំរូបនេះ បានក្លាយជាមហាសេដ្ឋីតាំងពីអាយុមិនទាន់ដល់២០ឆ្នាំមកម្ល៉េះ។ វាមិនមែនជារឿងដ៏គួរឲ្យភ្ញាក់ផ្អើលនោះឡើយ ចំពោះការបង្អួតសម្ភារប្រើប្រាស់របស់គេ ប៉ុន្តែអ្វីដែលគួរឲ្យចាប់អារម្មណ៍នោះ គឺការប្រើប្រាស់រថយន្ត Fisker Karma ជាមួយពណ៌ដ៏ភ្លឺផ្លេក។ វាជាអំណោយដែល Justin ទទួលបានពីអតីតកីឡាករប្រណាំងរថយន្ត Scott Brian។
៧. Kendall Jenner៖ តារាបង្ហាញម៉ូតអាមេរិកអាយុ២៤ឆ្នាំ មានទ្រព្យសម្បត្តិដល់ទៅប្រមាណ៤៥លានដុល្លារអាមេរិក។ ខ្ទង់ចំណាយដ៏គួរឲ្យកត់សម្គាល់របស់តារាដ៏ល្បីល្បាញរូបនេះ គឺទៅលើរថយន្តម៉ាកអាមេរិក Chevrolet Camaro ដោយនាងបានរចនាវាទៅតាមចំណង់ចំណូលចិត្តរបស់ខ្លួន។
៨. Nicki Minaj៖ តារាចម្រៀងរ៉េបដើមកំណើតទ្រីនីដាត និងតូបាហ្គ្រោ វ័យ៣៦ឆ្នាំរូប បានរចនារថយន្ត Lamborghini Aventador ជាមួយពណ៌ផ្កាឈូកដ៏ទាក់ទាញ។ បើតាមប្រភពពត៌មាននានា ការរចនាចុះឡើងនេះ ធ្វើឲ្យរថយន្តទាំងមូលមានតម្លៃប្រមាណ៤០ម៉ឺនដុល្លារអាមេរិក។
៩. Paris Hilton៖ វ័យ៣៩ឆ្នាំ Paris Hilton ជាតារាទូរទស្សន៍ អ្នកជំនួញ តារាបង្ហាញម៉ូត តារាចម្រៀង និងតារាសម្តែង ដែលជាចៅទួតរបស់ស្ថាបនិកសណ្ឋាគារដ៏ល្បីល្បាញលើពិភពលោក គឺ Hilton Hotels។ នាងមានទ្រព្យសម្បត្តិក្នុងខ្ទង់៣០០លានដុល្លារអាមេរិក។ រថយន្តដែលនាងចូលចិត្តនោះ គឺ Bentley GT Continental ដែលតម្លៃជាង២០ម៉ឺនដុល្លារអាមេរិក ជាមួយនឹងការរចនាពណ៌ផ្កាឈូកបន្ថែម។
១០. Tracy McGrady៖ អតីតកីឡាករបាល់បោះ NBA អាមេរិក បច្ចុប្បន្នអាយុ៤១ឆ្នាំ។ រយៈពេល១៥ឆ្នាំក្នុងអាជីព Tracy មានទ្រព្យសម្បត្តិប្រមាណ៧៥លានដុល្លារអាមេរិក។ ក្នុងចំណោមទ្រព្យដ៏មហាសាលនោះ រថយន្ត Mercedes Benz CL600 ជារបស់សំណព្វចិត្តមួយរបស់អតីតកីឡាកររូបនេះ ដោយគេបានរចនាជាមួយនឹងពណ៌ខៀវស្រាល៕