COVID-19
អន្តរជាតិ
WHO ប្រាប់រដ្ឋអាហ្វ្រិកឲ្យប្រយ័ត្ន ខណៈករណីឆ្លង COVID-19 នៅអាហ្វ្រិកខាងត្បូងហក់ឡើង
គ្រូពេទ្យអាហ្វ្រិកខាងត្បូងកំពុងពិនិត្យសុខភាពអ្នកជំងឺ។ រូបភាព AFP
×![]()
ដោយ: តន ចាន់រិទ្ធារ៉ា
ករណីឆ្លងជំងឺ COVID-19 នៅប្រទេសអាហ្វ្រិកខាងត្បូង បានហក់ឡើងខ្ពស់មិនធ្លាប់មាននៅថ្ងៃទី២០ ខែកក្កដា។ អង្គការសុខភាពពិភពលោក (WHO) បានដាស់តឿនប្រទេសតំបន់អាហ្វ្រិកឯទៀតឲ្យបង្កើនការប្រុងប្រយ័ត្នរបស់ពួកគេទល់នឹងការកើនឡើងជំងឺផ្លូវដង្ហើមមួយនេះ។
អាហ្វ្រិកខាងត្បូង នៅថ្ងៃទី២០ ខែកក្កដា បានរាយករណ៍ពីករណីឆ្លងជំងឺ COVID-19 ប្រចាំថ្ងៃដល់ទៅ១៣៣៧៣នាក់ ដែលតួលេខឆ្លងច្រើនជាងគេមួយលើពិភពលោក។ តួលេខនេះ ធ្វើឲ្យករណីឆ្លងសរុបនៅប្រទេសតំបន់អាហ្វ្រិកមួយនេះមានដល់ជិត៣៨ម៉ឺននាក់ ហើយចំនួនអ្នកស្លាប់មាន៥១៧៣នាក់ផងដែរ។
ការហក់ឡើងយ៉ាងឆាប់រហ័សបែបនេះ ត្រូវបានអង្គការសហប្រជាជាតិចាត់ទុកជាសារព្រមានមួយសម្រាប់ប្រទេសក្នុងទ្វីបក្រីក្រមួយរបស់ពិភពលោក។ អ្នកជំនាញជំងឺអាសន្នរបស់ WHO លោក Mike Ryan និយាយក្នុងសន្និសីទសារព័ត៌មានថ្ងៃទី២០ ខែកក្កដា ថា ប្រទេសអាហ្វ្រិកមួយចំនួនមានបុតស្វាណា កេនយ៉ា ហ្សំប៊ី ណាមីប៊ី និងស៊ីមបាវ៉េ ក៏បានរាយការណ៍ពីការកើនឡើងការឆ្លងជំងឺ COVID-19 នៅប៉ុន្មានថ្ងៃមកនេះ។
«ថ្វីបើចំនួន [ករណីឆ្លង] នៅប្រទេសទាំងនោះនៅតូច ខ្ញុំគិតថា យើចាប់ផ្ដើមឃើញការកើនឡើងការឆ្លងជាបន្តបន្ទាប់នៅប្រទេសអនុតំបន់សាហារ៉ា ហើយខ្ញុំគិតថា យើងត្រូវគិតគូរពីបញ្ហានេះឲ្យម៉ត់ចត់។» លោក Ryan បញ្ជាក់បែបនេះដោយបន្ថែមថា អាហ្វ្រិកខាងត្បូងជាប្រផ្នូលមិនល្អ ហើយអាចជាការព្រមាននូវអ្វីដែលនឹងកើតឡើងនៅអាហ្វ្រិក។
មកទល់ពេលនេះ ស្ថានការណ៍ជំងឺ COVID-19 នៅអាហ្វ្រិក ស្ថិតក្នុងកម្រិតទាបនៅឡើយ បើប្រៀបធៀបនឹងស្ថានការណ៍នៅអាមេរិក ឥណ្ឌា និងអាមេរិកឡាទីន។ នៅអាមេរិក ករណីឆ្លងត្រូវបានរាយការណ៍ខ្ទង់៦ម៉ឺននាក់ប៉ុន្មានថ្ងៃមកហើយ ដែលចំនួនអ្នកឆ្លងសរុបមានដល់ជិតបួនលាននាក់ និងស្លាប់១៤ម៉ឺននាក់។ ប្រេស៊ីល រងគ្រោះខ្លាំងជាងគេនៅអាមេរិកខាងត្បូង ជាមួយករណីឆ្លងសរុបជាងពីរលាននាក់ និងស្លាប់៨ម៉ឺននាក់។
ក្នុងសន្និសីទសារព័ត៌មានដដែលនោះ អគ្គនាយក WHO Tedros Adhanom Ghebreyesus ក៏ព្រមានពីស្ថានភាពគ្រោះថ្នាក់ក្នុងចំណោមជនជាតិដើមផងដែរ។ បើតាមលោក Tedros គិតត្រឹមដើមខែកក្កដា ជនជាតិចំនួនច្រើនជាង៧ម៉ឺននាក់ ឆ្លង COVID-19 នៅអាមេរិក ក្នុងនោះជាង២ពាន់នាក់បានស្លាប់៕
Tag:
WHO
អាហ្វ្រិក
© រក្សាសិទ្ធិដោយ thmeythmey.com
