ព្រះសីហនុ ថ្ងៃទី២០ ខែកក្កដា ឆ្នាំ២០២០៖ គម្រោង Ecocycle របស់ក្រុមហ៊ុន ជីប ម៉ុង អុិនស៊ី ស៊ីមេន ដែលជាអ្នកផ្តល់ដំណោះស្រាយកម្ទេចសំរាម ទំនើប និងមាននិរន្តរភាពខ្ពស់ បានចុះហត្ថលេខាជាមួយ តំបន់សេដ្ឋកិច្ចពិសេសក្រុងព្រះសីហនុ ដែលជាតំបន់សេដ្ឋកិច្ចពិសេសមួយក្នុងចំណោមតំបន់សេដ្ឋកិច្ចពិសេស ដែលមានការអភិវឌ្ឍល្អបំផុតនៅក្នុងប្រទេសកម្ពុជា លើកិច្ចព្រមព្រៀងសាងសង់ កន្លែងផ្ទុកសំរាមឧស្សាហកម្ម ដែលមានទីតាំងនៅតំបន់សេដ្ឋកិច្ចពិសេសក្រុងព្រះសីហនុ ដើម្បីផ្ដល់ដំណោះស្រាយកម្ទេចសំរាមដែលមាននិរន្តរភាពខ្ពស់ទៅដល់សហគ្រាសនៅទីនោះ។
តំបន់សេដ្ឋកិច្ចពិសេសក្រុងព្រះសីហនុ ដែលមានទីតាំងនៅស្រុកព្រៃនប់ ខេត្តព្រះសីហនុ ដែលសាងសង់ដោយសហគ្រាសចិន និងខ្មែរឯកជនជាច្រើន ដែលជាគម្រោងដ៏ធំមួយ នៃគំនិតផ្តួចផ្តើម«ខ្សែក្រវាត់ និង ផ្លូវ» ក្នុងគោលបំណងបង្កើតវេទិកាវិនិយោគដ៏ល្អសម្រាប់ «វិនិយោគនៅអាស៊ាន ដើម្បីផ្សព្វផ្សាយទៅដល់ពិភពលោក» របស់សហគ្រាស។ នៅក្នុងដំណាក់កាលទី ១ នៃតំបន់សេដ្ឋកិច្ចពិសេសក្រុងព្រះសីហនុ ឧស្សាហកម្មសំខាន់ៗធំៗ មានដូចជា វាយនភណ្ឌ និងកាត់ដេរ កាបូប និងផលិតផលស្បែក កាបូប និងផលិតផលស្បែក ឧបករណ៍ផ្សេងៗ សម្ភារៈសំណង់ គ្រឿងសង្ហារឹមក្នុងផ្ទះ និងសារធាតុគីមី។ នៅដំណាក់កាលទី ២ នាពេលបច្ចុប្បន្ន មានសហគ្រាសចំនួន ១៦៥ មកពីប្រទេសចិន អាមេរិក អ៊ឺរ៉ុប អាស៊ីអាគ្នេយ៍ និងបណ្តាប្រទេសដទៃទៀត និងមានកម្មករ ៣០,០០០នាក់។ តំបន់សេដ្ឋកិច្ចពិសេសក្រុងព្រះសីហនុ ចង់ក្លាយខ្លួន ទៅជាតំបន់ឧស្សាហកម្មគំរូផ្នែកអេកូឡូស៊ី ដែលមានដំណើរការល្អ និងពេញលេញ ជាមួយសហគ្រាសសរុបចំនួន ៣០០ និងមានចំនួនកម្មករទៅដល់ ១០០,០០០នាក់។
លោក Jianjiang Cao អ្នកគ្រប់គ្រងទូទៅនៃ តំបន់សេដ្ឋកិច្ចពិសេសក្រុងព្រះសីហនុ បានមានប្រសាសន៍ថា៖«ទាំងក្នុងអំឡុងពេលដំណើរការអភិវឌ្ឍ និងការសាងសង់ តំបន់សេដ្ឋកិច្ចពិសេសក្រុងព្រះសីហនុ តែងតែប្រកាន់ខ្ជាប់នូវគំនិត «កិច្ចសហប្រតិបត្តិការឈ្នះឈ្នះ» ដែលមាន ៨ ចំណុច។ ចំណុចមួយ គឺចង់បានការអភិវឌ្ឍ ដែលមិនប៉ះពាល់ដល់បរិស្ថាន ដើម្បីបង្កើតទំនាក់ទំនងឈ្នះឈ្នះជាមួយបរិស្ថាន។ យើងមិនត្រឹមតែបង្កើតភាពបៃតង ក្នុងពេលសាងសង់នោះទេ ប៉ុន្តែថែមទាំងបានសាងសង់បំពង់បង្ហូរទឹក ដើម្បីបែងចែកទឹកភ្លៀង និងទឹកស្អុយ។ យើងមានមោទកភាព ក្នុងការនិយាយថា រោងចក្រប្រព្រឹត្តកម្មទឹកស្អុយរបស់យើង គឺល្អជាងគេនៅប្រទេសកម្ពុជា។ ការសហការជាមួយគម្រោង Ecocycle យើងអាចបោះបង់ចោលកាកសំណល់ឧស្សាហកម្ម បានទាន់ពេលវេលា និងប្រកបដោយប្រសិទ្ធភាព ដែលជាវិធានការដ៏មានឥទ្ធិពលមួយ ឆ្ពោះទៅរកការអនុវត្តគំនិត «កិច្ចសហប្រតិបត្តិការឈ្នះឈ្នះ»។ យើងជឿជាក់ថា បច្ចេកវិទ្យាគ្រប់គ្រងកាកសំណល់ដ៏ទំនើបរបស់ គម្រោង Ecocycle នឹងធ្វើឲ្យតំបន់សេដ្ឋកិច្ចពិសេសក្រុងព្រះសីហនុ ក្លាយជាតំបន់ឧស្សាហកម្មបៃតង»។
ការគ្រប់គ្រងកាកសំណល់សំរាម បានក្លាយជាបញ្ហាសំខាន់នៅប្រទេសកម្ពុជា ដែលមានការលំបាកកាន់តែខ្លាំង ស្របពេលដែលមានកំណើនសេដ្ឋកិច្ចខ្ពស់។ គំនិតផ្តួចផ្តើមនេះ នឹងផ្តល់នូវដំណោះស្រាយគ្រប់គ្រងកាកសំណល់ ប្រកបដោយនិរន្តរភាពដល់សហគ្រាស នៅតំបន់សេដ្ឋកិច្ចពិសេសក្រុងព្រះសីហនុ ដោយប្រើប្រាស់បច្ចេកវិទ្យាដែលត្រូវបានទទួលស្គាល់ជាសកល ដែលមានឈ្មោះថា “Co-processing”។ “Co-processing” គឺជាពាក្យបច្ចេកទេស ប្រើសម្រាប់កម្ទេចកាកសំណល់ឧស្សាហកម្ម តាមរយៈការដុតដោយឡស៊ីម៉ងត៍ ស្របពេលដែលកំពុងដំណើរការផលិតស៊ីម៉ងត៍ ដោយមិនប៉ះពាល់ដល់ប្រសិទ្ធភាពណាមួយឡើយ។
អ្នកធ្វើការលើផ្នែកឧស្សាហកម្ម បានកំពុងបង្ហាញការទទួលខុសត្រូវកាន់តែច្រើនជាងមុន ជាពិសេស លើផ្នែកបរិស្ថាន។ កន្លែងផ្ទុកសំរាមឧស្សាហកម្មថ្មីនេះ ជាផ្នែកមួយនៃការប្តេជ្ញាចិត្ត របស់ក្រុមហ៊ុន ជីប ម៉ុង អុិនស៊ី ស៊ីមេន ដើម្បីកសាងបរិស្ថានស្អាត នៅពេលដែលពិភពលោក កំពុងប្រឈមមុខទៅនឹងបញ្ហាប្រែប្រួលអាកាសធាតុ។ គម្រោង Ecocycle មានសមត្ថភាពកែច្នៃកាកសំណល់ឧស្សាហកម្ម ប្រហែល ១០ តោនក្នុងមួយម៉ោង ឬប្រហែល ៧០០០ តោនក្នុងមួយខែ។
លោក Nicolas George នាយកប្រតិបត្តិនៃ ក្រុមហ៊ុន ជីប ម៉ុង អុិនស៊ី ស៊ីមេន បានមានប្រសាសន៍ថា៖ “គម្រោង Ecocycle មានមោទកភាពក្រៃលែង ដែលបានបោះជំហានដ៏សំខាន់មួយទៀត ក្នុងដំណើរឆ្ពោះទៅរកការគ្រប់គ្រងសំរាមនៅកម្ពុជា ដោយនិរន្តរភាព។ កិច្ចសហប្រតិបត្តិការជាមួយ តំបន់សេដ្ឋកិច្ចពិសេសក្រុងព្រះសីហនុ ដែលយើងកំពុងផ្តួចផ្តើម គឺជាសញ្ញាដ៏ប្រសើរមួយ ដែលបង្ហាញថា វិនិយោគិនបានប្តេជ្ញាចិត្ដ ក្នុងកាត់បន្ថយសម្ពាធទៅលើបរិស្ថាន។ យើងនឹងមានមោទនភាព ក្នុងការធ្វើឲ្យកិច្ចសហប្រតិបត្តិការ ទទួលបានជោគជ័យ និងជួយគាំទ្រដល់តំបន់សេដ្ឋកិច្ចពិសេស និងសហគ្រាសនៅទីនោះជាមួយសេវាកម្មលំដាប់ថ្នាក់ល្អបំផុត”។
បច្ចេកវិទ្យា “co-processing” ត្រូវបានប្រើប្រាស់យ៉ាងជោគជ័យ នៅសហរដ្ឋអាមេរិក សហភាពអឺរ៉ុប និងជប៉ុន អស់រយៈពេលជាង ៤០ ឆ្នាំមកហើយ។ បច្ចេកវិទ្យានេះ ត្រូវបានទទួលស្គាល់ដោយអង្គការអន្តរជាតិជាច្រើន រួមទាំងអង្គការសុខភាពពិភពលោក និង GTZ ក៏ដូចជាអនុសញ្ញា Basel និង Stockholm។
លោក Sajith Edirisuriya អ្នកគ្រប់គ្រងទូទៅនៃគម្រោង Ecocycle បានមានប្រសាសន៍ថា៖“យើងមានទំនុកចិត្តថា យើងអាចផ្តល់នូវដំណោះស្រាយគ្រប់គ្រងកាកសំណល់ ប្រកបដោយនិរន្តរភាព ទៅដល់សហគ្រាសទាំងអស់ នៅតំបន់សេដ្ឋកិច្ចពិសេសក្រុងព្រះសីហនុ តាមរយៈការបំពេញតាមបទប្បញ្ញត្តិ ផ្នែកស្តង់ដារបច្ចេកទេស និងត្រូវបានអនុម័តជាសកល សម្រាប់ការគ្រប់គ្រងសំរាមឧស្សាហកម្ម។ ដំណោះស្រាយរបស់យើង គឺជាជម្រើសល្អប្រសើរបំផុត ជំនួសឲ្យការកប់សំរាម និងការដុតសំរាម ពីព្រោះវាផ្តល់នូវដំណោះស្រាយពេញលេញ ដោយមិនមានផលប៉ះពាល់ដល់បរិស្ថាន”។
ក្រុមហ៊ុន ជីប ម៉ុង អុិនស៊ី ស៊ីមេន គឺជាការបណ្តាក់ទុនរួមគ្នា រវាង ជីប ម៉ុង គ្រុប នៃប្រទេសកម្ពុជា និងក្រុមហ៊ុនស៊ីម៉ងត៍ Siam City Cement Corporation របស់ប្រទេសថៃ។ Insee Group មានបទពិសោធន៍ជាងពីរទសវត្សរ៍ ក្នុងការផ្តល់នូវដំណោះស្រាយគ្រប់គ្រងសំរាម ប្រកបដោយវិជ្ជាជីវៈដល់ឧស្សាហកម្មផ្សេងៗជាច្រើន។ ដោយប្រើប្រាស់ឡដែលទំនើប Insee Ecocycle ដែលជាអង្គភាពអាជីវកម្មមួយរបស់ Insee Group បានកម្ទេចសំណល់ឧស្សាហកម្ម ជាង ៧០០ ០០០ តោនក្នុងមួយឆ្នាំ។
អង្គភាពអាជីវកម្មនេះ បានពង្រីកវិសាលភាព និងជំនាញរបស់ខ្លួនពី Insee Ecocycle ថៃ ទៅ Insee Ecocycle វៀតណាម និង Insee Ecocycle ស្រីលង្កា។ គម្រោង Ecocycle គឺជាសមាជិកគ្រួសារថ្មី ក្នុងក្រុមគ្រួសារគ្រប់គ្រងកាកសំណល់នេះ៕
(អត្ថបទពាណិជ្ជកម្ម)