ជាតិ
កំពង់ស្ពឺមានកសិដ្ឋានចិញ្ចឹមសត្វជិត៥០០កន្លែង ហើយពលរដ្ឋជាង១ម៉ឺននាក់រួមគ្នាចងក្រងជាសហគមន៍កសិកម្ម អភិបាលខេត្តកំពង់ស្ពឺ
× កំពង់ស្ពឺ ៖ ស្ថិតនៅមិនឆ្ងាយពីរាជធានីភ្នំពេញក៏ពិតមែន តែខេត្តនេះមានប្រជាជនភាគច្រើនប្រកបរបរកសិកម្មក្រៅពីធ្វើស្រែចម្ការ។ កសិដ្ឋានចិញ្ចឹមសត្វមានជិត៥០០កន្លែង ហើយការចងក្រងគ្នាជាសហគមន៍ដើម្បីពង្រីងមុខរបរទូទាំងខេត្តមានចំនួន៥៥សហគមន៍ផងដែរ។ នេះបើតាមរបាយការណ៍របស់រដ្ឋបាលខេត្តកំពង់ស្ពឺ។
នាសន្និសីទសារព័ត៌មានស្ដីពី «វឌ្ឍនភាព និងទិសដៅបន្តរបស់រដ្ឋបាលខេត្តកំពង់ស្ពឺ» ដែលរៀបចំដោយអង្គភាពអ្នកនាំពាក្យរដ្ឋាភិបាល កាលពីថ្ងៃទី១៩ ខែកក្កដា អាជ្ញាធរខេត្ត បានបង្ហាញថា ខេត្តមានកសិដ្ឋានចិញ្ចឹមសត្វចំនួន ៤៩៤កន្លែង ដែលមានកសិដ្ឋានចិញ្ចឹមជ្រូកសាច់ ២២៥កន្លែង។ ក្រៅពី កសិដ្ឋានចិញ្ចឹមជ្រូកសាច់ មានកសិដ្ឋានចិញ្ចឹមជ្រូកពូជ កសិដ្ឋានចិញ្ចឹមមាន់និងទា កសិដ្ឋានចិញ្ចឹមគោ ក្របីផងដែរ។
បើតាមលោកអភិបាលខេត្ត វ៉ី សំណាង ខេត្តកំពង់ស្ពឺមានដំណើរការគ្រប់គ្រង និង ចងក្រងសហគមន៍ទូទាំងខេត្តចំនួន ៥៥សហគមន៍ មានសមាជិកសរុបចំនួន ១០.៦១៦នាក់ ដែលកំពុងដំណើរការធ្វើអាជីវកម្មទៅលើមុខរបរផ្សេងៗដូចជា ដាំបន្លែ ផលិតស្ករត្នោត ធ្វើឥណទានកសិកម្មខ្នាតតូច ផ្គត់ផ្គង់នាំចូលសម្ភារពីខាងក្រៅលក់ក្នុងសហគមន៍ និងប្រមូលផ្តុំផលិតផលក្នុងសហគមន៍លក់ចេញទៅទីផ្សារ។
បច្ចុប្បន្ន សហគមន៍ចំនួន២ បានចុះកិច្ចសន្យាដោយមានទិដ្ឋាការពីមន្ទីរ គឺសហគមន៍ផលិតស្ករត្នោត និងសហគមន៍ផលិតស្រូវផ្ការំដួលសរីរាង្គ ដែលមានសមាជិកសរុបចំនួន ១៣១ គ្រួសារ។ លើសពីនេះ សហគមន៍ដែលចុះកិច្ចសន្យាក្នុងកម្រិតព្រមព្រៀងត្រឹមភាគីអ្នកផលិត និងអ្នកទិញមានចំនួន ៣សហគមន៍ គឺសហគមន៍ផលិតបន្លែចម្រុះ និងសហគមន៍ផលិតស្រូវក្រអូប មានសមាជិកអ្នកផលិតសរុបចំនួន ៦៤៥ គ្រួសារ។
សម្រាប់ដំណាំរួមផ្សំដូចជា សណ្តែកដី សណ្តែកបាយ ពោត ដំឡូងជ្វាបន្លែគ្រប់មុខ និងឪឡឹក សរុបផ្ទៃដីចំនួន ៤៣៧ហិកតា។ ដោយឡែកការប្រមូលផលអំពៅសរុបលើផ្ទៃដីសរុប ៣៦.៤២១,៣២ ហិកតា ទិន្នផលជាមធ្យម ៦០តោនក្នុងមួយហិកតា បរិមាណផលសរុបចំនួន ១.៨០៧.២៣៦,៦តោន និងដំឡូងមីប្រមូលផលលើផ្ទៃដីចំនួន ៥.៧៦៦,៨០ ហិកតា ទិន្នផលជាមធ្យម ១៨តោនក្នុងមួយហិកតា បរិមាណផលសរុបចំនួន ១០៣.៨០២,៤០តោន៕
© រក្សាសិទ្ធិដោយ thmeythmey.com